ശ്രീനഗര്‍: ജമ്മു കശ്മീരിലെ ബുഡ്ഗാമില്‍ 35 വര്‍ഷമായി തകര്‍ന്നുകിടക്കുന്ന ശാരദ ഭവാനി ക്ഷേത്രത്തില്‍ കശ്മീരി പണ്ഡിറ്റുകള്‍ വീണ്ടും ആരാധന തുടങ്ങി. ക്ഷേത്രം നിലനിന്നിടത്ത് ശിവലിംഗം സ്ഥാപിച്ചാണ് ആരാധന തുടങ്ങിയത്. പുതിയ ക്ഷേത്രം നിര്‍മിക്കാന്‍ ജില്ലാ അധികൃതരുടെ സഹായം തേടിയിട്ടുണ്ട്.
1990കളില്‍ കശ്മീരി പണ്ഡിറ്റ് കുടുംബങ്ങള്‍ പലായനം ചെയ്യാന്‍ നിര്‍ബന്ധിതരായപ്പോള്‍ ഉപേക്ഷിക്കപ്പെട്ടതാണ് ഇച്ച്കൂട് ഗ്രാമത്തിലെ ക്ഷേത്രം. സമീപകാലത്ത് പ്രധാനമന്ത്രിയുടെ പാക്കേജിനു കീഴില്‍ ജോലി ലഭിച്ചവരുള്‍പ്പെടെ കശ്മീരി പണ്ഡിറ്റുകളാണു ക്ഷേത്രത്തിന്റെ പുനഃസ്ഥാപനത്തിനു മുന്‍കൈയെടുത്തത്. പ്രദേശത്തെ മുസ്ലിം സമൂഹവും ഇവരെ സ്വാഗതം ചെയ്തു.
ക്ഷേത്രം നിലനിന്നിടം കാടുമൂടിയ അവസ്ഥയിലായിരുന്നു. ഇതു വെട്ടിത്തെളിച്ച് വൃത്തിയാക്കിയപ്പോള്‍ ലഭിച്ച ശിവലിംഗത്തിന്റെ പ്രാണപ്രതിഷ്ഠ കഴിഞ്ഞ ദിവസം നിര്‍വഹിച്ചു. പാക്കിസ്ഥാനിലെ ശാരദ മാതാ ക്ഷേത്രത്തിന്റെ ശാഖയാണിതെന്നു ബുഡ്ഗാമിലെ ശാരദ ആസ്ഥാപന സമൂഹത്തിന്റെ അധ്യക്ഷന്‍ സുനില്‍കുമാര്‍ ഭട്ട് പറഞ്ഞു.
ക്ഷേത്ര നിര്‍മാണത്തിനു പ്രദേശത്തെ മുസ്ലിം സമൂഹത്തിന്റേയും പിന്തുണയുണ്ടെന്നു പറഞ്ഞ സുനില്‍ കുമാര്‍ തുടക്കമിടുമ്പോള്‍ തങ്ങള്‍ നാലു പേര്‍ മാത്രമേയുണ്ടായിരുന്നുള്ളൂ എന്നു കൂട്ടിച്ചേര്‍ത്തു. ഇപ്പോള്‍ വലിയൊരു സമൂഹത്തിന്റെ പിന്തുണയുണ്ടെന്നും അദ്ദേഹം.
പണ്ഡിറ്റ് സമൂഹത്തിന്റെ തിരിച്ചുവരവ് സന്തോഷം നല്‍കുന്നതാണെന്നു പ്രദേശത്തെ മുതിര്‍ന്ന മുസ്ലിം കുടുംബാംഗം പറഞ്ഞു.