ടെക്‌സസ്: സ്‌പേസ് എക്‌സിന്റെ വിക്ഷേപണ കേന്ദ്രമായ സ്റ്റാര്‍ബേസിനെ ടെക്‌സസിലെ ഒരു ഔദ്യോഗിക നഗരമാക്കി മാറ്റുക എന്ന എലോണ്‍ മസ്‌ക് ദീര്‍ഘകാലമായി നടത്തിയ പരിശ്രമങ്ങള്‍ സാഫല്യത്തിലേക്ക് ഒരു കുതിച്ചു ചാട്ടം നടത്തി. ഇതിനായി നടത്തിയ ഒരു വോട്ടെടുപ്പില്‍, ടെക്‌സസിലെ ബോക്ക ചിക്ക വില്ലേജ് നിവാസികള്‍ തങ്ങളുടെ കമ്മ്യൂണിറ്റിയെ ഒരു പുതിയ മുനിസിപ്പാലിറ്റിയായി മാറ്റുന്നതിന് അനുകൂലമായി വോട്ടുചെയ്തു.
കാമറൂണ്‍ കൗണ്ടി തിരഞ്ഞെടുപ്പ് ഉദ്യോഗസ്ഥരുടെ അഭിപ്രായത്തില്‍, ശനിയാഴ്ച വൈകുന്നേരം 7 മണി വരെ (പ്രാദേശിക സമയം) എണ്ണിയ 177 വോട്ടുകളില്‍ 173 എണ്ണവും പുതിയ നഗരത്തിന്റെ സൃഷ്ടിയെ പിന്തുണക്കുന്നതാണ്. ഏകദേശം 1.6 ചതുരശ്ര മൈല്‍ വിസ്തൃതിയുള്ള ഈ പ്രദേശം, 2021 ല്‍ 'സ്റ്റാര്‍ബേസ് ' എന്ന പേര് ആദ്യമായി അവതരിപ്പിച്ചതു മുതല്‍ മസ്‌ക് ഈ പ്രദേശത്തെ അതേ പേരിലുള്ള പുതിയ മുനിസിപ്പാലിറ്റിയാക്കി മാറ്റാൈനുള്ള നീക്കത്തിലായിരുന്നു. തന്റെ സ്വപ്‌നം യാഥാര്‍ത്ഥ്യത്തിലേക്ക് അടുത്തതോടെ സന്തോഷം പ്രകടമാക്കി അദ്ദേഹം തന്റെ തന്നെ ഉടമസ്ഥതയിലുള്ള എക്‌സില്‍ കുറിപ്പിട്ടു.
'സ്റ്റാര്‍ബേസ്, ടെക്‌സസ് ഇപ്പോള്‍ ഒരു യഥാര്‍ത്ഥ നഗരമാണ്!' ലോകത്തിലെ ഏറ്റവും ധനികനായ മനുഷ്യനും അദ്ദേഹത്തിന്റെ റോക്കറ്റ് കമ്പനിയായ സ്‌പേസ് എക്‌സിനും ഒരു പ്രതീകാത്മക നാഴികക്കല്ല് അടയാളപ്പെടുത്തിക്കൊണ്ട് മസ്‌ക് ഓണ്‍ലൈനില്‍ പോസ്റ്റ് ചെയ്തു.
ഈ വോട്ടെടുപ്പ് ഫലത്തില്‍, സ്‌പേസ് എക്‌സിന്റെ സൗത്ത് ടെക്‌സസ് ആസ്ഥാനാനമായ സ്റ്റാര്‍ബേസിന് ആസൂത്രണം, നികുതി, മറ്റ് മുനിസിപ്പല്‍ കാര്യങ്ങള്‍ എന്നിവയില്‍ അധികാരമുള്ള ഒരു മേയറും രണ്ട് കമ്മീഷണര്‍മാരും ഉള്‍പ്പെടുന്ന ഒരു തദ്ദേശ സ്വയംഭരണ സ്ഥാപനമായി മാറാന്‍ അനുവദിക്കുന്നു.
വോട്ടെടുപ്പിന് അര്‍ഹതനേടിയ 283 വോട്ടര്‍മാരില്‍ ഭൂരിഭാഗവും സ്‌പേസ് എക്‌സ് ജീവനക്കാരോ അഫിലിയേറ്റുകളോ ആണെങ്കിലും, ചില താമസക്കാര്‍ ആശങ്ക പ്രകടിപ്പിച്ചിട്ടുണ്ട്. കമ്പനിയുടെ സാന്നിധ്യം പ്രദേശത്തിന്റെ പരിസ്ഥിതിയെ തടസ്സപ്പെടുത്തുകയും അതിന്റെ ഗ്രാമീണ സ്വഭാവം മാറ്റുകയും ചെയ്തുവെന്ന് വിമര്‍ശകര്‍ നേരത്തെ തന്നെ ആരോപിച്ചിരുന്നു. എന്നിരുന്നാലും, 200ലധികം ബാലറ്റുകള്‍ രേഖപ്പെടുത്തിയ ആദ്യകാല വോട്ടിംഗ് നമ്പറുകള്‍, മുനിസിപ്പാലിറ്റി രൂപീകരണത്തിനുള്ള ശക്തമായ ആക്കത്തെയാണ് സൂചിപ്പിക്കുന്നത്.
മസ്‌ക് ആദ്യകാല വോട്ടര്‍ പട്ടികയില്‍ ഇടം നേടിയില്ലെങ്കിലും, നവംബറില്‍ കാമറൂണ്‍ കൗണ്ടിയിലാണ് അവസാനമായി വോട്ട് രേഖപ്പെടുത്തിയെങ്കിലും, അദ്ദേഹത്തിന്റെ സാന്നിധ്യം പ്രക്രിയയില്‍ വലിയ സ്വാധീനം ചെലുത്തി.
സ്റ്റാര്‍ബേസിന്റെ രൂപീകരണം സാങ്കേതികവിദ്യാധിഷ്ഠിത നഗര നിര്‍മ്മാണത്തിന് ഒരു മാതൃക വയ്ക്കാന്‍ സാധ്യതയുണ്ട്, പക്ഷേ അത് പൗരജീവിതത്തില്‍ കോര്‍പ്പറേറ്റ് സ്വാധീനത്തെക്കുറിച്ചുള്ള ചോദ്യങ്ങളും ഉയര്‍ത്തുന്നു.
ടെക്‌സസിലെ 'സ്റ്റാര്‍ബേസിന് നഗരപദവി': സ്‌പേസ് എക്‌സിന്റെ പിന്തുണയുള്ള പട്ടണം അംഗീകരിക്കപ്പെടുന്നത് ആഘോഷിച്ച് എലോണ്‍ മസ്‌ക്
