ഫ്‌ളൈദുബായ് വിമാനത്തിലെ കോക്പിറ്റ് സംഘര്‍ഷം ഉയര്‍ത്തുന്നത് നിരവധി ചോദ്യങ്ങള്‍; പൈലറ്റ് പരിശോധനയും വ്യോമയാന സുരക്ഷയും വീണ്ടും ചര്‍ച്ചയില്‍
ദുബായ്: ആകാശത്ത് പറന്നുകൊണ്ടിരുന്ന വിമാനം. കോക്പിറ്റില്‍ രണ്ട് പൈലറ്റുമാര്‍. പെട്ടെന്ന് ഇരുവരും തമ്മില്‍ സംഘര്‍ഷം. വിമാനം അതിവേഗം താഴേക്ക് പതിക്കുന്നു. ഒടുവില്‍ പരിക്കേറ്റ ക്യാപ്റ്റന് തന്നെ കോക്പിറ്റ് വാതില്‍ തുറക്കുന്നു. യാത്രക്കാരും ജീവനക്കാരും അകത്തേക്ക് കയറി ആക്രമണകാരിയെന്ന് ആരോപിക്കപ്പെടുന്ന കോ-പൈലറ്റിനെ കീഴടക്കുന്നു. മറ്റൊരു ദുരന്തം ഒഴിവാകുന്നു.
ഇത് ഫ്‌ളൈദുബായ് വിമാനമായ എഫ് ഇസഡ് 1073ല്‍ സംഭവിച്ചതായി റിപ്പോര്‍ട്ട് ചെയ്യപ്പെട്ട സംഭവമാണ്. ദുബായില്‍ നിന്ന് ടെല്‍ അവീവിലേക്ക് പുറപ്പെട്ട വിമാനമാണ് സംഭവത്തെ തുടര്‍ന്ന് സൗദി അറേബ്യയിലെ തബൂക്കിലേക്ക് തിരിച്ചുവിട്ടത്.
സംഭവം വിമാനയാത്രയുടെ സുരക്ഷയെക്കുറിച്ച് മാത്രമല്ല, ഒരു നിര്‍ണായക ചോദ്യവും ഉയര്‍ത്തുന്നു: ക്യാപ്റ്റനെ ആക്രമിച്ചുവെന്ന് ആരോപിക്കപ്പെടുന്ന കോ-പൈലറ്റിന് എങ്ങനെ വിമാനമോടിക്കാന്‍ അനുമതി ലഭിച്ചു? അതിന് ഇപ്പോള്‍ വ്യക്തമായ ഉത്തരമില്ല.
ആകാശത്ത് സംഭവിച്ചത് എന്ത്?
പ്രാദേശിക സമയം രാവിലെ 8.44ഓടെയാണ് അടിയന്തര സന്ദേശം ലഭിച്ചതെന്നാണ് റിപ്പോര്‍ട്ടുകള്‍. ദുബായില്‍ നിന്ന് പറന്നുയര്‍ന്ന് ഏകദേശം രണ്ടര മണിക്കൂറിന് ശേഷമായിരുന്നു ഇത്.
ഇസ്രയേല്‍ അധികൃതരുടെ പ്രാഥമിക വിവരങ്ങള്‍ പ്രകാരം, വിമാനത്തിന്റെ ക്യാപ്റ്റനും കോ-പൈലറ്റും തമ്മില്‍ സംഘര്‍ഷമുണ്ടായി. ഏകദേശം ഒരു മിനിറ്റിനുള്ളില്‍ വിമാനം 33,000 അടി ഉയരത്തില്‍ നിന്ന് 17,000 അടിയിലേക്ക് താഴ്ന്നു.
ഒരു പൈലറ്റ് മറ്റൊരാളെ കുത്തിപ്പരിക്കേല്‍പ്പിക്കുകയും തുടര്‍ന്ന് വിമാനം തകര്‍ക്കാന്‍ ശ്രമിക്കുകയും ചെയ്തുവെന്നാണ് ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹുവിന്റെ ആരോപണം.
പരിക്കേറ്റ ക്യാപ്റ്റന് സ്മിത് മച്ച്ഛര്‍ കോക്പിറ്റ് വാതില്‍ തുറക്കാനുള്ള സംവിധാനം സജീവമാക്കിയതോടെ യാത്രക്കാരും ജീവനക്കാരും അകത്തേക്ക് പ്രവേശിക്കുകയും ആക്രമണകാരിയെന്ന് ആരോപിക്കപ്പെടുന്ന കോ-പൈലറ്റിനെ കീഴടക്കുകയും ചെയ്തതായി ഇസ്രയേല്‍ മാധ്യമങ്ങള്‍ റിപ്പോര്‍ട്ട് ചെയ്തു.
തുടര്‍ന്ന് വിമാനത്തിലുണ്ടായിരുന്ന അധിക പരിശീലനം നേടിയ ജീവനക്കാര്‍ നിയന്ത്രണം ഏറ്റെടുത്തു. ഏകദേശം ഒരു മണിക്കൂറിന് ശേഷം വിമാനം സുരക്ഷിതമായി സൗദി അറേബ്യയിലെ തബൂക്കില്‍ ഇറക്കി. ഇരുപൈലറ്റുകള്‍ക്കും പരിക്കേറ്റിരുന്നു.
അന്വേഷണം പ്രഖ്യാപിച്ച് യു എ ഇ
സംഭവത്തില്‍ യു എ ഇ അന്വേഷണം പ്രഖ്യാപിച്ചു. സംഭവത്തിന്റെ യഥാര്‍ഥ വസ്തുതകളും സാഹചര്യങ്ങളും വിശദാംശങ്ങളും ലക്ഷ്യവും കണ്ടെത്തുന്നതിനായി വിവരങ്ങളും തെളിവുകളും ശേഖരിക്കുമെന്ന് യു എ ഇ അറ്റോര്‍ണി ജനറല്‍ ഹമദ് സൈഫ് അല്‍ ഷംസി അറിയിച്ചു.
സംഭവത്തിന് ഏതെങ്കിലും ഭീകരപ്രവര്‍ത്തനവുമായി ബന്ധമുണ്ടോ, നേരത്തെ ആസൂത്രണമോ നിര്‍ദേശമോ ഉണ്ടായിരുന്നോ തുടങ്ങിയ കാര്യങ്ങളും അന്വേഷണത്തില്‍ പരിശോധിക്കും.
സൗദി അറേബ്യ ഇതുവരെ സംഭവവുമായി ബന്ധപ്പെട്ട കൂടുതല്‍ വിശദാംശങ്ങള്‍ പുറത്തുവിട്ടിട്ടില്ല.
അതേസമയം, കോ-പൈലറ്റിന്റെ പൗരത്വം പോലും ഔദ്യോഗികമായി സ്ഥിരീകരിച്ചിട്ടില്ല. ആക്രമണത്തിന് പിന്നിലെ ഉദ്ദേശ്യവും വ്യക്തമല്ല.
'ജിഹാദി ആക്രമണം' എന്ന വാദം; പക്ഷേ തെളിവെവിടെ?
സംഭവം പുറത്തുവന്നതിനു പിന്നാലെ ചില ഇസ്രയേല്‍ ഉദ്യോഗസ്ഥര്‍ ഇതിനെ 'ജിഹാദിസ്റ്റ് ആക്രമണം' എന്ന് വിശേഷിപ്പിച്ചിരുന്നു.
എന്നാല്‍ നെതന്യാഹു തന്നെ സംഭവത്തിന് പിന്നിലെ ഉദ്ദേശ്യം സംബന്ധിച്ച് ഇപ്പോള്‍ വ്യക്തമായ നിഗമനത്തിലെത്താന്‍ സമയമായിട്ടില്ലെന്ന് പറഞ്ഞു. ഇറാന്റെ പങ്കുണ്ടായിരുന്നോ എന്ന കാര്യത്തിലും അന്വേഷണം പൂര്‍ത്തിയാകാതെ പറയാനാകില്ലെന്നാണ് അദ്ദേഹത്തിന്റെ നിലപാട്.
കോ-പൈലറ്റിനെതിരെ ഇതുവരെ കുറ്റപത്രം സമര്‍പ്പിച്ചിട്ടില്ല. ഇയാളെ സൗദി അധികൃതര്‍ കസ്റ്റഡിയിലെടുത്തതായാണ് ലഭിക്കുന്ന വിവരം.
വ്യോമയാന സ്ഥാപനവും സൗദി അധികൃതരും അന്വേഷണം തുടരുകയാണെന്നും ഊഹാപോഹങ്ങള്‍ ഒഴിവാക്കണമെന്നും ആവശ്യപ്പെട്ടിട്ടുണ്ട്.
പൈലറ്റിന് പറക്കാന്‍ അനുമതി നല്‍കുന്നത് എങ്ങനെയാണ്?
ഫ്‌ളൈദുബായ് യു എ ഇ ആസ്ഥാനമായുള്ള വിമാനക്കമ്പനിയാണ്. കമ്പനിയുടെ സര്‍ട്ടിഫിക്കേഷനും പ്രവര്‍ത്തന സുരക്ഷാ മേല്‍നോട്ടവും യു എ ഇ ജനറല്‍ സിവില്‍ ഏവിയേഷന്‍ അതോറിറ്റിയുടെ (ജി സി എ എ) ചുമതലയിലാണ്.
വിമാന ജീവനക്കാരുടെ യോഗ്യതയും പറക്കാനുള്ള ശാരീരിക- മാനസിക ശേഷിയും സംബന്ധിച്ച വ്യവസ്ഥകള്‍ പാലിക്കുന്നുണ്ടെന്ന് ഉറപ്പാക്കുന്നതും ഈ മേല്‍നോട്ടത്തിന്റെ ഭാഗമാണെന്ന് യൂറോപ്യന്‍ യൂണിയന്‍ ഏവിയേഷന്‍ സേഫ്റ്റി ഏജന്‍സി (ഇ എ എസ് എ) റോയിട്ടേഴ്സിനോട് വ്യക്തമാക്കി.
സാധാരണയായി ഒരു പ്രൊഫഷണല്‍ പൈലറ്റ് ലൈസന്‍സ്, ബന്ധപ്പെട്ട വിമാനത്തിന്റെ ടൈപ്പ് റേറ്റിങ്, സാധുവായ ക്ലാസ്-1 മെഡിക്കല്‍ സര്‍ട്ടിഫിക്കറ്റ്, ഇംഗ്ലീഷ് ഭാഷാ പരിജ്ഞാനം, ആവശ്യമായ പറക്കല്‍ പരിചയം എന്നിവ പൈലറ്റിന് ആവശ്യമാണ്.
ക്ലാസ്-1 മെഡിക്കല്‍ പരിശോധനയില്‍ ശാരീരികാരോഗ്യത്തിനൊപ്പം മാനസികാരോഗ്യവും പരിശോധിക്കും. ചില മാനസികാരോഗ്യ പ്രശ്‌നങ്ങള്‍, ലഹരി ഉപയോഗവുമായി ബന്ധപ്പെട്ട പ്രശ്‌നങ്ങള്‍ തുടങ്ങിയവ കണ്ടെത്തിയാല്‍ കൂടുതല്‍ പരിശോധനകള്‍ക്ക് വിധേയമാക്കിയ ശേഷമേ പൈലറ്റിനെ പറക്കാന്‍ യോഗ്യനായി പ്രഖ്യാപിക്കൂ.
എന്നിട്ടും പരിശോധനകള്‍ക്ക് പരിമിതിയുണ്ട്
പൈലറ്റുമാരുടെ പശ്ചാത്തല പരിശോധന വളരെ വിശദമായതാണെന്ന് ലണ്ടന്‍ ആസ്ഥാനമായ സ്ട്രാറ്റജിക്ക് എയ്‌റോ റിസേര്‍ച്ചസ് ചീഫ് അനലിസ്റ്റ് സാജ് അഹമ്മദ് പറയുന്നു.
സുരക്ഷാ പരിശോധനകള്‍ മുതല്‍ സാമ്പത്തിക പശ്ചാത്തല പരിശോധനയും മാനസികാരോഗ്യ വിലയിരുത്തലും വരെ ഇതിന്റെ ഭാഗമാണ്. എന്നാല്‍ ഇത്തരം പരിശോധനകള്‍ ഒരു വ്യക്തിയുടെ ജീവിതത്തിലെ ഒരു പ്രത്യേക സമയത്തെ അവസ്ഥ മാത്രമാണ് രേഖപ്പെടുത്തുന്നതെന്നും പിന്നീട് ജോലി സ്ഥലത്തോ കോക്പിറ്റിലോ ഉണ്ടാകാവുന്ന പ്രശ്‌നങ്ങള്‍ മുന്‍കൂട്ടി കണ്ടെത്തണമെന്നില്ലെന്നും അദ്ദേഹം ചൂണ്ടിക്കാട്ടുന്നു.
അതാണ് ഈ സംഭവത്തിലെ ഏറ്റവും വലിയ ചോദ്യങ്ങളിലൊന്ന്.
ഒരു പൈലറ്റിന്റെ സര്‍ട്ടിഫിക്കറ്റുകളും മെഡിക്കല്‍ രേഖകളും പരിശോധിച്ച് അയാള്‍ക്ക് വിമാനമോടിക്കാന്‍ നിയമപരമായ യോഗ്യതയുണ്ടെന്ന് ഉറപ്പാക്കാം. എന്നാല്‍ അയാള്‍ അടുത്ത ദിവസം എന്ത് ചെയ്യുമെന്ന് ഒരു സര്‍ട്ടിഫിക്കറ്റിനും ഉറപ്പാക്കാനാകുമോ?
ഈ ചോദ്യത്തിനുള്ള ഉത്തരം വ്യോമയാന മേഖലയ്ക്ക് എളുപ്പമല്ല.
ഇസ്രയേലിലേക്കുള്ള പൈലറ്റുമാരുടെ പരിശോധന ശക്തമാക്കും
യു എ ഇയും ഇസ്രയേലും തമ്മിലുള്ള ധാരണ പ്രകാരം ഇസ്രയേലുമായി നയതന്ത്രബന്ധമുള്ള രാജ്യങ്ങളുടെ പാസ്പോര്‍ട്ട് കൈവശമുള്ള പൈലറ്റുമാര്‍ക്ക് മാത്രമേ അവിടെ ഇറങ്ങാന്‍ അനുമതിയുള്ളൂ എന്ന അവകാശവാദവും ഇസ്രയേല്‍ മാധ്യമങ്ങളില്‍ ഉയര്‍ന്നിട്ടുണ്ട്. എന്നാല്‍ ഈ അവകാശവാദം സ്വതന്ത്രമായി സ്ഥിരീകരിക്കാന്‍ കഴിഞ്ഞിട്ടില്ല.
ഇസ്രയേലിലേക്ക് പറക്കുന്ന പൈലറ്റുമാരുടെ സുരക്ഷാ പരിശോധന ശക്തമാക്കുമെന്ന് ഇസ്രയേല്‍ വ്യക്തമാക്കിയിട്ടുണ്ട്.
'ഇസ്രയേലിലേക്ക് പറക്കുന്ന ഓരോ പൈലറ്റിന്റെയും വ്യക്തിത്വം ഞങ്ങള്‍ അറിയുകയും അവരുടെ സുരക്ഷാ പരിശോധന നടത്തുകയും ചെയ്യും,' ഇസ്രയേല്‍ പ്രധാനമന്ത്രിയുടെ ഓഫീസ് വക്താവ് ഡോറോണ്‍ സ്പില്‍മാന്‍ പറഞ്ഞു.
ക്യാപ്റ്റന് സ്മിത് മച്ച്ഛര്‍: 15 വര്‍ഷത്തെ പറക്കല്‍ പരിചയം
സംഭവത്തില്‍ പരിക്കേറ്റ ഇന്ത്യന്‍ പൈലറ്റ് സ്മിത് മച്ച്ഛറിനെ ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹുവും ഇന്ത്യന്‍ പ്രധാനമന്ത്രി നരേന്ദ്ര മോഡിയും പ്രശംസിച്ചിട്ടുണ്ട്.
മുംബൈയിലെ ഒരു നഗരപ്രാന്ത പ്രദേശത്ത് നിന്നുള്ള മച്ച്ഛര്‍ ഇപ്പോള്‍ ഭാര്യയ്ക്കും രണ്ട് മക്കള്‍ക്കുമൊപ്പം ദുബായിലാണ് താമസിക്കുന്നത്. സൗദി അറേബ്യയിലെ തബൂക്കിലെ ആശുപത്രിയില്‍ ചികിത്സയിലായിരുന്ന അദ്ദേഹത്തെ യു എ ഇയിലേക്ക് മാറ്റിയിട്ടുണ്ട്.
കോക്പിറ്റ് വാതില്‍ തുറക്കാന്‍ കഴിഞ്ഞതാണ് വിമാനത്തിലെ മറ്റുള്ളവര്‍ക്ക് അകത്ത് പ്രവേശിച്ച് കോ-പൈലറ്റിനെ കീഴടക്കാന്‍ അവസരം നല്‍കിയതെന്നാണ് ലഭിക്കുന്ന വിവരം.
മച്ച്ഛറിന്റെ ലിങ്കഡ്ഇന്‍ പ്രൊഫൈല്‍ പ്രകാരം ഏകദേശം 15 വര്‍ഷത്തെ കരിയറില്‍ അദ്ദേഹം 9,750 മണിക്കൂറോളം വിമാനം പറത്തിയിട്ടുണ്ട്.
2022ല്‍ ഫ്‌ളൈദുബായിയില്‍ ചേരുന്നതിന് മുമ്പ് ഇന്ത്യന്‍ വിമാനക്കമ്പനിയായ സ്‌പൈസ്ജെറ്റില്‍ ഒരു ദശാബ്ദത്തിലേറെ ജോലി ചെയ്തിരുന്നു. ഏകദേശം 11 വര്‍ഷമാണ് അദ്ദേഹം സ്‌പൈസ്ജെറ്റില്‍ ചെലവഴിച്ചത്.
പഠനകാലത്താണ് മച്ച്ഛറിന് പൈലറ്റാകാനുള്ള താത്പര്യം ഉണ്ടായത്. ആദ്യം ടെക്‌സ്‌റ്റൈല്‍ എന്‍ജിനീയറിങ് പഠിക്കാന്‍ ചേര്‍ന്നെങ്കിലും പിന്നീട് മാനേജ്‌മെന്റ് പഠനത്തിലേക്ക് മാറി. മുംബൈയിലെ വെലിങ്കര്‍ ഇന്‍സ്റ്റിറ്റ്യൂട്ട് ഓഫ് മാനേജ്‌മെന്റില്‍ പഠിക്കുന്നതിനിടെ നടന്ന ഒരു വ്യോമയാന സെമിനാറാണ് അദ്ദേഹത്തിന്റെ ജീവിതത്തില്‍ വഴിത്തിരിവായത്.
19-ാം വയസ്സില്‍ അവിടെവെച്ചാണ് പറക്കലിനോടുള്ള താത്പര്യം ശക്തമായതെന്ന് അദ്ദേഹത്തിന്റെ പ്രൊഫൈല്‍ വ്യക്തമാക്കുന്നു. തുടര്‍ന്ന് ന്യൂസിലന്‍ഡില്‍ പരിശീലനം നേടിയ അദ്ദേഹം സ്‌പൈസ്ജെറ്റില്‍ ചേര്‍ന്നു.
'വിമാനത്തില്‍ നിന്ന് പുറത്തിറങ്ങുന്നതാണ് പ്രധാനം'
2025ല്‍ ഒരു യൂട്യൂബ് പോഡ്കാസ്റ്റില്‍ മച്ച്ഛര്‍ പറഞ്ഞ ചില വാക്കുകളും ഇപ്പോള്‍ ശ്രദ്ധ നേടുന്നുണ്ട്.
വിമാനത്തില്‍ നിന്ന് പുറത്തിറങ്ങുമ്പോള്‍ താന്‍ പൈലറ്റാണെന്ന് മറ്റുള്ളവര്‍ അറിയേണ്ടതില്ലെന്നും യൂണിഫോം ധരിച്ചിരിക്കുന്ന സമയത്ത് ജോലി കൃത്യമായി ചെയ്യുക മാത്രമാണ് പ്രധാനമെന്നും അദ്ദേഹം പറഞ്ഞിരുന്നു.
കോക്പിറ്റില്‍നിന്ന് പുറത്തിറങ്ങിയാല്‍ ജോലി അവിടെ അവസാനിക്കുന്നു. കുടുംബത്തിനും കുട്ടികള്‍ക്കുമൊപ്പം സമയം ചെലവഴിക്കുകയാണ് പിന്നീടുള്ള ജീവിതമെന്നായിരുന്നു അദ്ദേഹത്തിന്റെ വാക്കുകളുടെ സാരം.
ഇന്ന് ആ വാക്കുകള്‍ക്ക് മറ്റൊരു അര്‍ഥം കൂടി ലഭിച്ചിരിക്കുകയാണ്. ഒരു പൈലറ്റിന്റെ തൊഴില്‍ ജീവിതവും വ്യക്തിജീവിതവും തമ്മിലുള്ള അതിരുകള്‍ എത്ര സൂക്ഷ്മമാണെന്ന ഓര്‍മപ്പെടുത്തല്‍.
കോക്പിറ്റിനുള്ളിലെ അക്രമം എത്ര അപൂര്‍വം?
വിമാനത്തിന്റെ കോക്പിറ്റിനുള്ളില്‍ പൈലറ്റുമാര്‍ തമ്മില്‍ ഉദ്ദേശപൂര്‍വം അക്രമത്തിലേര്‍പ്പെടുന്ന സംഭവങ്ങള്‍ വളരെ അപൂര്‍വമാണ്.
എന്നാല്‍ വ്യോമയാന ചരിത്രത്തില്‍ ഇത്തരം സംഭവങ്ങള്‍ പൂര്‍ണമായും അപരിചിതമല്ല.
ജപ്പാന്‍ എയര്‍ലൈന്‍സ് 350, 1982: ടോക്കിയോയിലേക്ക് ഇറങ്ങുന്നതിനിടെ ക്യാപ്റ്റന് സെയ്ജി കറ്റാഗിരി മനഃപൂര്‍വം വിമാനം താഴേക്ക് തിരിച്ചുവിട്ടു. ഫസ്റ്റ് ഓഫീസര്‍ നിയന്ത്രണം മറികടക്കാന്‍ ശ്രമിക്കുകയും ഫ്‌ളൈറ്റ് എന്‍ജിനീയര്‍ ക്യാപ്റ്റനെ ശാരീരികമായി തടയുകയും ചെയ്തു. വിമാനം ഹനേദ വിമാനത്താവളത്തിന് സമീപം തകര്‍ന്നുവീണു. 174 പേരില്‍ 24 പേര്‍ മരിച്ചു.
പസഫിക് സൗത്ത്വെസ്റ്റ് എയര്‍ലൈന്‍സ് 1771, 1987: മുന്‍ ജീവനക്കാരനായ ഒരാള്‍ യാത്രക്കാരനായി വിമാനത്തില്‍ കയറി മുന്‍ മേലുദ്യോഗസ്ഥനെയും വിമാന ജീവനക്കാരെയും വെടിവെച്ചു. തുടര്‍ന്ന് വിമാനം അപകടകരമായി താഴേക്ക് പതിച്ചു. വിമാനത്തിലുണ്ടായിരുന്ന 43 പേരും മരിച്ചു.
ഫെഡ്എക്‌സ് 705, 1994: അവധിയിലായിരുന്ന ഫെഡ്എക്‌സ് ജീവനക്കാരന്‍ കോക്പിറ്റില്‍ പ്രവേശിച്ച് ഹാമറും മറ്റ് ആയുധങ്ങളും ഉപയോഗിച്ച് മൂന്ന് അംഗങ്ങളുള്ള വിമാന ജീവനക്കാരെ ആക്രമിച്ചു. ജീവനക്കാര്‍ അദ്ദേഹത്തെ കീഴടക്കി വിമാനം മെംഫിസില്‍ സുരക്ഷിതമായി ഇറക്കി.
ജര്‍മന്‍വിങ്‌സ് 9525, 2015: ഫസ്റ്റ് ഓഫീസര്‍ ആന്‍ഡ്രിയാസ് ലുബിറ്റ്‌സ് ക്യാപ്റ്റനെ കോക്പിറ്റിന് പുറത്താക്കി വിമാനം ഫ്രഞ്ച് ആല്‍പ്‌സിലേക്ക് മനഃപൂര്‍വം ഇടിച്ചിറക്കി. 150 പേരും മരിച്ചു. ഗുരുതരമായ മാനസികാരോഗ്യ പ്രശ്‌നമുള്ള ഒരു പൈലറ്റിന് ലൈസന്‍സ് ഉപയോഗിക്കുന്നത് തടയുന്നതില്‍ മെഡിക്കല്‍ സര്‍ട്ടിഫിക്കേഷന്‍ സംവിധാനത്തിന് വീഴ്ച സംഭവിച്ചെന്ന് ഫ്രാന്‍സിലെ അന്വേഷണ ഏജന്‍സി കണ്ടെത്തി.
ചൈന ഈസ്റ്റേണ്‍ എംയു 5735, 2022: ബോയിങ് 737-800 വിമാനം അപകടകരമായി താഴേക്ക് പതിക്കുന്നതിന് മുമ്പ് രണ്ട് എന്‍ജിന്‍ ഇന്ധന സ്വിച്ചുകളും കട്ട്ഓഫ് നിലയിലേക്ക് മാറ്റിയതായി യു എസ് നാഷണല്‍ ട്രാന്‍സ്പോര്‍ട്ടേഷന്‍ സേഫ്റ്റി ബോര്‍ഡിന്റെ വിവരങ്ങള്‍ സൂചിപ്പിക്കുന്നു. എന്നാല്‍ ആരാണ് അത് ചെയ്തത്, എന്തുകൊണ്ടാണ് ചെയ്തതെന്ന് സംബന്ധിച്ച അന്തിമ അന്വേഷണ റിപ്പോര്‍ട്ട് ചൈന ഇതുവരെ പുറത്തുവിട്ടിട്ടില്ല. വിമാനത്തിലുണ്ടായിരുന്ന 132 പേരും മരിച്ചു.
സുരക്ഷയുടെ അവസാന കണ്ണി ആരാണ്?
ഫ്‌ളൈദുബായ് സംഭവത്തില്‍ ഏറ്റവും നിര്‍ണായകമായ ചോദ്യം ഒരുപക്ഷേ ഇതാണ്: ഒരു പൈലറ്റിന്റെ യോഗ്യതയും മെഡിക്കല്‍ ഫിറ്റ്‌നസും പരിശോധിച്ച് കഴിഞ്ഞാല്‍, കോക്പിറ്റിനുള്ളിലെ മനുഷ്യന്റെ പെരുമാറ്റം എത്രത്തോളം പ്രവചിക്കാനാകും?
വ്യോമയാന സുരക്ഷ വര്‍ഷങ്ങളായി സാങ്കേതികവിദ്യയിലും പരിശീലനത്തിലും പരിശോധനയിലും വലിയ മുന്നേറ്റം നടത്തിയിട്ടുണ്ട്. എന്നാല്‍ ഏറ്റവും സങ്കീര്‍ണമായ ഘടകം ഇപ്പോഴും മനുഷ്യന്‍ തന്നെയാണ്.
ഫ്‌ളൈദുബായ് വിമാനത്തിലെ സംഭവത്തില്‍, പരിക്കേറ്റ ക്യാപ്റ്റന് കോക്പിറ്റ് വാതില്‍ തുറക്കാന്‍ കഴിഞ്ഞതും മറ്റ് പരിശീലനം നേടിയ ജീവനക്കാര്‍ക്ക് നിയന്ത്രണം ഏറ്റെടുക്കാന്‍ സാധിച്ചതുമാണ് ദുരന്തം ഒഴിവാക്കാന്‍ സഹായിച്ചതെന്ന് റിപ്പോര്‍ട്ടുകള്‍ പറയുന്നു.
അതിനാല്‍ അന്വേഷണം ഇനി ആക്രമണം എന്തുകൊണ്ട് സംഭവിച്ചു എന്നതില്‍ മാത്രം ഒതുങ്ങില്ല. ആക്രമണകാരിയെന്ന് ആരോപിക്കപ്പെടുന്ന വ്യക്തി എങ്ങനെ പൈലറ്റായി തെരഞ്ഞെടുക്കപ്പെട്ടു, അദ്ദേഹത്തിന്റെ പശ്ചാത്തല പരിശോധനയില്‍ എന്തെങ്കിലും സൂചനകള്‍ ഉണ്ടായിരുന്നോ, നിലവിലുള്ള സുരക്ഷാ സംവിധാനത്തില്‍ എന്തെങ്കിലും വിടവുണ്ടായിരുന്നോഈ ചോദ്യങ്ങള്‍ക്കും ഉത്തരം കണ്ടെത്തേണ്ടിവരും.
അന്വേഷണം പൂര്‍ത്തിയാകുന്നതുവരെ സംഭവത്തിന്റെ ഉദ്ദേശ്യത്തെക്കുറിച്ചോ ആക്രമണത്തിന്റെ സ്വഭാവത്തെക്കുറിച്ചോ അന്തിമ നിഗമനത്തിലെത്തുന്നത് നേരത്തെയാകും. എന്നാല്‍ ഒരു കാര്യം ഉറപ്പാണ്: ആകാശത്ത് ഏതാനും മിനിറ്റുകള്‍ക്കുള്ളില്‍ നടന്ന ഈ സംഘര്‍ഷം, വിമാനസുരക്ഷയുടെ ഏറ്റവും പഴയതും ഏറ്റവും ബുദ്ധിമുട്ടുള്ളതുമായ ചോദ്യത്തെ വീണ്ടും മുന്നിലെത്തിച്ചിരിക്കുന്നു യന്ത്രങ്ങളെ നിയന്ത്രിക്കുന്ന മനുഷ്യനെ എത്രത്തോളം നമുക്ക് പരിശോധിച്ചറിയാന്‍ കഴിയും?