മെക്സിക്കോ സിറ്റി: തങ്ങള്‍ക്ക് നീതി വിധിക്കാനുള്ള ജഡ്ജിമാരെ തെരഞ്ഞെടുക്കാന്‍ തെരഞ്ഞെടുപ്പില്‍ വിധിയെഴുതുന്ന ലോകത്തിലെ ആദ്യത്തേയും ഒരേയൊരു രാജ്യവുമായി മെക്സിക്കോ. തങ്ങളുടെ ഫെഡറല്‍, സ്റ്റേറ്റ് ജഡ്ജിമാരെ തെരഞ്ഞെടുക്കാന്‍ മെക്സിക്കോക്കാര്‍ ഞായറാഴ്ചയാണ് പോളിംഗ് ബൂത്തിലേക്ക് പോയത്. ആദ്യഘട്ടത്തില്‍ രാജ്യത്തെ 2700 ജഡ്ജിമാരെ തെരഞ്ഞെടുക്കാനാണ് ജനങ്ങള്‍ക്ക് ഭാഗ്യം കിട്ടിയിരിക്കുന്നത്. പകുതിയോളം ജഡ്ജിമാരെയാണ് ആദ്യഘട്ടത്തില്‍ തെരഞ്ഞെടുക്കുന്നത്. അടുത്ത ഘട്ടത്തില്‍ ബാക്കി പകുതി ജഡ്ജിമാരേയും തെരഞ്ഞെടുക്കും. രണ്ടാംഘട്ട തെരഞ്ഞെടുപ്പ് 2027ലാണ് നടക്കുക.
ജനങ്ങള്‍ ജഡ്ജിമാരെ തെരഞ്ഞെടുക്കുന്നതിലൂടെ അഴിമതി ഇല്ലാതാക്കാനാകുമെന്നാണ് സര്‍ക്കാറിന്റെ ഭാഷ്യം. എന്നാല്‍ ജുഡീഷ്യറിയുടെ നിയന്ത്രണം ഭരണകക്ഷിക്ക് ലഭിക്കുമെന്നും ക്രിമിനല്‍ ബന്ധങ്ങളുള്ള ചിലര്‍ രാജ്യത്തെ നീതിപീഠങ്ങളിലേക്ക് തെരഞ്ഞെടുക്കപ്പെടുമെന്നും എതിരാളികള്‍ ആശങ്കപ്പെടുന്നുണ്ട്.
തെരഞ്ഞെടുക്കപ്പെടാനുള്ള മത്സരത്തില്‍ ഏകദേശം 7,800 ജഡ്ജി സ്ഥാനാര്‍ഥികളാണ് രംഗത്തുണ്ടായിരുന്നത്.
യു എസില്‍ പല സംസ്ഥാനങ്ങളും ജഡ്ജിമാരെ തെരഞ്ഞെടുക്കുന്നുണ്ടെങ്കിലും ഫെഡറല്‍ ജഡ്ജിമാരെ പ്രസിഡന്റ് നാമനിര്‍ദ്ദേശം ചെയ്യുകയും സെനറ്റ് സ്ഥിരീകരിക്കുകയുമാണ് ചെയ്യുന്നത്.
മെക്സിക്കോ സുപ്രിം കോടതിയിലെ ഒമ്പത് ജഡ്ജിമാര്‍ ഉള്‍പ്പെടെ രാജ്യത്തെ പകുതിയോളം ഫെഡറല്‍ ജഡ്ജിമാരാണ് പുതുതായി തെരഞ്ഞെടുക്കപ്പെടുക. പുതിയ മജിസ്ട്രേട്ടുമാര്‍ ചുമതലയേല്‍ക്കുന്നതോടെ പ്രസിഡന്റ് ക്ലോഡിയ ഷെയിന്‍ബോമും ഭരണകക്ഷിയായ മൊറീന പാര്‍ട്ടിയും വോട്ടെടുപ്പില്‍ ഉയര്‍ന്ന വിജയം നേടുന്ന സമയത്ത് ഉണ്ടായിരുന്ന ജഡ്ജിമാര്‍ക്ക് സ്ഥാനചലനം സംഭവിക്കും.
സ്ഥാനാര്‍ഥികളില്‍ മൂന്നില്‍ രണ്ട് പേരെയും എക്സിക്യൂട്ടീവ് ബ്രാഞ്ചും കോണ്‍ഗ്രസും തെരഞ്ഞെടുത്തു. മൊറിനയ്ക്ക് അവിടെ വലിയ ഭൂരിപക്ഷമാണുള്ളത്.
ജുഡീഷ്യല്‍ തെരഞ്ഞെടുപ്പ് മെക്സിക്കോയെ കൂടുതല്‍ നീതിയുക്തമായ സമൂഹമാക്കി മാറ്റാന്‍ സഹായിക്കുമെന്ന് ഷെയിന്‍ബോം പറയുന്നുണ്ടെങ്കിലും വിരമിക്കുന്ന ഫെഡറല്‍ ജഡ്ജിമാരില്‍ പലരും സിവിക് ഗ്രൂപ്പുകളും ജുഡീഷ്യല്‍ സമ്പ്രദായത്തെ പുനഃസ്ഥാപിക്കുന്നത് അധികാര കൈയേറ്റമാണെന്നും അത് പരിശോധനകളും സന്തുലിതാവസ്ഥയും ഇല്ലാതാക്കുമെന്നും കുറ്റപ്പെടുത്തുന്നു. ഷെയിന്‍ബോം വളരെക്കാലമായി വിമര്‍ശിച്ചിട്ടുള്ള സ്വേച്ഛാധിപത്യ ഭൂതകാലത്തിലേക്കാണ് പുതിയ തീരുമാനം മെക്സിക്കോയെ തിരികെ കൊണ്ടുപോവുകയെന്നും അവര്‍ പറയുന്നു.
മെക്സിക്കോയുടെ ഇന്‍സ്റ്റിറ്റിയൂഷണല്‍ റെവല്യൂഷണറി പാര്‍ട്ടി 20-ാം നൂറ്റാണ്ടിന്റെ ഭൂരിഭാഗവും വലിയ എതിര്‍പ്പില്ലാതെയാണ് രാജ്യം ഭരിച്ചത്. ഷെയിന്‍ബോമിന്റെ മൊറീന പാര്‍ട്ടി പ്രസിഡന്റ് സ്ഥാനവും മിക്ക സംസ്ഥാന ഗവര്‍ണര്‍ സ്ഥാനങ്ങളും കോണ്‍ഗ്രസിന്റെ മൂന്നില്‍ രണ്ട് ഭാഗവും വഹിക്കുന്നു.
അഴിമതി നിറഞ്ഞ ജുഡീഷ്യറിയോടുള്ള വ്യാപകമായ അതൃപ്തി സര്‍വേകളില്‍ വ്യക്തമായെന്നും നീതി ലഭ്യമാകാന്‍ കാലതാമസമെടുക്കുന്നതായും കുറ്റകൃത്യങ്ങള്‍ റിപ്പോര്‍ട്ട് ചെയ്യപ്പെടാതെയും ശിക്ഷിക്കപ്പെടാതെയും പോകുന്നതായും ആരോപണങ്ങളുണ്ട്. എന്നാല്‍ ജഡ്ജിമാരേക്കാള്‍ പൊലീസിന്റെയും പ്രോസിക്യൂട്ടര്‍മാരുടെയും ഭാഗത്തു നിന്നാണ് നിയമവ്യവസ്ഥയുടെ ഏറ്റവും വലിയ പരാജയമെന്നാണ് ഹ്യൂമന്‍ റൈറ്റ്സ് വാച്ച് പറയുന്നത്.
കോടിക്കണക്കിന് ഡോളര്‍ നിക്ഷേപം ആകര്‍ഷിക്കാനുള്ള മെക്സിക്കോയുടെ ശ്രമങ്ങളെ ഈ പരിഷ്‌കരണം പ്രതികൂലമായി ബാധിക്കുന്നുവെന്നും യു എസ്, കാനഡ, മെക്സിക്കോ എന്നിവ സ്വതന്ത്ര വ്യാപാര ഉടമ്പടി പുനഃപരിശോധിക്കാന്‍ തയ്യാറെടുക്കുന്നതിനാല്‍ മെക്സിക്കോയെ ബാധിക്കാന്‍ സാധ്യതയുണ്ടെന്നും ബിസിനസ് രംഗത്തുള്ളവര്‍ പറയുന്നു. ജൂണ്‍ ആദ്യം മുതല്‍ ഡോളറിനെതിരെ പെസോയുടെ മൂല്യം 2.5 ശതമാനത്തിലധികം കുറഞ്ഞു.
സ്വതന്ത്ര മജിസ്‌ട്രേറ്റുകളെ ആവശ്യപ്പെടുന്ന സ്വതന്ത്ര വ്യാപാര ഉടമ്പടി വ്യവസ്ഥകള്‍ ജുഡീഷ്യല്‍ തെരഞ്ഞെടുപ്പുകള്‍ ലംഘിക്കുന്നുവെന്ന് അമേരിക്കന്‍ ചേംബര്‍ ഓഫ് കൊമേഴ്‌സ് ഓഫ് മെക്സിക്കോ പറഞ്ഞു. മെക്സിക്കന്‍ നിയമത്തിന്റെ വ്യതിയാനങ്ങള്‍ക്കെതിരെ സ്വയം പരിരക്ഷിക്കുന്നതിന് വിദേശ നിക്ഷേപകര്‍ നിക്ഷേപ കരാറുകളില്‍ അന്താരാഷ്ട്ര മധ്യസ്ഥ വ്യവസ്ഥകള്‍ കൂടുതലായി ഉള്‍പ്പെടുത്തുന്നു.
നീതിന്യായ വ്യവസ്ഥയിലെ ഈ മാറ്റം കോടതിക്ക് നിയമത്തിന് മുന്നില്‍ നീതി നല്‍കാന്‍ കഴിയുമോ എന്ന് ചോദ്യം ചെയ്യുന്നുവെന്ന് യു എസ് തിങ്ക് ടാങ്കായ കൗണ്‍സില്‍ ഓണ്‍ ഫോറിന്‍ റിലേഷന്‍സിലെ വിശകലന വിദഗ്ധന്‍ ഷാനന്‍ ഒ'നീല്‍ പറഞ്ഞു.
യോഗ്യതയില്ലാത്ത ചിലരെങ്കിലും മജിസ്‌ട്രേട്ടുമാരായി ഉയരാന്‍ സാധ്യതയുണ്ട്. കൊടും കുറ്റവാളികളെ പൂട്ടിയിട്ടിരിക്കുന്ന ഉയര്‍ന്ന സുരക്ഷയുള്ള ജയിലുകളില്‍ ജോലി ചെയ്യുന്ന ജഡ്ജിമാരുടെ തെരഞ്ഞെടുപ്പുകളെ സ്വാധീനിക്കാന്‍ മയക്കുമരുന്ന് കാര്‍ട്ടലുകള്‍ ശ്രമിച്ചേക്കാമെന്ന് മെക്സിക്കോ സിറ്റി ആസ്ഥാനമായുള്ള സുരക്ഷാ ഉപദേഷ്ടാവായ എഡ്വേര്‍ഡോ ഗ്വെറേറോ പറഞ്ഞു.