ജയ്പൂര്: മുന് ഉപരാഷ്ട്രപതി ജഗദീപ് ധന്കര് രാജസ്ഥാനില് എംഎല്എ പെന്ഷന് പുന:സ്ഥാപിക്കാന്
അപേക്ഷ നല്കി. ഉപരാഷ്ട്രപതി സ്ഥാനം രാജിവച്ച് ഒരു മാസം പിന്നിടുമ്പോഴാണ് 1998 വരെ നിയമസഭാംഗമായിരുന്നതിന്റെ പെന്ഷന് പുന:സ്ഥാപിക്കാന് അപേക്ഷ നല്കിയത്. 35000 രൂപയാണു രാജസ്ഥാനിലെ എംഎല്എ പെന്ഷന്. 1993 ല് അജ്മീറിലെ കിഷന്ഗഡ് നിയോജകമണ്ഡലത്തില് നിന്ന് കോണ്ഗ്രസ് സ്ഥാനാര്ഥിയായാണ് ധന്കര് രാജസ്ഥാന് നിയമസഭയിലെത്തിയത്.
ധന്കറിന് 2019 വരെ പെന്ഷന് ലഭിച്ചിരുന്നു. പശ്ചിമ ബംഗാള് ഗവര്ണറായതോടെ പെന്ഷന് നിര്ത്തുകയായിരുന്നു. പിന്നീടദ്ദേഹം ഉപരാഷ്ട്രപതിയുമായി. ആരോഗ്യപ്രശ്നങ്ങള് ചൂണ്ടിക്കാട്ടി ജൂലായ് 21നാണ് ധന്കര് ഉപരാഷ്ട്രപതി സ്ഥാനം രാജിവെച്ചത്.
70 വയസിനു മുകളിലുള്ളവര്ക്ക് 20 ശതമാനം അധിക പെന്ഷന് അര്ഹതയുണ്ട്. ധന്കറിന് 74 വയസായതിനാല് 42,000 രൂപ പ്രതിമാസ പെന്ഷനായി ലഭിക്കും. 80 പിന്നിടുമ്പോള് 30 ശതമാനം പെന്ഷന് ലഭിക്കും. ധന്കറിന്റെ അപേക്ഷ ലഭിച്ചിട്ടുണ്ടെന്നും ആവശ്യമായ നടപടികള് പുരോഗമിക്കുകയാണെന്നും സ്പീക്കര് വാസുദേവ് ദേവ്നാനി പറഞ്ഞു.