ന്യൂയോര്‍ക്ക്: അമേരിക്കയിലെ ന്യൂയോര്‍ക്ക് നഗരത്തില്‍ ഫെഡറല്‍ നിയമപാലകരുമായുള്ള ഏറ്റുമുട്ടലിനിടെ ഒരാള്‍ക്ക് വെടിയേറ്റു. വ്യാഴാഴ്ച വൈകിട്ട് ബ്രോങ്ക്‌സിലെ മാര്‍ബിള്‍ ഹില്‍ മേഖലയിലാണ് സംഭവം. യുഎസ് കുടിയേറ്റ നിയമങ്ങള്‍ നടപ്പാക്കുന്ന ഇമിഗ്രേഷന്‍ ആന്‍ഡ് കസ്റ്റംസ് എന്‍ഫോഴ്‌സ്‌മെന്റ് (ഐസിഇ) ഉദ്യോഗസ്ഥര്‍ സംഭവത്തില്‍ ഉള്‍പ്പെട്ടിരുന്നുവെന്ന് ചില അമേരിക്കന്‍ മാധ്യമങ്ങള്‍ റിപ്പോര്‍ട്ട് ചെയ്തു. എന്നാല്‍, വെടിവെപ്പിന്റെ സാഹചര്യങ്ങളെക്കുറിച്ച് അധികൃതര്‍ ഇതുവരെ വിശദ വിവരങ്ങള്‍ പുറത്തുവിട്ടിട്ടില്ല.
വൈകിട്ട് നാലുമണിയോടെ ഫെഡറല്‍ നിയമപാലകരുമായി ബന്ധപ്പെട്ട വെടിവെപ്പ് നടന്നതായി ന്യൂയോര്‍ക്ക് പൊലീസ് ഡിപ്പാര്‍ട്ട്‌മെന്റ് (എന്‍വൈപിഡി) സ്ഥിരീകരിച്ചു. സംഭവത്തില്‍ ന്യൂയോര്‍ക്ക് പൊലീസ് പങ്കെടുത്തിട്ടില്ലെന്നും വെടിവെപ്പ് നടന്ന സമയത്ത് പൊലീസ് ഉദ്യോഗസ്ഥര്‍ സ്ഥലത്തുണ്ടായിരുന്നില്ലെന്നും അധികൃതര്‍ വ്യക്തമാക്കി.
ഐസിഇയുടെ നേതൃത്വത്തില്‍ നടന്ന നടപടിക്കിടെയാണ് വെടിവെപ്പുണ്ടായതെന്ന് മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്. എന്നാല്‍, സംഭവത്തിന്റെ കൃത്യമായ സാഹചര്യങ്ങളും വെടിയുതിര്‍ത്തതിന്റെ കാരണവും വ്യക്തമല്ല.
സുതാര്യമായ അന്വേഷണം വേണമെന്ന് ഗവര്‍ണര്‍
സംഭവത്തില്‍ ഫെഡറല്‍ അധികൃതര്‍ പൂര്‍ണമായും സുതാര്യമായ വിശദീകരണം നല്‍കണമെന്ന് ന്യൂയോര്‍ക്ക് ഗവര്‍ണര്‍ കാത്തി ഹോക്കുല്‍ ആവശ്യപ്പെട്ടു. സംഭവത്തിലേക്ക് നയിച്ച സാഹചര്യങ്ങളെക്കുറിച്ച് വിശദമായ വിവരങ്ങള്‍ പുറത്തുവിടണമെന്നും ഉത്തരവാദിത്തം ഉറപ്പാക്കണമെന്നും അവര്‍ സമൂഹമാധ്യമമായ എക്‌സിലെ കുറിപ്പിലൂടെ വ്യക്തമാക്കി.
ന്യൂയോര്‍ക്ക് ഇമിഗ്രേഷന്‍ കോയലിഷന്‍ പ്രസിഡന്റ് മുറാദ് അവാവ്‌ദെയും സംഭവത്തെ വിമര്‍ശിച്ചു. വെടിവെപ്പില്‍ അടിയന്തര അന്വേഷണം നടത്തുക, ഉദ്യോഗസ്ഥരുടെ ബോഡി ക്യാമറ ദൃശ്യങ്ങള്‍ പുറത്തുവിടുക, അമിതബലം പ്രയോഗിച്ചിട്ടുണ്ടെങ്കില്‍ ബന്ധപ്പെട്ട ഉദ്യോഗസ്ഥര്‍ക്കെതിരെ നടപടി സ്വീകരിക്കുക തുടങ്ങിയ ആവശ്യങ്ങളാണ് അദ്ദേഹം ഉന്നയിച്ചത്.
ഐസിഇ നടപടികള്‍ക്കെതിരെ വിമര്‍ശനം ശക്തം
അമേരിക്കയിലുടനീളം ഐസിഇയുടെ പ്രവര്‍ത്തനങ്ങള്‍ കടുത്ത പരിശോധനയ്ക്കും വിമര്‍ശനങ്ങള്‍ക്കും വിധേയമായിക്കൊണ്ടിരിക്കുന്നതിനിടെയാണ് പുതിയ സംഭവം. ഈ വര്‍ഷം മിനിയാപൊളിസിലുണ്ടായ വെടിവെപ്പ് സംഭവങ്ങളില്‍ രണ്ട് അമേരിക്കന്‍ പൗരന്മാര്‍ കൊല്ലപ്പെട്ടതിനെത്തുടര്‍ന്ന് പ്രതിഷേധങ്ങള്‍ ശക്തമായിരുന്നു.
ഡെമോക്രാറ്റിക് പാര്‍ട്ടിക്ക് ശക്തമായ സ്വാധീനമുള്ള ന്യൂയോര്‍ക്ക് ഉള്‍പ്പെടെയുള്ള ചില നഗരങ്ങളില്‍ കുടിയേറ്റ നിയമങ്ങള്‍ നടപ്പാക്കുന്നതിനായി പ്രാദേശിക പൊലീസ് ഫെഡറല്‍ അധികൃതരെ സഹായിക്കുന്നതിന് നിയന്ത്രണങ്ങളുണ്ട്.
ന്യൂയോര്‍ക്കിലെ വെടിവെപ്പില്‍ പരിക്കേറ്റ വ്യക്തിയുടെ നില, സംഭവത്തിലേക്ക് നയിച്ച സാഹചര്യങ്ങള്‍, ഐസിഇ ഉദ്യോഗസ്ഥരുടെ കൃത്യമായ പങ്ക് എന്നിവ സംബന്ധിച്ച കൂടുതല്‍ വിവരങ്ങള്‍ പുറത്തുവന്നിട്ടില്ല. ഔദ്യോഗിക അന്വേഷണത്തിലൂടെയേ സംഭവത്തിന്റെ പൂര്‍ണ ചിത്രം വ്യക്തമാകൂ.
ന്യൂയോര്‍ക്കില്‍ ഫെഡറല്‍ ഏജന്റുമാരുമായുള്ള ഏറ്റുമുട്ടലിനിടെ യുവാവിന് വെടിയേറ്റു; ഐസിഇയുടെ പങ്ക് പരിശോധിക്കണമെന്ന് ആവശ്യം
