ഡാര്‍ജിലിങ്: ഞായറാഴ്ച രാത്രി റാഞ്ചിയിലേക്ക് പോവുകയായിരുന്ന ബസില്‍ നിന്നു ഡാര്‍ജിലിങ് ജില്ലാ പൊലീസ് 34 സ്ത്രീകളെ പിടികൂടി. മൂന്ന് പേര്‍ ചേര്‍ന്ന് ഇവരെ തമിഴ്നാട്ടിലേക്ക് കൊണ്ടുപോവുകയായിരുന്നുവെന്നാണ് വിവരം.
മനുഷ്യക്കടത്തെന്ന് സംശയിക്കുന്നതായും സംഭവത്തില്‍ മൂന്നു പേരെ അറസ്റ്റ് ചെയ്തതായും പൊലീസ് അറിയിച്ചു.
ചെന്നൈയിലെ വസ്ത്ര വ്യാപാര സ്ഥാപനത്തില്‍ ജോലിക്കെന്നു പറഞ്ഞാണ് ബംഗാളിലെ ദരിദ്രകുടുംബത്തില്‍പ്പെട്ട 34 സ്ത്രീകളെ മൂന്നു പേര്‍ ചേര്‍ന്ന് തമിഴ്നാട്ടിലേക്ക് കടത്താന്‍ ശ്രമിച്ചത്.
റാഞ്ചിയില്‍ നിന്ന് ചെന്നൈയിലേക്ക് പോകുന്ന ട്രെയിനില്‍ കയറേണ്ടതായിരുന്നു സംഘം. ഇതിനുള്ള യാത്രക്കിടെ ബസില്‍ നിരവധി സ്ത്രീകളെ കണ്ട് സംശയം തോന്നിയ ഡാര്‍ജിലിങ് പൊലീസ് ഇവരെ കസ്റ്റഡിയിലെടുക്കുകയായിരുന്നു. സംഭവത്തില്‍ വിശദമായ അന്വേഷണം നടത്തിവരുകയാണെന്ന് പൊലീസ് അറിയിച്ചു.