ന്യൂഡല്ഹി: കേന്ദ്ര വിദ്യാഭ്യാസ മന്ത്രി ധര്മേന്ദ്ര പ്രധാന്റെ രാജി രാഷ്ട്രപതി ദ്രൗപദി മുര്മു അംഗീകരിച്ചു. വിദ്യാഭ്യാസ മന്ത്രാലയത്തിന്റെ അധിക ചുമതല കേന്ദ്ര കാബിനറ്റ് മന്ത്രി പ്രഹ്ലാദ് ജോഷിക്ക് നല്കിയതായി രാഷ്ട്രപതി ഭവന് പുറത്തിറക്കിയ ഔദ്യോഗിക പ്രസ്താവനയില് അറിയിച്ചു.
നിലവില് ഉപഭോക്തൃകാര്യ, ഭക്ഷ്യ- പൊതു വിതരണ മന്ത്രാലയത്തിന്റെയും നവ- പുനരുപയോഗ ഊര്ജ മന്ത്രാലയത്തിന്റെയും കേന്ദ്രമന്ത്രിയായാണ് പ്രഹ്ലാദ് ജോഷി പ്രവര്ത്തിക്കുന്നത്.
രാഷ്ട്രപതി ഭവന്റെ പ്രസ്താവനയില് പറയുന്നതനുസരിച്ച്, പ്രധാനമന്ത്രി നരേന്ദ്ര മോഡിയുടെ ഉപദേശപ്രകാരം ഇന്ത്യന് ഭരണഘടനയുടെ 75-ാം അനുച്ഛേദത്തിലെ (2)ാം ഉപവകുപ്പ് പ്രകാരം ധര്മേന്ദ്ര പ്രധാന്റെ രാജി ഉടന് പ്രാബല്യത്തില് വരുന്നതായി രാഷ്ട്രപതി അംഗീകരിച്ചു.
അതോടൊപ്പം, പ്രധാനമന്ത്രിയുടെ ശുപാര്ശ പ്രകാരം നിലവിലുള്ള വകുപ്പുകള്ക്ക് പുറമെ വിദ്യാഭ്യാസ മന്ത്രാലയത്തിന്റെ അധിക ചുമതലയും പ്രഹ്ലാദ് ജോഷിക്ക് നല്കാന് രാഷ്ട്രപതി നിര്ദേശിച്ചതായും പ്രസ്താവനയില് വ്യക്തമാക്കി.