റായ്പൂര്‍: ഛത്തീസ്ഗഡിലെ ഗരിയബന്ദ് ജില്ലയില്‍ നടന്ന ഓപ്പറേഷനില്‍ മുതിര്‍ന്ന നേതാവ് ഉള്‍പ്പെടെ 10 നക്‌സലുകള്‍ വെടിയേറ്റ് മരിച്ചു. കൊല്ലപ്പെട്ടവരില്‍ മോഡം ബാലകൃഷ്ണ എന്നറിയപ്പെടുന്ന സി സി അംഗം മനോജും ഉള്‍പ്പെടുന്നു. ഇയാളുടെ തലയ്ക്ക് ഒരു കോടി രൂപ ഇനാം പ്രഖ്യാപിച്ചിരുന്നു.
മെയിന്‍പൂര്‍ വനമേഖലയില്‍ നക്‌സല്‍ സാന്നിധ്യമുണ്ടെന്ന ഇന്റലിജന്‍സ് വിവരങ്ങളുടെ അടിസ്ഥാനത്തില്‍ മുതിര്‍ന്ന ഉദ്യോഗസ്ഥരുടെ നിര്‍ദ്ദേശപ്രകാരം ഇ-30, എസ്ടിഎഫ്, കോബ്ര എന്നിവയുടെ സംയുക്ത സംഘങ്ങളാണ് നക്‌സല്‍ വിരുദ്ധ ഓപ്പറേഷന്‍ ആരംഭിച്ചത്. രാവിലെ മുതല്‍ സുരക്ഷാ സേനയും നക്‌സലുകളും തമ്മില്‍ ഇടയ്ക്കിടെ ഏറ്റുമുട്ടലുകള്‍ നടക്കുന്നുണ്ട്. വെടിവയ്പ്പില്‍ നിരവധി മുതിര്‍ന്ന നക്‌സലുകള്‍ കൊല്ലപ്പെട്ടിട്ടുണ്ടാകാമെന്നാണ് പ്രാഥമിക റിപ്പോര്‍ട്ടുകള്‍ സൂചിപ്പിക്കുന്നത്.
ഓപ്പറേഷന്‍ അവസാനിച്ചതിനുശേഷം, ഗ്രൗണ്ട് വെരിഫിക്കേഷന്‍ പൂര്‍ത്തിയായിക്കഴിഞ്ഞാല്‍ വിശദമായ വിവരങ്ങള്‍ പ്രത്യേകം നല്‍കുമെന്ന് അധികൃതര്‍ സ്ഥിരീകരിച്ചു. ഗരിയാബന്ദ് ജില്ലയില്‍ ഇപ്പോള്‍ നടക്കുന്ന നക്‌സല്‍ ഉന്മൂലന കാമ്പെയ്നിന്റെ ഭാഗമാണ് ഈ ഓപ്പറേഷന്‍.