കാലിഫോര്ണിയ: കൊക്കെയ്നുമായി രണ്ട് ഇന്ത്യക്കാരെ യു എസ് പൊലീസ് പിടികൂടി. 309 പൗണ്ട് കൊക്കെയ്ന് ആണ് ഇവരില് നിന്നു പിടികൂടിയത്.
ഗുര്പ്രീത് സിങ് (25), ജസ്പ്രീത് സിങ് (30) എന്നിവരാണ് 309 പൗണ്ട് കൊക്കെയ്നുമായി യു എസിലെ ഇന്ത്യാന പുട്നാം കൗണ്ടിയില് പിടിയിലായത്. യു എസ് ഇമിഗ്രേഷന് ആന്ഡ് കസ്റ്റംസ് എന്ഫോഴ്സ്മെന്റാണ് ഇവരെ അറസ്റ്റ് ചെയ്തത്. ഇവര് സഞ്ചരിച്ചിരുന്ന ട്രക്കില് നിന്നാണ് കൊക്കെയ്ന് കണ്ടെത്തിയത്.
യു എസ് ഡിപ്പാര്ട്ട്മെന്റ് ഒഫ് ഹോംലാന്ഡ് സെക്യൂരിറ്റി (ഡി എച്ച് എസ്) ആണ് അറസ്റ്റ് വിവരം പുറത്തു വിട്ടത്. കസ്റ്റഡിയിലായവര് അനധികൃതമായി അമേരിക്കയില് താമസിക്കുകയായിരുന്നു. മോഷ്ടിച്ച വസ്തുക്കള് കൈവശം വച്ചതിന് ഇതിലൊരാള്ക്കെതിരെ നേരത്തെ കേസുണ്ടായിരുന്നു.
വാഹന പരിശോധനയ്ക്കിടെ ഇവര് സഞ്ചരിച്ച ലോറിയുടെ സ്ലീപ്പര് ബെര്ത്തില് നിന്ന് കൊക്കെയ്ന് കണ്ടെടുക്കുകയായിരുന്നു. ഗുര്പ്രീത് സിങ് 2023 മാര്ച്ച് 11ന് അരിസോണയിലെ ലൂക്ക്വില്ലെ വഴി അനധികൃതമായി യു എസില് പ്രവേശിച്ചതായി ഡിപ്പാര്ട്ട്മെന്റ് അറിയിച്ചു. താന് ഇന്ത്യക്കാരന് ആണെന്നും അനധികൃതമായി യു എസില് താമസിക്കുകയാണെന്നും ഇയാള് പൊലീസിനോട് സമ്മതിച്ചു.
ജസ്പ്രീത് സിങ് 2017 മാര്ച്ച് 21ന് കാലിഫോര്ണിയയിലെ ഓട്ടേ മെസ വഴിയാണ് അനധികൃതമായി യു എസില് പ്രവേശിച്ചത്. 2025 ഡിസംബര് അഞ്ചിന് കാലിഫോര്ണിയയിലെ സാന് ബെര്ണാഡിനോയില് മോഷ്ടിച്ച വസ്തുക്കള് കൈവശം വച്ചതിന് ഇയാളെ അറസ്റ്റ് ചെയ്തിരുന്നുവെങ്കിലും ഇമിഗ്രേഷന് ആന്ഡ് കസ്റ്റംസ് എന്ഫോഴ്സ്മെന്റ് ഇയാളെ വിട്ടയക്കുകയായിരുന്നു.