നാസ: അന്താരാഷ്ട്ര ബഹിരാകാശ നിലയത്തില് ഡോക്ക് ചെയ്തിരിക്കുന്ന ഡ്രാഗണ് എന്ഡവറിന്റെ ജാലകത്തില് നിന്ന് ബഹിരാകാശയാത്രികനായ മാത്യു ഡൊമിനിക്ക് എടുത്ത മില്ട്ടണ് ചുഴലിക്കാറ്റിന്റെ ടൈംലാപ്സ് പോസ്റ്റ് ചെയ്തു.
ഗള്ഫ് ഓഫ് മെക്സിക്കോയില് ഫ്ലോറിഡയിലേക്ക് മില്ട്ടണ് ചുഴലിക്കാറ്റ് ആഞ്ഞടിക്കുന്നതായാണ് ടൈംലാപ്സ് കാണിക്കുന്നത്.
ഫ്ലോറിഡയിലേക്കുള്ള പാതയില് തന്നെ തുടരുന്നതിനാല് മില്ട്ടണ് ശക്തമായ കാറ്റഗറി 5 ചുഴലിക്കാറ്റായി തുടരുന്നതായാണ് റിപ്പോര്ട്ട്. കരയില് പതിക്കുന്നതിന് മുമ്പ് ഇത് ദുര്ബലമാകുമെന്ന് പ്രവചിക്കപ്പെട്ടിട്ടുണ്ടെങ്കിലും, അത് വലിപ്പത്തില് വളരും-അതായത് അതിന്റെ വിനാശകരമായ പ്രത്യാഘാതങ്ങള് വളരെ വലിയ പ്രദേശത്ത് അനുഭവപ്പെടുമെന്നാണ് കാലാവസ്ഥാ ഏജന്സികളുടെ പ്രവചനം..
ബുധനാഴ്ച രാത്രി ഫ്ലോറിഡയിലെ സെന്ട്രല് ഗള്ഫ് തീരത്ത് എവിടെയെങ്കിലും കൊടുങ്കാറ്റ് കരയില് പതിക്കുമെന്ന് പ്രവചിക്കപ്പെടുന്നു. ചരിത്രത്തിലെ ഏറ്റവും വിനാശകരമായ കൊടുങ്കാറ്റുകളില് ഒന്നായി അത് മാറിയേക്കാം എന്നാണ് ആശങ്ക. കൊടുങ്കാറ്റിന്റെ അപകടകരമായ ലക്ഷ്യം സരസോട്ട അല്ലെങ്കില് ടാംപ ഉള്ക്കടല് പ്രദേശങ്ങളിലും കരയിലുമെത്തിയേക്കാം.
കൊടുങ്കാറ്റില് കൊല്ലപ്പെടാനുള്ള വര്ധിച്ച സാധ്യതാ മുന്നറിയിപ്പ് നല്കിക്കൊണ്ട് ഉദ്യോഗസ്ഥര് ഫ്ലോറിഡിയക്കാരോട് ഒഴിഞ്ഞുപോകാന് അഭ്യര്ത്ഥിക്കുകയാണ്. ഫ്ളോറിഡയില് ഹെലന് ചുഴലിക്കാറ്റ് ആഞ്ഞടിച്ചതിനെ തുടര്ന്നുണ്ടായ മരണങ്ങളും നാശനഷ്ടങ്ങളും സംഭവിച്ച് രണ്ടാഴ്ച പിന്നിടുമ്പോളാണ് പുതിയ ഭീഷണി. മുന്നറിയിപ്പുകള് നിവാസികള് ശ്രദ്ധിക്കുന്നതിനാല് സംസ്ഥാനത്തെ ഹൈവേകള് അടഞ്ഞുകിടക്കുകയും ചില ഗ്യാസ് സ്റ്റേഷനുകളില് ഇന്ധനം കുറയുകയും ചെയ്യുന്നു.