വാഷിങ്ടണ്‍: മൈക്രോസോഫ്റ്റിന്റെ കുടിയേറ്റ നയങ്ങള്‍ അമേരിക്കയില്‍ പരിശോധനയ്ക്ക് വിധേയമാകുന്നതിനിടെ കമ്പനിയുടെ ഇന്ത്യന്‍ വംശജനായ സിഇഒ സത്യ നാദെല്ലയ്ക്ക് ഉന്നത സാങ്കേതികവിദ്യാ പുരസ്‌കാരം നല്‍കി യുഎസ് പ്രസിഡന്റ് ഡോണള്‍ഡ് ട്രംപ്. അമേരിക്കന്‍ സാങ്കേതികവിദ്യാ മേഖലയ്ക്ക് നല്‍കിയ സംഭാവനകള്‍ പരിഗണിച്ച് നാഷണല്‍ മെഡല്‍ ഓഫ് ടെക്‌നോളജി ആന്‍ഡ് ഇന്നൊവേഷന്‍ പുരസ്‌കാരമാണ് നാദെല്ലയ്ക്ക് സമ്മാനിച്ചത്. വാഷിങ്ടണ്‍ ഡിസിയിലെ യുഎസ് ഇന്‍സ്റ്റിറ്റിയൂട്ട് ഓഫ് പീസില്‍ നടന്ന 'എ ന്യൂ ഗോള്‍ഡന്‍ ഏജ്' ഉച്ചകോടിയിലായിരുന്നു പുരസ്‌കാരദാനം.
മൈക്രോസോഫ്റ്റില്‍ മൂന്ന് പതിറ്റാണ്ടിലേറെയായി പ്രവര്‍ത്തിക്കുന്ന നാദെല്ലയുടെ നേതൃത്വത്തെയും കമ്പനിയുടെ വളര്‍ച്ചയില്‍ അദ്ദേഹം വഹിച്ച പങ്കിനെയും ട്രംപ് പ്രശംസിച്ചു. ക്ലൗഡ് കംപ്യൂട്ടിങ്, എന്റര്‍െ്രെപസ് സോഫ്റ്റ്‌വെയര്‍, നിര്‍മിതബുദ്ധി തുടങ്ങിയ മേഖലകളില്‍ മൈക്രോസോഫ്റ്റ് കൈവരിച്ച മുന്നേറ്റങ്ങളില്‍ നാദെല്ലയുടെ സംഭാവനകള്‍ നിര്‍ണായകമാണെന്ന് അദ്ദേഹം ചൂണ്ടിക്കാട്ടി.
മൈക്രോസോഫ്റ്റിന്റെ വളര്‍ച്ചയില്‍ നിര്‍ണായക പങ്ക്
2014ല്‍ മൈക്രോസോഫ്റ്റിന്റെ സിഇഒ പദവിയിലെത്തിയ നാദെല്ല അതിന് മുമ്പ് കമ്പനിയുടെ വിവിധ പ്രധാന വിഭാഗങ്ങളുടെ ചുമതല വഹിച്ചിരുന്നു. ബിസിനസ് സേവനങ്ങള്‍, ഗവേഷണവികസനം, ക്ലൗഡ് കംപ്യൂട്ടിങ് എന്നിവയിലായിരുന്നു അദ്ദേഹത്തിന്റെ പ്രധാന പ്രവര്‍ത്തനങ്ങള്‍.
നാദെല്ലയുടെ നേതൃത്വത്തില്‍ മൈക്രോസോഫ്റ്റിന്റെ ക്ലൗഡ് പ്ലാറ്റ്‌ഫോമായ അസ്യൂര്‍ കമ്പനിയുടെ പ്രധാന വളര്‍ച്ചാ മേഖലകളിലൊന്നായി മാറി. ലോകമെമ്പാടുമുള്ള വ്യക്തികളും സ്ഥാപനങ്ങളും ഉപയോഗിക്കുന്ന നിരവധി സാങ്കേതിക സേവനങ്ങളുടെ അടിസ്ഥാനമായി ക്ലൗഡ് സംവിധാനങ്ങള്‍ മാറിയിട്ടുണ്ട്. നിര്‍മിതബുദ്ധി രംഗത്തും മൈക്രോസോഫ്റ്റിന്റെ സാന്നിധ്യം വികസിപ്പിക്കുന്നതില്‍ നാദെല്ല നേതൃത്വം നല്‍കി.
നാദെല്ലയ്ക്ക് പുരസ്‌കാരം നല്‍കുന്നതില്‍ സന്തോഷമുണ്ടെന്ന് വ്യക്തമാക്കിയ ട്രംപ്, അദ്ദേഹത്തിന്റെ സംഭാവനകളെ അഭിനന്ദിച്ചു.
പ്രമുഖ സാങ്കേതികവിദഗ്ധര്‍ക്കും പുരസ്‌കാരം
ചടങ്ങില്‍ മറ്റ് പ്രമുഖ സാങ്കേതികവിദ്യാ മേഖലയിലെ നേതാക്കള്‍ക്കും ട്രംപ് പുരസ്‌കാരങ്ങള്‍ സമ്മാനിച്ചു. സ്‌പേസ് എക്‌സ് മേധാവി ഇലോണ്‍ മസ്‌ക്, ഗൂഗിള്‍ സഹസ്ഥാപകന്‍ സെര്‍ജി ബ്രിന്‍, എന്‍വിഡിയ സിഇഒ ജെന്‍സന്‍ ഹുവാങ്, എഎംഡി സിഇഒ ലിസ സു എന്നിവര്‍ക്ക് നാഷണല്‍ മെഡല്‍ ഓഫ് സയന്‍സ് ലഭിച്ചു. ഡെല്‍ ടെക്‌നോളജീസ് സിഇഒ മൈക്കല്‍ ഡെല്ലിനും നാഷണല്‍ മെഡല്‍ ഓഫ് ടെക്‌നോളജി ആന്‍ഡ് ഇന്നൊവേഷന്‍ സമ്മാനിച്ചു.
കുടിയേറ്റ പശ്ചാത്തലമുള്ള നേതാക്കള്‍ക്ക് അംഗീകാരം
അമേരിക്കന്‍ സാങ്കേതികവിദ്യാ മേഖലയില്‍ കുടിയേറ്റ പശ്ചാത്തലമുള്ളവരുടെ സംഭാവനകളും ചടങ്ങിലൂടെ ശ്രദ്ധിക്കപ്പെട്ടു. പുരസ്‌കാരം ലഭിച്ച ആറ് സാങ്കേതികവിദ്യാ നേതാക്കളില്‍ അഞ്ചുപേരും കുടിയേറ്റക്കാരാണ്. ദക്ഷിണാഫ്രിക്കയില്‍ ജനിച്ച മസ്‌ക്, റഷ്യയില്‍ ജനിച്ച ബ്രിന്‍, തായ്‌വാനില്‍ ജനിച്ച ഹുവാങ്, ലിസ സു എന്നിവര്‍ക്കൊപ്പം ഇന്ത്യയില്‍നിന്ന് അമേരിക്കയിലെത്തിയ നാദെല്ലയും ഈ പട്ടികയില്‍ ഉള്‍പ്പെടുന്നു. ടെക്‌സസില്‍ ജനിച്ച മൈക്കല്‍ ഡെല്‍ മാത്രമാണ് അമേരിക്കയില്‍ ജനിച്ചവരില്‍ ഒരാള്‍.
അതേസമയം, വിദേശ തൊഴിലാളികളെ നിയമിക്കുന്നതുമായി ബന്ധപ്പെട്ട മൈക്രോസോഫ്റ്റിന്റെ നടപടികള്‍ അമേരിക്കന്‍ ഭരണകൂടത്തിന്റെ പരിശോധനയ്ക്ക് വിധേയമായിരിക്കെയാണ് നാദെല്ലയ്ക്ക് പുരസ്‌കാരം ലഭിച്ചത്. വിദേശ വിദഗ്ധരുടെ സംഭാവനകളും അമേരിക്കന്‍ തൊഴിലാളികള്‍ക്ക് കൂടുതല്‍ അവസരങ്ങള്‍ ഉറപ്പാക്കണമെന്ന ഭരണകൂടത്തിന്റെ നിലപാടും ഒരേസമയം ചര്‍ച്ചയാകുന്ന സാഹചര്യത്തില്‍ ഈ പുരസ്‌കാരദാനം ശ്രദ്ധേയമായി.
കുടിയേറ്റ വിവാദങ്ങള്‍ക്കിടെ സത്യ നാദെല്ലയ്ക്ക് സാങ്കേതികവിദ്യാ പുരസ്‌കാരം നല്‍കി ട്രംപ്
