വാഷിംഗ്ടണ്‍ : പൊതുവിനിമയത്തിന് ഡോളറിനെ ആശ്രയിക്കാതെ മറ്റൊരു കറന്‍സിയെക്കുറിച്ച് ആലോചന നടത്തുന്ന ബ്രിക്സ് രാജ്യങ്ങളെ വീണ്ടും ഭീഷണിപ്പെടുത്തി യുഎസ് പ്രസിഡന്റ് ഡോണള്‍ഡ് ട്രംപ്. ഡോളറിന് ബദലായി പുതിയ കറന്‍സി അവതരിപ്പിച്ചാല്‍ അത് അംഗീകരിക്കുന്ന രാജ്യങ്ങള്‍ക്കുമേല്‍ നൂറുശതമാനം തീരുവ ഏര്‍പ്പെടുത്തുമെന്നാണ് പ്രസിഡന്റായി ചുമതലയേറ്റതിനു പിന്നാലെ ട്രംപിന്റെ ഭീഷണി. ഇക്കാര്യത്തില്‍ മുമ്പും അദ്ദേഹം ഇന്ത്യ ഉള്‍പ്പെടെയുള്ള ബ്രിക്സ് രാജ്യങ്ങള്‍ക്ക് താക്കീത് നല്‍കിയിരുന്നു.
'ബ്രിക്സ് രാജ്യങ്ങള്‍ അത് ചെയ്യാന്‍ ആഗ്രഹിക്കുന്നുവെങ്കില്‍, അത് കുഴപ്പമില്ല, പക്ഷേ അവര്‍ അമേരിക്കയുമായി ബിസിനസില്‍ ഏര്‍പ്പെടുമ്പോള്‍ ഞങ്ങള്‍ കുറഞ്ഞത് 100% താരിഫ് ഏര്‍പ്പെടുത്തും. ആഗോള വ്യാപാരത്തില്‍ ഡോളറിന്റെ ഉപയോഗം കുറയ്ക്കുന്നതിനെക്കുറിച്ച് അവര്‍ അത്രയധികം ചിന്തിച്ചാല്‍ പോലും അവര്‍ക്ക് 100% താരിഫ് ഏര്‍പ്പെടുത്തും' -ട്രംപ് പറഞ്ഞു. 'പുതിയ ബ്രിക്സ് കറന്‍സി സൃഷ്ടിക്കില്ലെന്നും ശക്തമായ യുഎസ് ഡോളറിന് പകരമായി മറ്റൊരു കറന്‍സിയെയും പിന്തുണയ്ക്കില്ലെന്നും ഈ രാജ്യങ്ങള്‍ ഉറപ്പുനല്‍കണമെന്ന് ഞങ്ങള്‍ ആവശ്യപ്പെടുന്നു, അല്ലെങ്കില്‍ അവര്‍ 100 ശതമാനം താരിഫുകള്‍ നേരിടേണ്ടിവരും, അല്ലാത്തപക്ഷം അമേരിക്കയില്‍ സാധനങ്ങള്‍ വില്‍ക്കാമെന്ന മോഹം ഉപേക്ഷിച്ച് വിട പറയുമെന്ന് പ്രതീക്ഷിക്കാം'- ട്രംപ് കൂട്ടിച്ചേര്‍ത്തു.
റഷ്യ, ഇന്ത്യ, ചൈന, ദക്ഷിണാഫ്രിക്ക, ഈജിപ്ത്, എത്യോപ്യ, ഇന്തോനേഷ്യ, ഇറാന്‍, യുണൈറ്റഡ് അറബ് എമിറേറ്റ്സ് എന്നി പത്ത് രാജ്യങ്ങളുടെ കൂട്ടായ്മയാണ് ബ്രിക്സ്. ഡിസംബറിലാണ് ഇതിന് മുന്‍പ് സമാനമായ രീതിയില്‍ ട്രംപ് ബ്രിക്സ് രാജ്യങ്ങള്‍ക്ക് മുന്നറിയിപ്പ് നല്‍കിയത്. ഡോളറിന് പകരം പുതിയ കറന്‍സി കണ്ടെത്തണമെന്ന് ആവശ്യപ്പെടുന്ന രാജ്യങ്ങളില്‍ മുന്നിലുള്ളത് റഷ്യയും ചൈനയുമാണ്.
ഡോളറിന് ബദലായി കറന്‍സി ഇറക്കുന്ന രാജ്യങ്ങള്‍ക്ക് നൂറുശതമാനം നികുതി ഏര്‍പ്പെടുത്തുമെന്ന് ട്രംപ്
