പാലക്കാട്: തമിഴ്‌നാട്ടില്‍ നിന്നു കേരളത്തിലേക്ക് കടത്താന്‍ ശ്രമിച്ച വന്‍ തോതിലുള്ള സ്‌ഫോടകശേഖരം വാളയാര്‍ പൊലീസ് പിടികൂടി. 25,000 ജലാറ്റിന്‍ സ്റ്റിക്കുകളും 1,500 ഡിറ്റണേറ്ററുകളുമാണ് പിടിച്ചെടുത്തത്. പച്ചക്കറി ലോറിയില്‍ കടത്തുകയായിരുന്ന സ്‌ഫോടകവസ്തുക്കള്‍ രഹസ്യവിവരം ലഭിച്ചതിനെ തുടര്‍ന്ന് വാളയാര്‍ വട്ടപ്പാറയില്‍ പൊലീസ് നടത്തിയ പരിശോധനയില്‍ പിടിച്ചെടുക്കുകയായിരുന്നു.
സംഭവത്തില്‍ ലോറി ഡ്രൈവര്‍ തമിഴ്‌നാട് സ്വദേശി മണികണ്ഠനെ അറസ്റ്റ് ചെയ്തു. ഇയാളുടെ മൊഴി പ്രകാരം കേരളത്തിലെ മുൂന്ന് ജില്ലകളിലെ ക്വാറികളിലേക്കാണ് കൊണ്ടുവന്നത്. മലപ്പുറം, പാലക്കാട്, തൃശൂര്‍ ജില്ലകളിലേക്ക് വേണ്ടിയാണ് സ്‌ഫോടകവസ്തുക്കള്‍ എത്തിച്ചതെന്നാണ് പൊലീസ് സംശയിക്കുന്നത്. അന്വേഷണം കൂടുതല്‍ വിപുലമാക്കാനാണ് പൊലീസ് നീക്കം. ഇതുമായി ബന്ധപ്പെട്ട് കേരളത്തിലെ ക്വാറി ഉടമകളെയും ചോദ്യം ചെയ്‌തേക്കും.