വാഷിംഗ്ടണ്‍: വന്‍കിട ടെക് കമ്പനികളെ തൊഴില്‍ അധിഷ്ഠിത ഗ്രീന്‍ കാര്‍ഡ് നടപടിക്രമത്തില്‍നിന്ന് സസ്പെന്‍ഡ് ചെയ്ത ട്രംപ് ഭരണകൂടത്തിന്റെ തീരുമാനത്തെ ന്യായീകരിച്ച് യു എസ് വൈസ് പ്രസിഡന്റ് ജെ ഡി വാന്‍സ്. വിമര്‍ശകര്‍ വന്‍കിട കോര്‍പറേറ്റുകള്‍ക്ക് 'വിലകുറഞ്ഞ തൊഴിലാളികളുടെ അനന്തമായ ഒഴുക്ക്' ഉറപ്പാക്കാനാണ് ശ്രമിക്കുന്നതെന്ന് അദ്ദേഹം ആരോപിച്ചു. അമേരിക്കയില്‍ സ്ഥിരതാമസാനുമതി തേടുന്ന ആയിരക്കണക്കിന് ഇന്ത്യന്‍ പ്രൊഫഷണലുകളെയും ഇന്ത്യന്‍ ഐ ടി കമ്പനികളെയും നേരിട്ട് ബാധിക്കാവുന്ന നടപടിയാണിത്.
എക്സില്‍ പങ്കുവെച്ച കുറിപ്പിലാണ് ഡെമോക്രാറ്റിക് കോണ്‍ഗ്രസ് അംഗം പ്രമീള ജയ്പാലിന്റെ വിമര്‍ശനത്തിന് വാന്‍സ് മറുപടി നല്‍കിയത്. തൊഴില്‍ അധിഷ്ഠിത ഗ്രീന്‍ കാര്‍ഡ് നടപടിക്രമത്തിലെ നിര്‍ണായക ഘട്ടമായ പെര്‍മനന്റ് ലേബര്‍ സര്‍ട്ടിഫിക്കേഷന്‍ (പെര്‍മ്) പദ്ധതിയില്‍നിന്ന് കമ്പനികളെ സസ്പെന്‍ഡ് ചെയ്ത നടപടിയെയാണ് ജയ്പാല്‍ വിമര്‍ശിച്ചത്.
'വന്‍കിട കോര്‍പറേറ്റുകള്‍ക്ക് വിലകുറഞ്ഞ തൊഴിലാളികളുടെ അനന്തമായ ഒഴുക്ക് ഉറപ്പാക്കാന്‍ ഏതറ്റംവരെയും പോരാടുന്നതാണ് ഇപ്പോള്‍ 'സോഷ്യലിസം' എന്നതിന്റെ അര്‍ഥമെന്ന് തോന്നുന്നു'- വാന്‍സ് കുറിച്ചു.
അമേരിക്കന്‍ ജനപ്രതിനിധിസഭയുടെ കുടിയേറ്റ ഉപസമിതിയില്‍ അംഗമായ ജയ്പാല്‍, മുമ്പ് എച്ച്-1ബി വിസയില്‍ അമേരിക്കയില്‍ താമസിച്ചിട്ടുള്ള വ്യക്തിയാണ്. ഭരണകൂടത്തിന്റെ നടപടി നിയമപരമായ കുടിയേറ്റ മാര്‍ഗങ്ങളെ ദുര്‍ബലപ്പെടുത്തുകയും അമേരിക്കയുടെ നവീകരണശേഷിയെ ബാധിക്കുകയും ചെയ്യുമെന്ന് അവര്‍ വാദിച്ചു.
നിയമപരമായ കുടിയേറ്റം നിയന്ത്രിക്കുന്നതിനെതിരെ പ്രമീള ജയ്പാല്‍
വിദേശ തൊഴിലാളികള്‍ക്ക് തൊഴില്‍ അധിഷ്ഠിത ഗ്രീന്‍ കാര്‍ഡ് ലഭിക്കുന്നതിനുള്ള ക്രമബദ്ധമായ മാര്‍ഗമാണ് പെര്‍മ് പദ്ധതിയെന്ന് പ്രമീള ജയ്പാല്‍ പറഞ്ഞു. വിദേശ തൊഴിലാളികളെ നിയമിക്കുന്നത് അമേരിക്കന്‍ സമ്പദ്വ്യവസ്ഥയ്ക്ക് ഗുണകരമാണെന്നും സ്വദേശികളായ തൊഴിലാളികളുടെ തൊഴില്‍ അവസരങ്ങളെ ദോഷകരമായി ബാധിക്കില്ലെന്നും തൊഴിലുടമകള്‍ തെളിയിക്കേണ്ടതുണ്ട്.
'കുടിയേറ്റക്കാര്‍ക്ക് രാജ്യത്തിന്റെ വികസനത്തില്‍ അവരുടെ കഴിവുകള്‍ പ്രയോജനപ്പെടുത്താന്‍ സഹായിക്കുന്ന നിയമപരമായ മാര്‍ഗങ്ങള്‍ ഇല്ലാതാക്കാനാണ് ഭരണകൂടം തുടര്‍ച്ചയായി ശ്രമിക്കുന്നത്. ഇതും അത്തരം നീക്കങ്ങളുടെ ഭാഗമാണ്,' ജയ്പാല്‍ എക്സില്‍ കുറിച്ചു.
സാങ്കേതികവിദ്യാ മേഖലയിലും അമേരിക്കന്‍ സമ്പദ്വ്യവസ്ഥയുടെ മറ്റു മേഖലകളിലും കുടിയേറ്റക്കാര്‍ നിര്‍ണായക പങ്കുവഹിക്കുന്നുണ്ടെന്നും അവര്‍ ചൂണ്ടിക്കാട്ടി.
'തകരാറിലായ കുടിയേറ്റ സംവിധാനത്തെ പരിഹരിക്കുന്നത് നിയമപരമായ കുടിയേറ്റത്തെ ചുറ്റികകൊണ്ട് തകര്‍ത്തുകൊണ്ടല്ല,' ജയ്പാല്‍ പറഞ്ഞു. മൈക്രോസോഫ്റ്റിനെയോ പെര്‍മ് പദ്ധതിയെയോ ലക്ഷ്യമിട്ടുള്ള നടപടികള്‍ നിയമപരമായ കുടിയേറ്റത്തെയും അമേരിക്കയുടെ നവീകരണശേഷിയെയും ദുര്‍ബലപ്പെടുത്തുമെന്നും അവര്‍ കൂട്ടിച്ചേര്‍ത്തു.
സസ്പെന്‍ഷനില്‍ ഇന്ത്യന്‍ ഐ ടി വമ്പന്മാരും
നിരവധി ഫെഡറല്‍ അന്വേഷണങ്ങള്‍ പുരോഗമിക്കുന്നതിനിടെ പ്രമുഖ സാങ്കേതികവിദ്യാ കമ്പനികളെയും ഐ ടി സേവനദാതാക്കളെയും പെര്‍മ് പദ്ധതിയില്‍നിന്ന് സസ്പെന്‍ഡ് ചെയ്യാനുള്ള യു എസ് തൊഴില്‍ വകുപ്പിന്റെ നടപടിയാണ് വിവാദത്തിന് ആധാരം.
ഇന്ത്യന്‍ ഐ ടി കമ്പനികളായ കോഗ്‌നിസന്റ്, ഇന്‍ഫോസിസ്, ടാറ്റ, വിപ്രോ, എച്ച് സി എല്‍ എന്നിവയും ഫ്രഞ്ച് കമ്പനിയായ ക്യാപ്‌ജെമിനിയും പട്ടികയില്‍ ഉള്‍പ്പെട്ടിട്ടുണ്ട്. അമേരിക്കന്‍ കമ്പനികളായ മൈക്രോസോഫ്റ്റിനെയും അഡോബിയെയും സസ്പെന്‍ഡ് ചെയ്തിട്ടുണ്ട്.
ഈ കമ്പനികള്‍ ദശലക്ഷക്കണക്കിന് വിദേശ തൊഴിലാളികള്‍ക്കായി അപേക്ഷകള്‍ നല്‍കിയിട്ടുണ്ടെന്നും ലക്ഷക്കണക്കിന് എച്ച്-1ബി വിസ അംഗീകാരങ്ങളും സ്ഥിരം തൊഴില്‍ സര്‍ട്ടിഫിക്കേഷനുകളും നേടിയിട്ടുണ്ടെന്നും യു എസ് തൊഴില്‍ സെക്രട്ടറി കീത്ത് സോണ്ടര്‍ലിങ് പറഞ്ഞു.
'2009 മുതല്‍ ഈ കമ്പനികള്‍ മാത്രം ഏകദേശം 30 ലക്ഷം വിദേശ തൊഴിലാളികള്‍ക്കായി അപേക്ഷിച്ചിട്ടുണ്ട്. 2.30 ലക്ഷത്തിലധികം എച്ച്-1ബി വിസകള്‍ക്ക് അംഗീകാരം ലഭിക്കുകയും ഒരു ലക്ഷത്തിലധികം സ്ഥിരം തൊഴില്‍ സര്‍ട്ടിഫിക്കേഷനുകള്‍ അനുവദിക്കുകയും ചെയ്തു,' അദ്ദേഹം പറഞ്ഞു. ഈ കണക്കുകള്‍ അമേരിക്കന്‍ തൊഴിലാളികള്‍ക്ക് ലഭിക്കേണ്ട ജോലികള്‍ വിദേശ തൊഴിലാളികളിലേക്ക് മാറിയതിന്റെ സൂചനയാണെന്നും അദ്ദേഹം വാദിച്ചു.
എച്ച്-1ബി തൊഴിലാളികളെ 'കരാര്‍ ബന്ധിത അടിമകള്‍' എന്ന് വിശേഷിപ്പിച്ച് വാന്‍സ്
വിസ തട്ടിപ്പുമായി ബന്ധപ്പെട്ട വാര്‍ത്താസമ്മേളനത്തില്‍ എച്ച്-1ബി വിസകളുടെ ഉപയോഗത്തെ വാന്‍സ് നേരത്തേ വിമര്‍ശിച്ചിരുന്നു. ചില വിദേശ തൊഴിലാളികളെ അദ്ദേഹം 'കരാര്‍ ബന്ധിത അടിമകള്‍' എന്നാണ് വിശേഷിപ്പിച്ചത്.
സമാന തസ്തികകളില്‍ ജോലി ചെയ്യുന്ന അമേരിക്കന്‍ പൗരന്മാരേക്കാള്‍ കുറഞ്ഞ വേതനമാണ് എച്ച്-1ബി വിസക്കാരില്‍ ചിലര്‍ക്ക് ലഭിക്കുന്നതെന്നും വിദേശ ഔട്ട്സോഴ്സിങ് കമ്പനികള്‍ അമേരിക്കയിലെ വേതനനിരക്ക് കുറയ്ക്കാന്‍ വിദേശ റിക്രൂട്ട്മെന്റ് ഉപയോഗിക്കുന്നുണ്ടെന്നും അദ്ദേഹം ആരോപിച്ചു.
'അമേരിക്കയില്‍ എച്ച്-1ബി വിസയില്‍ ജോലി ചെയ്യുന്ന ഒരാള്‍ക്ക് അതേ തസ്തികയില്‍ നിയമിക്കപ്പെട്ട അമേരിക്കന്‍ പൗരനേക്കാള്‍ 20,000 ഡോളര്‍ കുറവാണ് ലഭിക്കുന്നത്,' വാന്‍സ് പറഞ്ഞു.
വിദേശ ഔട്ട്സോഴ്സിങ് കമ്പനികള്‍ വഴി എത്തുന്ന തൊഴിലാളികള്‍ക്ക് സമാന ജോലികള്‍ ചെയ്യുന്ന അമേരിക്കന്‍ തൊഴിലാളികളേക്കാള്‍ 48,000 ഡോളര്‍ വരെ കുറവാണ് ലഭിക്കുന്നതെന്നും അദ്ദേഹം അവകാശപ്പെട്ടു.
ഇന്ത്യന്‍ പ്രൊഫഷണലുകളെ എങ്ങനെ ബാധിക്കും?
അമേരിക്കന്‍ വിപണിയില്‍ ഇന്ത്യന്‍ ഐ ടി കമ്പനികള്‍ക്ക് വലിയ സാന്നിധ്യമുള്ളതിനാലും നിരവധി ഇന്ത്യന്‍ പ്രൊഫഷണലുകള്‍ തൊഴിലുടമയുടെ പിന്തുണയോടെ സ്ഥിരതാമസാനുമതി നേടാന്‍ ശ്രമിക്കുന്നതിനാലും പുതിയ നടപടി ഇന്ത്യയെ സംബന്ധിച്ചിടത്തോളം നിര്‍ണായകമാണ്.
തൊഴില്‍ അധിഷ്ഠിത ഗ്രീന്‍ കാര്‍ഡ് നേടുന്നതിനുള്ള പ്രധാന ഘട്ടമാണ് പെര്‍മ് തൊഴില്‍ സര്‍ട്ടിഫിക്കേഷന്‍. ഈ നടപടിക്രമത്തില്‍നിന്ന് കമ്പനികളെ സസ്പെന്‍ഡ് ചെയ്യുന്നത്, നടപടിയുടെ വ്യാപ്തിയും നിലവിലെ സ്ഥിതിയും അനുസരിച്ച്, തൊഴിലുടമകള്‍ക്ക് അപേക്ഷാ നടപടികളുമായി മുന്നോട്ടുപോകുന്നതില്‍ തടസ്സങ്ങളോ കാലതാമസമോ സൃഷ്ടിച്ചേക്കാം.
വിദേശ തൊഴിലാളികള്‍ക്കുള്ള നിയമപരമായ മാര്‍ഗങ്ങള്‍ കൂടുതല്‍ സൂക്ഷ്മപരിശോധനയ്ക്ക് വിധേയമാകുന്ന സാഹചര്യത്തിലാണ് പുതിയ നീക്കം. പ്രഖ്യാപനത്തിന് ഒരു ദിവസം മുമ്പ്, ഓപ്ഷണല്‍ പ്രാക്ടിക്കല്‍ ട്രെയിനിങ് പദ്ധതിയില്‍ പങ്കെടുക്കാന്‍ ആഗ്രഹിക്കുന്ന എഫ്-1 വിസയിലുള്ള അന്താരാഷ്ട്ര വിദ്യാര്‍ഥികള്‍ക്ക് പുതിയ ഫീസ് ഏര്‍പ്പെടുത്താനുള്ള നിര്‍ദേശവും യു എസ് ആഭ്യന്തര സുരക്ഷാ വകുപ്പ് മുന്നോട്ടുവെച്ചിരുന്നു.
അമേരിക്കന്‍ തൊഴിലാളികളുടെ താത്പര്യങ്ങള്‍ സംരക്ഷിക്കാനും കുടിയേറ്റ സംവിധാനത്തിന്റെ വിശ്വാസ്യത ശക്തിപ്പെടുത്താനുമാണ് ഈ നിര്‍ദേശമെന്നാണ് വകുപ്പ് വ്യക്തമാക്കിയത്.