യൂട്ടാ: കൊല്ലപ്പെട്ട വലതുപക്ഷ ആക്ടിവിസ്റ്റും ഇന്‍ഫ്‌ലുവന്‍സറുമായ ചാര്‍ളി കിര്‍ക്കിന്റെ ഭാര്യ എറിക്ക ഫ്രാന്റ്സ്വെ വെള്ളിയാഴ്ച (സെപ്റ്റംബര്‍ 12) യൂട്ടാ വാലി യൂണിവേഴ്‌സിറ്റിയില്‍ നടത്തിയ പ്രസംഗത്തിനിടെ തന്റെ ആദ്യത്തെ പൊതു പ്രസ്താവന നടത്തി. പൊരുതിക്കൊണ്ട്, തന്റെ ദൗത്യം തുടരുമെന്ന് കണ്ണീരോടെ പ്രതിജ്ഞയെടുക്കുമ്പോള്‍, തന്റെ കുടുംബത്തെ എല്ലാറ്റിനുമുപരി സ്‌നേഹിച്ച 'തികഞ്ഞ പിതാവും ഭര്‍ത്താവും' ആയിരുന്നു ചാര്‍ളി കിര്‍ക്ക് എന്നാണ് അവര്‍ വിശേഷിപ്പിച്ചത്. 'ചാര്‍ളി ജീവിതത്തെ സ്‌നേഹിച്ചു, അവന്‍ തന്റെ ജീവിതത്തെ സ്‌നേഹിച്ചു... അവന്‍ അമേരിക്കയെ സ്‌നേഹിച്ചു, ദൈവത്തോട് അടുക്കാന്‍ സഹായിച്ച പ്രകൃതിയെ അവന്‍ സ്‌നേഹിച്ചു..., എന്നാല്‍ എല്ലാറ്റിനുമുപരി ചാര്‍ളി തന്റെ മക്കളെ സ്‌നേഹിച്ചു, അവന്‍ എന്നെ പൂര്‍ണ്ണഹൃദയത്തോടെ സ്‌നേഹിച്ചു...,' അവര്‍ പറഞ്ഞു.
ചാര്‍ളി കിര്‍ക്കിന്റെ വിധവയുടെ 'രാഷ്ട്രത്തോടുള്ള അഭിസംബോധന'
ടേണിംഗ് പോയിന്റ് യുഎസ്എ 'രാഷ്ട്രത്തോടുള്ള അഭിസംബോധന' എന്ന് വിശേഷിപ്പിച്ചുകൊണ്ട്, തന്റെ ഭര്‍ത്താവിന്റെ പ്രസ്ഥാനം അദ്ദേഹത്തിന്റെ മരണത്തോടെ അവസാനിക്കില്ലെന്ന് എറിക്ക പ്രതിജ്ഞയെടുത്തു. 'എന്റെ ഭര്‍ത്താവിന്റെ ദൗത്യം ശക്തമാണെന്ന് നിങ്ങള്‍ മുമ്പ് കരുതിയിരുന്നെങ്കില്‍, ഈ രാജ്യത്തും ലോകത്തും നിങ്ങള്‍ എന്തിനാണ് തുടക്കം കുറിച്ചതെന്ന് നിങ്ങള്‍ മനസിലാക്കാന്‍ പോകുന്നതേയുള്ളൂ. തന്റെ ഭര്‍ത്താവിന്റെ കൊലപാതകത്തിന് ഉത്തരവാദികളായ ദുഷ്ടന്മാരെ' അഭിസംബോധന ചെയ്തുകൊണ്ട് എറിക്ക പറഞ്ഞു.
'ഈ ഭാര്യയുടെ ഉള്ളില്‍ നിങ്ങള്‍ കത്തിച്ച തീ എന്താണെന്ന് നിങ്ങള്‍ക്കറിയില്ല. ഈ വിധവയുടെ നിലവിളി ഒരു യുദ്ധവിളി പോലെ ലോകമെമ്പാടും പ്രതിധ്വനിക്കും,' 'എന്റെ ഭര്‍ത്താവ് കെട്ടിപ്പടുത്ത പ്രസ്ഥാനം മരിക്കില്ലെന്നും എറിക്ക പ്രതിജ്ഞയെടുത്തു.
കിര്‍ക്കിന്റെ ആസൂത്രിതമായ കാമ്പസ് ടൂര്‍, ഡിസംബറിലെ അമേരിക്കഫെസ്റ്റ് കോണ്‍ഫറന്‍സ്, അദ്ദേഹത്തിന്റെ റേഡിയോ, പോഡ്കാസ്റ്റ് ഷോകള്‍ എന്നിവ തുടരുമെന്ന് അവര്‍ പ്രഖ്യാപിച്ചു. 'അദ്ദേഹത്തിന്റെ ജ്ഞാനം നിലനില്‍ക്കും,' അവര്‍ പറഞ്ഞു, ടേണിംഗ് പോയിന്റ് യുഎസ്എ ചാപ്റ്ററുകളില്‍ ചേരാനോ ആരംഭിക്കാനോ ക്രിസ്തീയ വിശ്വാസം സ്വീകരിക്കാനോ യുവ അമേരിക്കക്കാര്‍ മുന്നോട്ടുവരണമെന്ന് എറിക്ക ആഹ്വാനം ചെയ്തു.
ചാര്‍ളി കിര്‍ക്ക് ഒരു 'രക്തസാക്ഷി'
'ഇന്നും എന്നേക്കും അദ്ദേഹം ഒരു രക്തസാക്ഷിയുടെ മഹത്തായ കിരീടം ധരിച്ച് തന്റെ രക്ഷകന്റെ പക്ഷത്ത് നില്‍ക്കും..' കൊല്ലപ്പെട്ട തന്റെ ഭര്‍ത്താവിനെ 'രക്തസാക്ഷി' എന്ന് പരാമര്‍ശിച്ചുകൊണ്ട് എറിക്ക ഫ്രാന്റ്സ്വെ പറഞ്ഞു.
'ഭര്‍ത്താക്കന്മാരേ, നിങ്ങളുടെ ഭാര്യമാരെ സ്‌നേഹിക്കുവിന്‍, ക്രിസ്തുവും സഭയെ സ്‌നേഹിച്ചതുപോലെ തന്നെത്താന്‍ അവള്‍ക്കു വേണ്ടി സമര്‍പ്പിക്കുവിന്‍.' അദ്ദേഹത്തിന്റെ പ്രിയപ്പെട്ട ബൈബിള്‍ വാക്യങ്ങളിലൊന്ന് ഉദ്ധരിച്ചുകൊണ്ട് അവര്‍ കൂട്ടിച്ചേര്‍ത്തു.
ട്രംപിന് നന്ദി പറഞ്ഞ് ചാര്‍ളി കിര്‍ക്കിന്റെ വിധവ
പ്രസിഡന്റ് ഡോണള്‍ഡ് ട്രംപിനും വൈസ് പ്രസിഡന്റ് ജെ.ഡി. വാന്‍സിനും അവരുടെ കുടുംബങ്ങള്‍ക്കും തനിക്ക് നല്‍കിയ പിന്തുണയ്ക്ക് എറിക്ക നന്ദി പറഞ്ഞു. 'മിസ്റ്റര്‍ പ്രസിഡന്റ്, എന്റെ ഭര്‍ത്താവ് നിങ്ങളെ സ്‌നേഹിച്ചു, നിങ്ങളും അദ്ദേഹത്തെ സ്‌നേഹിക്കുന്നുണ്ടെന്ന് അദ്ദേഹത്തിന് അറിയാമായിരുന്നു... നിങ്ങളുടെ സൗഹൃദം അത്ഭുതകരമാണ്,' അവര്‍ പറഞ്ഞു.
ചാര്‍ളി കിര്‍ക്കിന്റെ കൊലയാളി
കിര്‍ക്കിനെ കൊലപ്പെടുത്തിയ കേസില്‍ 22 കാരനായ ടൈലര്‍ റോബിന്‍സണെ അറസ്റ്റ് ചെയ്തതായി അധികൃതര്‍ പ്രഖ്യാപിച്ചതിന് മണിക്കൂറുകള്‍ക്ക് ശേഷമാണ് എറിക്കയുടെ പ്രതികരണങ്ങള്‍. കിര്‍ക്കിന്റെ വീക്ഷണങ്ങളോടുള്ള വെറുപ്പാണ് ആക്രമണത്തിന് റോബിന്‍സണെ പ്രേരിപ്പിച്ചതെന്ന് ഉേദ്യാഗസ്ഥര്‍ പറയുന്നു.
ഒരു മോര്‍മോണ്‍ കുടുംബത്തിലെ മൂന്ന് ആണ്‍കുട്ടികളില്‍ മൂത്തവനായ റോബിന്‍സണ്‍ ഒരു ഇലക്ട്രിക്കല്‍ അപ്രന്റീസ്ഷിപ്പ് പ്രോഗ്രാമിന്റെ മൂന്നാം വര്‍ഷത്തിലായിരുന്നു, കുറച്ചുകാലം യൂട്ടാ സ്‌റ്റേറ്റ് യൂണിവേഴ്‌സിറ്റിയില്‍ ചേര്‍ന്നു പഠിച്ചിരുന്നു.
വെടിവയ്പ്പ്: അതെങ്ങനെ സംഭവിച്ചു
ബുധനാഴ്ച (സെപ്റ്റംബര്‍ 10) യു.വി.യുവില്‍ ട്രാന്‍സ്‌ജെന്‍ഡര്‍ മാസ് ഷൂട്ടര്‍മാരെക്കുറിച്ചുള്ള ചോദ്യത്തിന് മറുപടി നല്‍കുന്നതിനിടെയാണ് 31 കാരനായ കിര്‍ക്ക് കഴുത്തില്‍ മാരകമായി വെടിയേറ്റത്. റോബിന്‍സണ്‍ ഉയര്‍ന്ന ശക്തിയുള്ള ബോള്‍ട്ട്ആക്ഷന്‍ റൈഫിള്‍ ഉപയോഗിച്ച് ഏകദേശം 200 യാര്‍ഡ് അകലെയുള്ള മേല്‍ക്കൂരയില്‍ നിന്ന് വെടിയുതിര്‍ക്കുകയായിരുന്നുവെന്ന് അധികൃതര്‍ പറയുന്നു.
'ഈ വിധവയുടെ നിലവിളി ലോകമെമ്പാടും പ്രതിധ്വനിക്കും': ടേണിംഗ് പോയിന്റ് യുഎസ്എ തുടരുമെന്ന് പ്രതിജ്ഞയുമായി ചാര്‍ളി കിര്‍ക്കിന്റെ ഭാര്യ എറിക്ക ഫ്രാന്റ്സ്വെ
