ലേ: ലഡാക്കിലെ അഞ്ച് പുതിയ ജില്ലകളിലും തെരഞ്ഞെടുക്കപ്പെട്ട പ്രാദേശിക കൗണ്സിലുകള് രൂപീകരിക്കുന്നതിന് നടപടി ആരംഭിച്ചു. ലഡാക്ക് കേന്ദ്രഭരണ പ്രദേശത്തെ ഏഴ് ജില്ലകളിലും ലഡാക്ക് ഓട്ടോണമസ് ഹില് ഡെവലപ്മെന്റ് കൗണ്സിലുകള് രൂപീകരിക്കുന്നതിനുള്ള വിജ്ഞാപനത്തിന് ലഫ്റ്റനന്റ് ഗവര്ണര് വി കെ സക്സേന അനുമതി നല്കി.
ഷാം, നുബ്ര, സന്സ്കാര്, ദ്രാസ്, ചാങ്താങ് എന്നിവയാണ് പുതിയ അഞ്ച് ജില്ലകള്. നിലവില് ലേ, കാര്ഗില് ജില്ലകളില് മാത്രമാണ് തെരഞ്ഞെടുക്കപ്പെട്ട സ്വയംഭരണ ഹില് ഡെവലപ്മെന്റ് കൗണ്സിലുകള് പ്രവര്ത്തിക്കുന്നത്. പുതിയ തീരുമാനത്തോടെ ഏഴ് ജില്ലകളിലേക്കും സംവിധാനം വ്യാപിപ്പിക്കും.
കേന്ദ്രസര്ക്കാര് ജൂലൈ 13ന് ലഡാക്കിലെ ഏഴ് ജില്ലകളിലേക്കും സ്വയംഭരണ ഹില് കൗണ്സില് സംവിധാനം വ്യാപിപ്പിക്കാന് തീരുമാനിച്ചതിനെ തുടര്ന്നാണ് നടപടി.
പുതിയ കൗണ്സിലുകള് നിലവില് വരുന്നതോടെ ലേ, കാര്ഗില് എന്നിവയ്ക്ക് പുറമെ ഷാം, നുബ്ര, ചാങ്താങ്, സന്സ്കാര്, ദ്രാസ് ജില്ലകളിലും ജനപ്രതിനിധികള്ക്ക് വികസന ആസൂത്രണത്തിലും പ്രാദേശിക ഭരണനിര്വഹണത്തിലും കൂടുതല് പങ്കാളിത്തം ലഭിക്കും.
ഇതോടെ ജില്ലാതല വികസന തീരുമാനങ്ങളില് പ്രദേശവാസികളുടെ ആവശ്യങ്ങള്ക്കും അഭിപ്രായങ്ങള്ക്കും കൂടുതല് പ്രാധാന്യം ലഭിക്കുമെന്ന് അധികൃതര് അറിയിച്ചു.
ഈ വര്ഷം അഞ്ച് പുതിയ ജില്ലകള് രൂപീകരിച്ചതോടെ ലഡാക്കിന്റെ ഭരണപരമായ ഭൂപടത്തില് നേരത്തെ തന്നെ മാറ്റം വന്നിരുന്നു. പുതിയ ഭരണഘടകങ്ങളിലേക്കും തെരഞ്ഞെടുക്കപ്പെട്ട തദ്ദേശഭരണ സംവിധാനം വ്യാപിപ്പിക്കുന്നതിലൂടെ ഈ മാറ്റം കൂടുതല് ശക്തമാകുമെന്നാണ് വിലയിരുത്തല്.
കൗണ്സില് തെരഞ്ഞെടുപ്പിനുള്ള നടപടികള് ഉടന് ആരംഭിക്കുമെങ്കിലും തെരഞ്ഞെടുപ്പ് തിയ്യതി ഇതുവരെ പ്രഖ്യാപിച്ചിട്ടില്ല. ലഡാക്ക് ഓട്ടോണമസ് ഹില് ഡെവലപ്മെന്റ് കൗണ്സില്സ് ആക്ട്, 1997-ലെ എട്ടാം വകുപ്പ് പ്രകാരം ഔദ്യോഗിക വിജ്ഞാപനം പുറപ്പെടുവിച്ച ശേഷമായിരിക്കും തെരഞ്ഞെടുപ്പ് നടപടികള് മുന്നോട്ടുപോകുക.
വിജ്ഞാപനം ഔദ്യോഗിക ഗസറ്റില് പ്രസിദ്ധീകരിക്കുന്നതോടെയാണ് പ്രാബല്യത്തില് വരിക.
വിജ്ഞാപനം പുറപ്പെടുവിച്ചതോടെ കൗണ്സില് തെരഞ്ഞെടുപ്പിനുള്ള തയ്യാറെടുപ്പുകള് യഥാസമയം ആരംഭിക്കുമെന്ന് വി കെ സക്സേന സാമൂഹിക മാധ്യമമായ എക്സില് കുറിച്ചു.
ലഡാക്കിന്റെ ചരിത്രത്തിലെ നിര്ണായക ദിവസമാണിതെന്ന് സക്സേന വിശേഷിപ്പിച്ചു. അധികാരം വികേന്ദ്രീകരിക്കാനും പ്രാദേശിക സ്ഥാപനങ്ങളെ ശക്തിപ്പെടുത്താനും ദീര്ഘകാലമായി ഉയര്ന്നുവരുന്ന ജനകീയ ആവശ്യങ്ങള്ക്ക് പരിഹാരം കാണാനും നടപടി സഹായിക്കുമെന്ന് അദ്ദേഹം പറഞ്ഞു.
ഏഴ് ജില്ലകളിലും സ്വയംഭരണ ഹില് ഡെവലപ്മെന്റ് കൗണ്സിലുകള് നിലവില് വരുന്നത് ലഡാക്കിലെ താഴെത്തട്ടിലുള്ള ഭരണസംവിധാനത്തിന് വലിയ മുന്നേറ്റമാണെന്നും അദ്ദേഹം വ്യക്തമാക്കി.
പ്രദേശത്തിന്റെ വികസനത്തിന്റെയും പുരോഗതിയുടെയും ദിശ നിര്ണയിക്കുന്നതില് പ്രദേശവാസികള്ക്ക് കൂടുതല് പങ്കാളിത്തം നല്കുകയാണ് ലക്ഷ്യമെന്നും സക്സേന പറഞ്ഞു.
നിലവില് ലഡാക്കിന് സ്വന്തം നിയമസഭയില്ല. ഇതുവരെ ലേ, കാര്ഗില് ജില്ലകളില് മാത്രമാണ് പ്രവര്ത്തനക്ഷമമായ സ്വയംഭരണ ഹില് കൗണ്സിലുകള് ഉണ്ടായിരുന്നത്.
പുതിയ അഞ്ച് ജില്ലകളിലേക്കും കൗണ്സില് സംവിധാനം വ്യാപിപ്പിക്കുന്നതോടെ ലഡാക്കിലെ പ്രാദേശിക ഭരണത്തില് ജനപ്രതിനിധികളുടെ പങ്കാളിത്തം ഗണ്യമായി വര്ധിക്കുമെന്നാണ് പ്രതീക്ഷിക്കുന്നത്. ഉള്ക്കൊള്ളുന്ന വികസനത്തിനും പ്രാദേശിക ആവശ്യങ്ങള്ക്കനുസരിച്ചുള്ള ആസൂത്രണത്തിനും പുതിയ സംവിധാനം കൂടുതല് അവസരമൊരുക്കുമെന്നും അധികൃതര് വ്യക്തമാക്കി.