അമേരിക്കക്കാർക്ക് 5,000 ഡോളർ 'ഡിവിഡന്റ്': പണം എങ്ങിനെ കണ്ടെത്തുമെന്ന് വിമർശകർ

---

വാഷിങ്ടൺ: അമേരിക്കൻ പൗരന്മാർക്ക് 5,000 ഡോളർ വീതം 'ഡിവിഡന്റ്' നൽകാനുള്ള നിർദേശത്തെ ശക്തമായി പ്രതിരോധിച്ച് പ്രസിഡന്റ് ഡോണൾഡ് ട്രംപ്. ഇത് മിഡിൽ ടേം തിരഞ്ഞെടുപ്പിലെ വോട്ടർമാരെ സ്വാധീനിക്കാനുള്ള നീക്കമല്ലെന്നും ബൈഡൻ ഭരണകാലത്തെ 'പ്രതിസന്ധികൾ സഹിച്ചതിനുള്ള പ്രതിഫലം' ആണെന്നും ട്രംപ് വ്യക്തമാക്കി. എന്നാൽ പദ്ധതി നടപ്പാക്കാനുള്ള പണം എവിടെനിന്ന് കണ്ടെത്തുമെന്ന ചോദ്യമാണ് ഇപ്പോൾ പ്രധാനമായും ഉയരുന്നത്.

എല്ലാ മുതിർന്ന അമേരിക്കക്കാർക്കും നൽകാൻ ഉദ്ദേശിക്കുന്ന 5,000 ഡോളർ വീതമുള്ള തുക രാജ്യത്തിന് ഏകദേശം 1.3 ട്രില്യൺ ഡോളർ വരെ ബാധ്യത വരുത്തുമെന്നാണ് ചില കണക്കുകൾ. റിപ്പബ്ലിക്കൻ പാർട്ടി കോൺഗ്രസിന്റെ ഇരുസഭകളിലെയും നിയന്ത്രണം നിലനിർത്തുകയും പണം അമേരിക്കയിൽ തന്നെ ചെലവഴിക്കുകയും ചെയ്യണമെന്ന നിബന്ധനയും നിർദേശവുമായി ബന്ധപ്പെട്ടുണ്ട്.

'വൻ സാമ്പത്തിക വളർച്ച'യിൽനിന്ന് പണമെത്തുമോ?

പദ്ധതിക്ക് ആവശ്യമായ പണം 'അസാധാരണമായ സാമ്പത്തിക വളർച്ച'യിൽനിന്നും രാജ്യത്തേക്ക് എത്തുന്ന ട്രില്യൺ കണക്കിന് ഡോളർ നിക്ഷേപങ്ങളിൽനിന്നും കണ്ടെത്താനാകുമെന്നാണ് ട്രംപിന്റെ വാദം. എന്നാൽ കമ്പനികൾ നിക്ഷേപിക്കുമെന്ന് പ്രഖ്യാപിച്ച തുകകൾ ഇതുവരെ പൂർണമായി യാഥാർഥ്യമായിട്ടില്ല. അവ എങ്ങനെ നേരിട്ട് ജനങ്ങൾക്ക് ഡിവിഡന്റ് ചെക്കുകളായി മാറുമെന്ന കാര്യത്തിലും വ്യക്തതയില്ല.

അമേരിക്കയുടെ കടം ഇതിനകം 40 ട്രില്യൺ ഡോളറിനടുത്താണ്. അതിനാൽ ഇത്രയും വലിയ തുക നേരിട്ട് വിതരണം ചെയ്യുന്നത് ബജറ്റിനും ധനക്കമ്മിക്കും മേൽ അധിക സമ്മർദം സൃഷ്ടിക്കുമെന്ന ആശങ്ക ശക്തമാണ്.

'വോട്ട് വാങ്ങാനുള്ള ശ്രമം' എന്ന വിമർശനം

പദ്ധതിയെ വോട്ടർമാരെ സ്വാധീനിക്കാനുള്ള ശ്രമമെന്നാണ് ഡെമോക്രാറ്റിക് നേതാക്കൾ  വിശേഷിപ്പിച്ചത്. റിപ്പബ്ലിക്കൻ പാർട്ടിയിലെ ചില അംഗങ്ങളും ആശങ്ക പ്രകടിപ്പിച്ചിട്ടുണ്ട്. ഇത്രയും വലിയ തുക സമ്പദ്‌വ്യവസ്ഥയിലേക്ക് ഒരേസമയം ഒഴുക്കുന്നത് പണപ്പെരുപ്പം വീണ്ടും ഉയർത്താൻ ഇടയാക്കുമെന്നാണ് പ്രധാന വിമർശനം.

കഴിഞ്ഞ വർഷം താരിഫ് വരുമാനത്തിൽനിന്ന് ഓരോ അമേരിക്കക്കാരനും 2,000 ഡോളർ വീതം റിബേറ്റ് നൽകുമെന്ന് ട്രംപ് പ്രഖ്യാപിച്ചിരുന്നെങ്കിലും അത് ഇതുവരെ നടപ്പായിട്ടില്ല. താരിഫുകളിൽനിന്നുള്ള വരുമാനം പോലും പദ്ധതിക്ക് മതിയാകുമോ എന്ന സംശയത്തിന് ഇതോടെ കൂടുതൽ പ്രസക്തിയുണ്ട്. പെൻ വാർട്ടൺ ബജറ്റ് മോഡലിന്റെ കണക്കനുസരിച്ച് താരിഫുകൾ ഏകദേശം 300 ബില്യൺ ഡോളർ മാത്രമാണ് സമാഹരിച്ചത്.

സാമ്പത്തിക ഉത്തേജനമോ രാഷ്ട്രീയ തന്ത്രമോ?

ജനങ്ങൾക്ക് നേരിട്ട് പണം നൽകുന്നത് ഉപഭോഗം വർധിപ്പിക്കുകയും സാമ്പത്തിക പ്രവർത്തനം ഉത്തേജിപ്പിക്കുകയും ചെയ്യാം. എന്നാൽ അതിന് തുല്യമായ വരുമാനസ്രോതസ്സ് ഇല്ലെങ്കിൽ സർക്കാർ കടം വർധിക്കുകയോ പണപ്പെരുപ്പം ശക്തമാകുകയോ ചെയ്യാം.

അതിനാൽ ട്രംപിന്റെ 5,000 ഡോളർ ഡിവിഡന്റ് പദ്ധതി ഇപ്പോൾ സാമ്പത്തിക ക്ഷേമപദ്ധതിയേക്കാൾ അതിന്റെ ധനസ്രോതസ്സും രാഷ്ട്രീയ സമയക്രമവുമാണ് കൂടുതൽ ചർച്ചയാകുന്നത്.'സാമ്പത്തിക വളർച്ച' മാത്രം ഉപയോഗിച്ച് 1.3 ട്രില്യൺ ഡോളറിന്റെ ചെലവ് വഹിക്കാനാകുമോ എന്നതാണ് പദ്ധതിയുടെ വിശ്വാസ്യത നിർണയിക്കുന്ന പ്രധാന ചോദ്യം.