കാലിഫോര്‍ണിയ: ആറുവയസ്സുകാരനെ തട്ടിക്കൊണ്ടുപോയ സംഭവത്തില്‍ അധികൃതര്‍ ആംബര്‍ അലര്‍ട്ട് പുറപ്പെടുവിച്ചു. വെസ്റ്റ്മിന്‍സ്റ്ററില്‍നിന്ന് കുട്ടിയെ തട്ടിക്കൊണ്ടുപോയതായാണ് റിപ്പോര്‍ട്ട്. കുട്ടിയെ കണ്ടെത്തുന്നതിനും പ്രതിയെ പിടികൂടുന്നതിനും പൊതുജനങ്ങളുടെ സഹായം തേടി കാലിഫോര്‍ണിയ ഹൈവേ പട്രോള്‍ അധികൃതര്‍ രംഗത്തെത്തി.
ജോസഫ് ഗാര്‍ഷ്യ എന്ന ആറുവയസ്സുകാരനെ ഒക്ടോബര്‍ 25 ഞായറാഴ്ച വൈകിട്ട് നാലുമണിയോടെയാണ് വെസ്റ്റ്മിന്‍സ്റ്ററില്‍നിന്ന് തട്ടിക്കൊണ്ടുപോയതെന്നാണ് വിവരം. സംഭവത്തില്‍ വെസ്റ്റ്മിന്‍സ്റ്റര്‍ പൊലീസ് വകുപ്പിന്റെ അഭ്യര്‍ഥനപ്രകാരം ഒക്ടോബര്‍ 26 തിങ്കളാഴ്ച പുലര്‍ച്ചെ ആംബര്‍ അലര്‍ട്ട് പുറപ്പെടുവിച്ചു. കുട്ടിയുടെയും സംശയിക്കുന്നയാളുടെയും വാഹനത്തിന്റെയും വിവരങ്ങള്‍ അധികൃതര്‍ പൊതുജനങ്ങള്‍ക്ക് കൈമാറി.
ആറുവയസ്സുകാരനായ ജോസഫ് ഗാര്‍ഷ്യ ഹിസ്പാനിക് വംശജനാണ്. ഏകദേശം മൂന്നടി ഏഴിഞ്ച് ഉയരവും 65 പൗണ്ട് (ഏകദേശം 29.5 കിലോഗ്രാം) ഭാരവുമുള്ള കുട്ടിക്ക് തവിട്ടുനിറത്തിലുള്ള മുടിയും കണ്ണുകളുമാണുള്ളത്. തട്ടിക്കൊണ്ടുപോകപ്പെട്ട സമയത്ത് ബീജ് നിറത്തിലുള്ള ഷര്‍ട്ടും നീല ഷോര്‍ട്സും കറുത്ത ഷൂസുമാണ് ധരിച്ചിരുന്നത്.
ഫ്രാങ്ക് റാമിറസ് എന്ന 47കാരനെയാണ് സംഭവത്തില്‍ സംശയിക്കുന്നതായി അധികൃതര്‍ അറിയിച്ചിരിക്കുന്നത്. ഹിസ്പാനിക് വംശജനായ ഇയാള്‍ക്ക് ഏകദേശം അഞ്ചടി ഏഴിഞ്ച് ഉയരവും 180 പൗണ്ട് (ഏകദേശം 81.6 കിലോഗ്രാം) ഭാരവുമുണ്ട്. കറുത്ത മുടിയും ഇളം തവിട്ടുനിറത്തിലുള്ള കണ്ണുകളുമാണ് ഇയാളുടേത്. ചാരനിറത്തിലുള്ള കൈയില്ലാത്ത ഷര്‍ട്ടും ഷോര്‍ട്സുമാണ് അവസാനമായി ധരിച്ചിരുന്നതെന്ന് അലര്‍ട്ടില്‍ പറയുന്നു.
1995 മോഡല്‍ നീല നിറത്തിലുള്ള ജിഎംസി സോനോമ പിക്കപ്പ് ട്രക്കിലാണ് പ്രതി അവസാനമായി യാത്ര ചെയ്തതെന്ന് അധികൃതര്‍ അറിയിച്ചു. കാലിഫോര്‍ണിയ രജിസ്‌ട്രേഷന്‍ നമ്പര്‍ 5ബി30127 ആണ് വാഹനത്തിനുള്ളത്.
കുട്ടിയെയോ പ്രതിയെയോ വാഹനത്തെയോ ശ്രദ്ധയില്‍പ്പെട്ടാല്‍ ഉടന്‍ 911 എന്ന അടിയന്തര നമ്പറില്‍ വിവരമറിയിക്കണമെന്ന് അധികൃതര്‍ അഭ്യര്‍ഥിച്ചു. പ്രതിയെ നേരിട്ട് സമീപിക്കാനോ നേരിടാനോ ശ്രമിക്കരുതെന്നും പൊതുജനങ്ങള്‍ക്ക് മുന്നറിയിപ്പ് നല്‍കിയിട്ടുണ്ട്.
കുട്ടികളെ തട്ടിക്കൊണ്ടുപോകുന്ന സംഭവങ്ങളില്‍ പൊതുജനങ്ങളുടെ സഹായത്തോടെ കുട്ടികളെ വേഗത്തില്‍ കണ്ടെത്തുന്നതിനായി അമേരിക്കയില്‍ ഉപയോഗിക്കുന്ന അടിയന്തര മുന്നറിയിപ്പ് സംവിധാനമാണ് ആംബര്‍ അലര്‍ട്ട്.