തിരുവനന്തപുരം: സംസ്ഥാനത്തിന്റെ സാമ്പത്തിക സ്ഥിതി വിശദമാക്കുന്ന ധവളപത്രം ഇന്ന് നിയമസഭയില് അവതരിപ്പിക്കും. ധനവകുപ്പിന്റെ ചുമതല വഹിക്കുന്ന മുഖ്യമന്ത്രി വി.ഡി സതീശനാണ് ധവളപത്രം നിയമസഭയുടെ മേശപ്പുറത്ത് വയ്ക്കുക. ഇന്ന് രാവിലെ ചേരുന്ന മന്ത്രിസഭായോഗത്തില് ധവളപത്രം വിശദമായി ചര്ച്ച ചെയ്യും. സര്ക്കാര് ഖജനാവിന്റെ ഇപ്പോഴത്തെ കൃത്യമായ അവസ്ഥ വ്യക്തമാക്കുന്നതാവും ധവളപത്രം.
കഴിഞ്ഞ പത്തുവര്ഷത്തെ സര്ക്കാരിന്റെ വരുമാന ചോര്ച്ചയും ധൂര്ത്തും ധവളപത്രത്തില് ഇടംപിടിക്കുമെന്നാണ് സൂചന. കിഫ്ബി ഉണ്ടാക്കിയ സാമ്പത്തിക ബാദ്ധ്യത, നികുതി പിരിവിലെ പ്രശ്നങ്ങള്, കേന്ദ്രത്തില് നിന്ന് പല ഇനങ്ങളിലായി ലഭിച്ചിട്ടുള്ള തുക, ഇതിന്റെ ചെലവഴിക്കല്, വകമാറ്റി ചെലവഴിക്കല് തുടങ്ങിയ കാര്യങ്ങളും വിശദമായി പ്രതിപാദിച്ചേക്കും.
സംസ്ഥാനത്തിന്റെ നിലവിലെ സമ്പദ് വ്യവസ്ഥയെക്കുറിച്ച് വിസ്മയിപ്പിക്കുന്ന ധവളപത്രം വരുന്നുണ്ടെന്നും അതില് കഴിഞ്ഞ സര്ക്കാരിന്റെ കാലത്തെ സാമ്പത്തിക വീഴ്ചകള്ക്കുള്ള കൃത്യമായ മറുപടിയുണ്ടാകുമെന്നും മുഖ്യമന്ത്രി വി.ഡി.സതീശന് സഭയില് പ്രഖ്യാപിച്ചിരുന്നു. കേന്ദ്രത്തില് നിന്ന് മുമ്പ് എന്ത് കിട്ടി, ഇപ്പോള് എന്ത് കിട്ടുന്നില്ല എന്നതിനെക്കുറിച്ചെല്ലാം ധവളപത്രത്തില് വ്യക്തമാക്കുമെന്നും മുഖ്യമന്ത്രി സൂചിപ്പിച്ചിരുന്നു.
എന്നാല് ധവളപത്രം എന്ന ഉമ്മാക്കി കാണിച്ച് തങ്ങളുടെ വായടപ്പിക്കാന് നോക്കേണ്ടെന്നാണ് പ്രതിപക്ഷ നേതാവ് പിണറായി വിജയന് അഭിപ്രായപ്പെട്ടത്. ധവളപത്രം വരുമ്പോള് അതിന് പറയേണ്ട മറുപടി ആ ഘട്ടത്തില് കൃത്യമായി പറയുമെന്നും പിണറായി വിജയന് വ്യക്തമാക്കി. ഗവര്ണറുടെ നയപ്രഖ്യാപനത്തിനുള്ള നന്ദിപ്രമേയ ചര്ച്ചയും ഇന്ന് അവസാനിക്കും. നന്ദിപ്രമേയ ചര്ച്ചയ്ക്ക് മുഖ്യമന്ത്രി വി.ഡി.സതീശന് മറുപടി പറയും.
സംസ്ഥാന ഖജനാവ് പൂച്ച പെറ്റ അവസ്ഥയിലോ? ധവളപത്രം ഇന്ന് നിയമസഭയിൽ
