വെള്ളിയാഴ്ച ഉച്ചയ്ക്ക് ശേഷം ഫെഡറൽ ഏവിയേഷൻ അഡ്മിനിസ്ട്രേഷൻ (FAA) രാജ്യവ്യാപകമായി വിമാന സർവീസുകൾ അടിയന്തരമായി നിർത്തിവച്ചു.
എയർ ട്രാഫിക് കൺട്രോൾ സംവിധാനത്തെ ബാധിച്ച വൻ സാങ്കേതിക തകരാറിനെ തുടർന്നാണ്
'ഗ്രൗണ്ട് സ്റ്റോപ്പ്' എന്നറിയപ്പെടുന്ന ഈ നടപടിക്ക് എഫ് എ എ തയ്യാറായത്. ഇതോടെ മിക്കവാറും എല്ലാ വിമാനങ്ങളുടെയും പുറപ്പെടൽ തടസ്സപ്പെടുകയും ആയിരക്കണക്കിന് യാത്രക്കാർ വിമാനത്താവളങ്ങളിൽ കുടുങ്ങുകയും ചെയ്തു.
ടെലികമ്മ്യൂണിക്കേഷൻ സംവിധാനത്തിലുണ്ടായ തകരാറാണ് വിമാനങ്ങൾ നിർത്തിവയ്ക്കാൻ കാരണമായതെന്ന് ആഭ്യന്തര സുരക്ഷാ സെക്രട്ടറി മാർക്ക്‌വെയ്ൻ മുള്ളിൻ പറഞ്ഞു. എന്നാൽ ഇതിന്റെ കൃത്യമായ കാരണം ട്രംപ് ഭരണകൂടത്തിലെ ഉദ്യോഗസ്ഥർക്ക് അറിയില്ലെന്നും, തകരാറുകൾ പരിഹരിക്കാൻ കൂടുതൽ സമയമെടുക്കുമെന്നും അദ്ദേഹം കൂട്ടിച്ചേർത്തു.
ഇതൊരു ഭീകരാക്രമണമല്ലെന്ന് അദ്ദേഹം ഊന്നിപ്പറഞ്ഞു. "ഇത് മറ്റൊരു 9/11 അല്ല," അദ്ദേഹം വ്യക്തമാക്കി.
സൈബർ ആക്രമണമോ മറ്റ് അട്ടിമറി പ്രവർത്തനങ്ങളോ മൂലമാണ് ഈ തകരാർ സംഭവിച്ചതെന്നതിന് യാതൊരു സൂചനയുമില്ലെന്ന് ഒന്നിലധികം യു.എസ് ഉദ്യോഗസ്ഥർ അറിയിച്ചു. എങ്കിലും സാഹചര്യങ്ങളെക്കുറിച്ചുള്ള നിലവിലെ വിലയിരുത്തലുകളിൽ മാറ്റമുണ്ടായേക്കാമെന്നും എല്ലാവരും മുന്നറിയിപ്പ് നൽകി.
വൈകുന്നേരത്തോടെ രാജ്യത്തുടനീളമുള്ള വിമാനത്താവളങ്ങളിൽ ആശയക്കുഴപ്പം പടർന്നതോടെ യാത്രക്കാർ എയർലൈൻ, വിമാനത്താവള ജീവനക്കാരോട് വിശദീകരണം തേടി. നൂറുകണക്കിന് വിമാനങ്ങൾ മറ്റ് വിമാനത്താവളങ്ങളിലേക്ക് വഴിതിരിച്ചുവിടുകയും അതിലേറെ വിമാനങ്ങൾ റദ്ദാക്കുകയും ചെയ്തു. എന്നാൽ ഹോണോലുലു, സാൻ ഫ്രാൻസിസ്കോ എന്നിവിടങ്ങളിൽ നിന്ന് ഏഷ്യയിലേക്കുള്ള ചില അന്താരാഷ്ട്ര വിമാനങ്ങൾ സർവീസ് നടത്തുന്നുണ്ടായിരുന്നു.
എല്ലാ എയർ റൂട്ട് ട്രാഫിക് കൺട്രോൾ സെന്ററുകളെയും ബാധിച്ച ആശയവിനിമയ തകരാറാണ് ഇതിന് പിന്നിലെന്ന് ഗതാഗത സെക്രട്ടറി ഷോൺ ഡഫി സോഷ്യൽ മീഡിയ പോസ്റ്റിലൂടെ സ്ഥിരീകരിച്ചു.
"എഫ്.എ.എ സാങ്കേതിക വിദഗ്ധർ പ്രശ്നം പരിശോധിച്ചുവരികയാണ്," അദ്ദേഹം കൂട്ടിച്ചേർത്തു. "വിവരങ്ങൾ ലഭിക്കുന്ന മുറയ്ക്ക് ഞങ്ങൾ ഉടൻ അറിയിക്കുന്നതായിരിക്കും."
"അസാധാരണമായ സാഹചര്യങ്ങളും സുരക്ഷാ കാരണങ്ങളും" മുൻനിർത്തി "എല്ലാ വിമാനത്താവളങ്ങളിലും വിമാന സർവീസുകൾ നിർത്തിവച്ചിരിക്കുകയാണ്" എന്ന് വ്യക്തമാക്കിക്കൊണ്ട് ഏജൻസി ഔദ്യോഗിക അറിയിപ്പ് പുറത്തിറക്കി.