ക്വാലാലംപൂര്‍: പ്രഥമ അണ്ടര്‍ 19 വനിതാ ഏഷ്യാ കപ്പ് ട്വന്റി-20 കിരീടം ഇന്ത്യയ്ക്ക്. ബയ്യൂമാസ് ഓവലില്‍ നടന്ന മത്സരത്തില്‍ 41 റണ്‍സിന് ബംഗ്ലാദേശിനെ പരാജയപ്പെടുത്തിയാണ് ഇന്ത്യ ജേതാക്കളായത്.
ആദ്യം ബാറ്റ് ചെയ്ത ഇന്ത്യ 20 ഓവറില്‍ 117 റണ്‍സ് നേടി. 52 റണ്‍സെടുത്ത ഓപ്പണര്‍ ഗോംഗാദി തൃഷയാണ് ഇന്ത്യയുടെ ടോപ് സ്‌കോറര്‍. ക്യാപ്റ്റന്‍ നിക്കി പ്രസാദ് (12), മിഥില വിനോദ് (17), ആയുഷി ശുക്ല (10) എന്നിവര്‍ക്ക് പുറമേ മറ്റാര്‍ക്കും രണ്ടക്കം കടക്കാനായില്ല. ഇതോടെ ഇന്ത്യ 117 എന്ന സ്‌കോറിലേക്ക് ചുരുങ്ങി.
ബംഗ്ലാദേശിന് വേണ്ടി നാലു വിക്കറ്റ് വീഴ്ത്തിയ ഫര്‍ജാന ഈസ്മിനാണ് ഇന്ത്യന്‍ ബാറ്റിങ് നിരയെ പിടിച്ചുകെട്ടിയത്. മറുപടി ബാറ്റിങ്ങിനിറങ്ങിയ ബംഗ്ലാദേശിനെ ഇന്ത്യ 76 റണ്‍സില്‍ പുറത്താക്കി. ഇന്ത്യക്ക് വേണ്ടി 17 റണ്‍സ് മാത്രം വഴങ്ങി മൂന്ന് വിക്കറ്റ് നേടിയ ആയുഷി ശുക്ലയും രണ്ടുവിക്കറ്റ് വീതം വീഴ്ത്തിയ പരുണിയ സിസോദിയയും സോനം യാദവുമാണ് ബംഗ്ലാദേശിനെ തകര്‍ത്തത്.