വാഷിംഗ്ടൺ: യുഎസിലെ ഏറ്റവും കൂടുതൽ ജനസംഖ്യയുള്ള സംസ്ഥാനമായ കാലിഫോർണിയയിൽ ദീപാവലി ഔദ്യോഗിക അവധി ദിനമായി പ്രഖ്യാപിച്ചു. ഇതുസംബന്ധിച്ച ബില്ലിൽ ഗവർണർ ഗാവിൻ ന്യൂസം ഒപ്പുവെച്ചു. ബില്ല് 2026 ജനുവരി ഒന്നുമുതൽ പ്രാബല്യത്തിൽ വരും. ഇതോടെ അടുത്ത വർഷത്തെ ദീപാവലി ദിവസം പൊതു വിദ്യാലയങ്ങൾക്കും കമ്മ്യൂണിറ്റി കോളേജുകൾക്കും അവധി പ്രഖ്യാപിക്കാൻ കഴിയും. സർക്കാർ ജീവനക്കാർക്കും അവധിയെടുക്കാനാകും.
കാലിഫോർണിയ അസംബ്ലിയിലെ ഡെമോക്രാറ്റിക് അംഗങ്ങളായ ആഷ് കൽറ, ഡോ. ദർശന പട്ടേൽ എന്നിവരാണ് ബില്ലിന് പിന്നിൽ പ്രവർത്തിച്ചത്. ഇരുവരും ചേർന്ന് അവതരിപ്പിച്ച 'അസംബ്ലി ബിൽ 268' ജൂണിൽ അംഗീകാരം നേടിയിരുന്നു.
2025ലെ കണക്കുകൾ പ്രകാരം, യുഎസിലെ 4.9 ദശലക്ഷം ഇന്ത്യൻ ജനസംഖ്യയിൽ 9,60,000 പേർ (20 ശതമാനം) കാലിഫോർണിയയിലാണ് താമസിക്കുന്നത്. ദീപാവലി ദിവസം അവധി പ്രഖ്യാപിക്കണമെന്ന ആവശ്യവുമായി ഹിന്ദു അമേരിക്കൻ ഫൗണ്ടേഷൻ, കൊയലേഷൻ ഓഫ് ഹിന്ദൂസ് ഇൻ നോർത്ത് അമേരിക്ക തുടങ്ങിയ ഹിന്ദു അമേരിക്കൻ സംഘടനകൾ രംഗത്തുവന്നിരുന്നു.
അതേസമയം ഗവർണർ ഗാവിൻ ന്യൂസമിന് നന്ദിയറിയിച്ച് ഇന്ത്യൻ വംശജരും ഹിന്ദു സമൂഹങ്ങളും സമൂഹമാധ്യമങ്ങളിലൂടെ രംഗത്തെത്തി. ഈ പ്രധാന ഉത്സവത്തെ അംഗീകരിച്ചതിന് ഗവർണറോട് നന്ദി പറയുന്നതായി കാലിഫോർണിയയിലെ ഹിന്ദുക്കളുടെ കൂട്ടായ്മയായ കൊയലേഷൻ ഓഫ് ഹിന്ദൂസ് ഓഫ് നോർത്ത് അമേരിക്ക എക്സിൽ പോസ്റ്റ് ചെയ്തു. ബില്ലിന് പിന്നിൽ പ്രവർത്തിച്ച അസംബ്ലി അംഗങ്ങളായ ഡോ. ദർശന പട്ടേലിനും ആഷ് കൽറയ്ക്കും സംഘടന അഭിനന്ദനങ്ങൾ നേർന്നു.
ഇന്ത്യൻ അമേരിക്കൻ സമൂഹത്തിനിത് അഭിമാനകരമായ നിമിഷമാണെന്ന് ഇന്ത്യൻ അമേരിക്കൻ അഡ്വക്കസി കൗൺസിൽ പറഞ്ഞു. ആഷ് കൽറയ്ക്കും ഡോ. ദർശന പട്ടേലിനും ഹിന്ദു അമേരിക്കൻ ഫൗണ്ടേഷൻ നന്ദി അറിയിച്ചു. അഭിനന്ദനങ്ങളുമായി വിശ്വ ഹിന്ദു പരിഷത്ത് ഓഫ് അമേരിക്കയും രംഗത്തെത്തി.
ആരാണ് ആഷ് കൽറയും ഡോ. ദർശന പട്ടേലും
സാൻ ജോസിലെ ഡെമോക്രാറ്റിക് അസംബ്ലി അംഗമായ ആഷ് കൽറ കാലിഫോർണിയ അസംബ്ലിയുടെ ചരിത്രത്തിലെ ആദ്യത്തെ ഇന്ത്യൻ അമേരിക്കൻ അംഗമാണ്. കൂടാതെ, സഭയിലെ ആദ്യത്തെ ഹിന്ദു അംഗവുമാണ്. നിലവിൽ കനേഡിയൻ വംശജനായ ഏക വ്യക്തിയും ഇദ്ദേഹമാണ്. സാൻ ജോസിൽ വളർന്ന ഇദ്ദേഹം 2016 നവംബറിലെ തെരഞ്ഞെടുപ്പിൽ അസംബ്ലി ഡിസ്ട്രിക്റ്റ് 25ന്റെ പ്രതിനിധിയായി. 2022 നവംബറിൽ നാലാം തവണയും ഇദ്ദേഹം തെരഞ്ഞെടുക്കപ്പെട്ടു. ടൊറന്റോയിൽ ജനിച്ച ആഷ് കൽറയുടെ മാതാപിതാക്കൾ ഇന്ത്യക്കാരാണ്.
വടക്കൻ സാൻ ഡിയേഗോ കൗണ്ടിയിലെ 76-ാം അസംബ്ലി ഡിസ്ട്രിക്റ്റിന്റെ പ്രതിനിധിയായ ഡോ. ദർശന പട്ടേൽ ഗവേഷണ ശാസ്ത്രജ്ഞയും സ്കൂൾ ബോർഡ് പ്രസിഡൻ്റുമാണ്. ഇന്ത്യൻ കുടിയേറ്റക്കാരുടെ മകളായ ഇവർ കൗമാരക്കാരിയായിരിക്കുമ്പോൾ കാലിഫോർണിയയിലേക്ക് താമസം മാറി. 2024 നവംബറിൽ വടക്കൻ സാൻ ഡിയേഗോ കൗണ്ടിയിലെ 76-ാം അസംബ്ലി ഡിസ്ട്രിക്റ്റിന്റെ പ്രതിനിധിയായി. കാലിഫോർണിയ അസംബ്ലിയിലെ ആദ്യ ഹിന്ദു വനിതയാണ് ഇവർ.
യുഎസിലെ മൂന്നാമത്തെ സംസ്ഥാനം
അതേസമയം ദീപാവലി ദിവസം അവധി പ്രഖ്യാപിക്കുന്ന മൂന്നാമത്തെ യുഎസ് സംസ്ഥാനമാണ് കാലിഫോർണിയ. 2024ൽ പെൻസിൽവേനിയയാണ് ദീപാവലി സംസ്ഥാന അവധിയാക്കിയ ആദ്യ യുഎസ് സംസ്ഥാനം. ഈ വർഷം ആദ്യം കണക്റ്റിക്കട്ടും ഇത് നടപ്പിലാക്കി. ഈ വർഷം ഒക്ടോബർ 20നാണ് ദീപാവലി വരുന്നത്.