വാഷിംഗ്ടണ്‍: കണ്‍സള്‍ട്ടിംഗ് സേവനങ്ങള്‍ക്കായി യുഎസ് സര്‍ക്കാര്‍ പ്രതിവര്‍ഷം കോടിക്കണക്കിന് ഡോളര്‍ ചെലവഴിക്കുന്നതായി ഗവണ്‍മെന്റ് എഫിഷ്യന്‍സി വകുപ്പ് (ഡോജ്) പരിശോധനയില്‍ കണ്ടെത്തി.
വന്‍കിട കമ്പനികള്‍ സൂക്ഷ്മപരിശോധനയില്‍
സര്‍ക്കാരിലെ മാലിന്യം കുറയ്ക്കുന്നതിനും കാര്യക്ഷമത വര്‍ദ്ധിപ്പിക്കുന്നതിനുമുള്ള ഡോജ് ഉത്തരവിന്റെ ഭാഗമായി, ഡെലോയിറ്റ്, ആക്‌സെഞ്ചര്‍ ഫെഡറല്‍ സര്‍വീസസ്, ബൂസ് അലന്‍ ഹാമില്‍ട്ടണ്‍, ജനറല്‍ ഡൈനാമിക്‌സ്, ലീഡോസ്, ഗൈഡ്ഹൗസ്, എച്ച്‌ഐഐ മിഷന്‍ ടെക്‌നോളജീസ്, സയന്‍സ് ആപ്ലിക്കേഷന്‍സ് ഇന്റര്‍നാഷണല്‍, സിജിഐ ഫെഡറല്‍, ഐബിഎം എന്നിവയുള്‍പ്പെടെ 10 പ്രമുഖ കണ്‍സള്‍ട്ടിംഗ് കമ്പനികളുമായുള്ള ഫെഡറല്‍ കരാറുകളുടെ പരിശോധന ആരംഭിച്ചതായി ബിസിനസ് ഇന്‍സൈഡര്‍ റിപ്പോര്‍ട്ട് ചെയ്തു.
ബൂസ് അലന്‍ ഹാമില്‍ട്ടണ്‍ പോലുള്ള ചില കമ്പനികള്‍ക്ക് അവരുടെ 10.7 ബില്യണ്‍ ഡോളറിന്റെ ഏതാണ്ട് മുഴുവന്‍ വരുമാനവും സര്‍ക്കാര്‍ കരാറുകളില്‍ നിന്നാണ് ലഭിക്കുന്നതെന്ന് റിപ്പോര്‍ട്ട് പറയുന്നു. എന്നാല്‍ ഡോജ് പരിശോധനകള്‍ ആരംഭിച്ചതോടെ , ഈ കണ്‍സള്‍ട്ടിംഗ് വകുപ്പുകളിലെ ജീവനക്കാര്‍ തൊഴില്‍ നഷ്ടം ഉള്‍പ്പെടെയുള്ള ഭീമാകാരമായ തടസ്സങ്ങള്‍ നേരിടുമെന്ന ആശങ്കയിലാണെന്ന് ബിസിനസ് ഇന്‍സൈഡര്‍ പറയുന്നു. ഡെലോയിറ്റ് യുഎസിന് ഫെഡറല്‍ ഏജന്‍സി കരാറുകള്‍ വഴി പ്രതിവര്‍ഷം 3.3 ബില്യണ്‍ ഡോളര്‍ ലഭിക്കുന്നുണ്ട്. ഇത് അവരുടെ ഏറ്റവും പുതിയ വാര്‍ഷിക വരുമാനത്തിന്റെ ഏകദേശം 9.6% വരുമെന്ന് ബിസിനസ് ഇന്‍സൈഡര്‍ റിപ്പോര്‍ട്ട് ചെയ്യുന്നു.
കരാറുകള്‍ എന്തിന് ? ഫെഡറല്‍ ഏജന്‍സികള്‍ വിശദീകരിക്കണം
ഫെഡറല്‍ സംഭരണത്തിന്റെ പ്രധാന ശാഖയായ ജനറല്‍ സര്‍വീസസ് അഡ്മിനിസ്‌ട്രേഷന്‍ (ജിഎസ്എ), ഈ കമ്പനികളുമായുള്ള നിലവിലുള്ള കരാറുകള്‍ സൂക്ഷ്മമായി പരിശോധിച്ച് പ്രതിരോധിക്കാന്‍ ഫെഡറല്‍ ഏജന്‍സികളോട് അഭ്യര്‍ത്ഥിച്ചിട്ടുണ്ടെന്ന് ബിസിനസ് ഇന്‍സൈഡര്‍ റിപ്പോര്‍ട്ട് ചെയ്തു. ഏതൊക്കെ കരാറുകളാണ് നിര്‍ണായകമെന്നും ഏതൊക്കെയാണ് ഇല്ലാതാക്കാന്‍ കഴിയുകയെന്നും വെള്ളിയാഴ്ചയോടെ ഒരു പട്ടിക തയ്യാറാക്കാന്‍ ഏജന്‍സികള്‍ക്ക് നിര്‍ദ്ദേശം നല്‍കിയിട്ടുണ്ടെന്നാണ് റിപ്പോര്‍ട്ടില്‍ പറയുന്നത്. പാഴ് ചെലവുകള്‍ ഇല്ലാതാക്കുന്നതിനുള്ള ട്രംപ് ഭരണകൂടത്തിന്റെ മൊത്തത്തിലുള്ള പദ്ധതിയുടെ ഭാഗമാണിത്.
അനിശ്ചിതത്വം കണ്‍സള്‍ട്ടിംഗ് തൊഴിലാളികളെ ബാധിക്കുന്നു
പുതിയപരിശോധനാ നടപടികള്‍ ആരംഭിച്ചതോടെ ആക്‌സെഞ്ചര്‍, ഡെലോയിറ്റ് പോലുള്ള കമ്പനികളിലെ ജീവനക്കാര്‍ സമ്മര്‍ദ്ദത്തിലാണ്. സര്‍ക്കാര്‍ കരാറുകളില്‍ അവര്‍ നല്‍കുന്ന മൂല്യം എന്തെന്ന് തിരിച്ചറിയുന്നതിനായി ഈ കമ്പനികള്‍ തീവ്രമായ പരിശോധനയ്ക്ക് വിധേയമാകുന്നതിനാല്‍, തങ്ങളുടെ ജോലികള്‍ കൂടുതല്‍ അരക്ഷിതാവസ്ഥയിലാകുകയാണെന്നും തൊഴില്‍ നഷ്ടപ്പെടാനുള്ള സാധ്യത വര്‍ധിച്ചെന്നും ജീവനക്കാര്‍ പറഞ്ഞതായി ബിസിനസ് ഇന്‍സൈഡര്‍ റിപ്പോര്‍ട്ട് ചെയ്തു. കൂടുതല്‍ പേര്‍ ഒഴിവാക്കപ്പെടുമെന്നും ജീവനക്കാര്‍ക്ക് ആശങ്കയുണ്ട്.
യുഎസ് ഗവണ്‍മെന്റ് കരാറുകളില്‍ നിന്ന് വരുമാനത്തിന്റെ ഒരു പ്രധാന ശതമാനം ലഭിക്കുന്ന ഡെലോയിറ്റിനെയും ഇത് ബാധിക്കുന്നു. ഗവണ്‍മെന്റ് & പബ്ലിക് സര്‍വീസസ് മേഖലയിലെ തൊഴിലാളികള്‍ക്കിടയില്‍ സമ്മര്‍ദ്ദകരമായ ഒരുഅന്തരീക്ഷമുള്ളതായി റിപ്പോര്‍ട്ട് ചെയ്തിട്ടുണ്ട്. പ്രോജക്ടുകള്‍ പിന്‍വലിക്കുകയും പുതിയ ജോലികള്‍ കുറയുകയും ചെയ്യുന്നു. 'അപേക്ഷിക്കാന്‍ യഥാര്‍ത്ഥത്തില്‍ ധാരാളം ജോലികള്‍ ലഭ്യമല്ല ' എന്ന് തൊഴിലാളികള്‍ പറഞ്ഞു.
കണ്‍സള്‍ട്ടന്റുകളുടെ മൂല്യം വിശകലനം ചെയ്യുന്നു
ഫെഡറല്‍ പ്രവര്‍ത്തനങ്ങള്‍ക്ക് നല്‍കുന്ന യഥാര്‍ത്ഥ മൂല്യമുള്ള കണ്‍സള്‍ട്ടന്റുകളെ തിരിച്ചറിയ.ുക എന്നതാണ് ഗവണ്‍മെന്റ് കരാറുകളെപ്പറ്റിയുള്ള ഡോജ്-ന്റെ പരിശോധന. പവര്‍പോയിന്റ് സ്ലൈഡുകള്‍ നിര്‍മ്മിക്കുക, മീറ്റിംഗുകളുടെ മിനിറ്റ്‌സ് എടുക്കുക തുടങ്ങിയ ജോലികള്‍ക്കായി ഫണ്ട് പാഴാക്കുന്നതിനെ വെറ്ററന്‍സ് അഫയേഴ്‌സ് വകുപ്പ് സെക്രട്ടറി ഡഗ് കോളിന്‍സ് അപലപിച്ചു. കരാറുകളില്‍ 2 ബില്യണ്‍ ഡോളര്‍ വെട്ടിക്കുറയ്ക്കുകയാണെന്ന് അദ്ദേഹം പറഞ്ഞതായി ബിസിനസ് ഇന്‍സൈഡര്‍ റിപ്പോര്‍ട്ട് ചെയ്തു.
ഡോജ് പരിശോധനയില്‍ കോടികളുടെ സര്‍ക്കാര്‍ കണ്‍സള്‍ട്ടിംഗ് കരാറുകള്‍ കണ്ടെത്തി; ബിഗ് ഫോര്‍ അക്കൗണ്ടിംഗ് സ്ഥാപനങ്ങളിലെ ആറക്ക ശമ്പളക്കാര്‍ കൂട്ട പിരിച്ചുവിടല്‍ പേടിയില്‍
