വാഷിംഗ്ടണ്‍: 2001 സെപ്റ്റംബര്‍ 11ലെ ഭീകരാക്രമണത്തിന് ഗൂഢാലോചന നടത്തിയെന്ന് ആരോപിക്കപ്പെടുന്ന മൂന്ന് പേര്‍ വിചാരണയ്ക്ക് മുമ്പുള്ള കരാറില്‍ ഏര്‍പ്പെട്ടതായി യുഎസ് പ്രതിരോധ വകുപ്പ് അറിയിച്ചു.
ഖാലിദ് ഷെയ്ഖ് മുഹമ്മദ്, വാലിദ് മുഹമ്മദ് സാലിഹ് മുബാറക് ബിന്‍ അറ്റാഷ്, മുസ്തഫ അഹമ്മദ് ആദം അല്‍-ഹവ്‌സാവി എന്നീ മൂന്ന് പ്രതികള്‍ ക്യൂബയിലെ യുഎസ് നാവികസേനാ താവളമായ ഗ്വാണ്ടനാമോ ബേയില്‍ വര്‍ഷങ്ങളായി വിചാരണയില്ലാതെ തടവിലാണ്.
വധശിക്ഷ നടപ്പാക്കരുതെന്ന പ്രോസിക്യൂഷന്‍ കരാറിന് പകരമായി ഈ മൂന്നുപ്രതികളും കുറ്റസമ്മതം നടത്തുമെന്ന് യുഎസ് വാര്‍ത്താ ഏജന്‍സി റിപ്പോര്‍ട്ട് ചെയ്തു. അപേക്ഷയിലെ നിബന്ധനകള്‍ ഇതുവരെ പുറത്തുവിട്ടിട്ടില്ല.
ഭീകരതയ്‌ക്കെതിരായ യുദ്ധത്തിനും അഫ്ഗാനിസ്ഥാന്‍, ഇറാഖ് അധിനിവേശങ്ങള്‍ക്കും കാരണമായ അല്‍-ഖ്വയ്ദ ആക്രമണങ്ങളില്‍ ന്യൂയോര്‍ക്ക്, വിര്‍ജീനിയ, പെന്‍സില്‍വാനിയ എന്നിവിടങ്ങളില്‍ ഏകദേശം 3,000 പേര്‍ കൊല്ലപ്പെട്ടിരുന്നു.
1941ല്‍ 2,400 പേരുടെ ജീവന്‍ അപഹരിച്ച പേള്‍ ഹാര്‍ബറിന് ശേഷം യുഎസ് മണ്ണില്‍ നടന്ന ഏറ്റവും മാരകമായ ആക്രമണമായിരുന്നു 9/11.
പ്രോസിക്യൂട്ടര്‍മാര്‍ ഇരകളുടെ കുടുംബങ്ങളെ ഒരു കത്തിലൂടെ ഹര്‍ജിയെ സംബന്ധിച്ച വിവരങ്ങള്‍ അറിയിച്ചതായും ദി ന്യൂയോര്‍ക്ക് ടൈംസ് റിപ്പോര്‍ട്ടില്‍ പറയുന്നു.
സാധ്യമായ ശിക്ഷയായ വധശിക്ഷ ഇല്ലാതാക്കുന്നതിന് പകരമായി, കുറ്റപത്രത്തില്‍ പട്ടികപ്പെടുത്തിയ 2,976 പേരുടെ കൊലപാതകം ഉള്‍പ്പെടെ എല്ലാ കുറ്റങ്ങള്‍ക്കും കുറ്റം സമ്മതിക്കാന്‍ ഈ മൂന്ന് പ്രതികളും സമ്മതിച്ചതായി ചീഫ് പ്രോസിക്യൂട്ടര്‍ റിയര്‍ അഡ്മിറല്‍ ആരോണ്‍ റൂഗിന്റെ കത്തില്‍ പറയുന്നു.
സാധാരണക്കാരെ ആക്രമിക്കുക, യുദ്ധനിയമങ്ങള്‍ ലംഘിച്ച് കൊലപാതകം, തട്ടിക്കൊണ്ടുപോകല്‍, ഭീകരവാദം എന്നിവയുള്‍പ്പെടെ നിരവധി കുറ്റങ്ങളാണ് ഇവര്‍ക്കെതിരെ ചുമത്തിയിരിക്കുന്നത്.
അടുത്തയാഴ്ച തന്നെ അവര്‍ തങ്ങളുടെ ഹര്‍ജികള്‍ കോടതിയില്‍ ഔദ്യോഗികമായി സമര്‍പ്പിക്കുമെന്ന് പ്രതീക്ഷിക്കുന്നതായി ടൈംസ് റിപ്പോര്‍ട്ട് ചെയ്യുന്നു.
ഹൈജാക്കര്‍മാര്‍ പാസഞ്ചര്‍ വിമാനങ്ങള്‍ പിടിച്ചെടുത്ത് ന്യൂയോര്‍ക്കിലെ വേള്‍ഡ് ട്രേഡ് സെന്ററിലും വാഷിംഗ്ടണിന് പുറത്തുള്ള പെന്റഗണിലും തകര്‍ത്ത ആക്രമണത്തിന്റെ ശില്പി ഖാലിദ് ഷെയ്ഖ് മുഹമ്മദ് ആണെന്നാണ് വിശ്വസിക്കപ്പെടുന്നത്.
അമേരിക്കക്കാരനും എഞ്ചിനീയറുമായിരുന്ന മുഹമ്മദ് ഹവാസാവിയോടൊപ്പം 2003 മാര്‍ച്ചില്‍ പാക്കിസ്ഥാനില്‍ വെച്ചാണ് പിടിയിലായത്.
യുഎസ് കെട്ടിടങ്ങളില്‍ ഇടിച്ച് തകര്‍ക്കാന്‍ വിമാനങ്ങള്‍ ഹൈജാക്ക് ചെയ്യാനുള്ള ആശയം ഇവര്‍ ഒസാമ ബിന്‍ ലാദന് നല്‍കിയതായും പിന്നീട് ഹൈജാക്കര്‍മാരെ റിക്രൂട്ട് ചെയ്യാനും പരിശീലിപ്പിക്കാനും സഹായിച്ചതായും പ്രോസിക്യൂട്ടര്‍മാര്‍ അവകാശപ്പെട്ടു.
മുമ്പ് സെപ്റ്റംബറില്‍ ബൈഡന്‍ ഭരണകൂടം ഒരു അപേക്ഷയുടെ നിബന്ധനകള്‍ നിരസിച്ചതായി റിപ്പോര്‍ട്ടുണ്ട്.
പുതിയ കരാറിനെക്കുറിച്ച് ബുധനാഴ്ച (ജൂലൈ 31) പ്രസിഡന്റിന്റെ ഓഫീസിനെ അറിയിച്ചതായും ചര്‍ച്ചകളില്‍ ഒരു പങ്കും വഹിച്ചിട്ടില്ലെന്നും വൈറ്റ് ഹൗസ് ദേശീയ സുരക്ഷാ കൗണ്‍സില്‍ അറിയിച്ചു.
എന്നിരുന്നാലും, സെനറ്റ് ന്യൂനപക്ഷ നേതാവ് മിച്ച് മക്കോണല്‍ ഈ നീക്കത്തെ അപലപിച്ചു, 'തീവ്രവാദികളുമായി ചര്‍ച്ച ചെയ്യുന്നതിനേക്കാള്‍ മോശമായ ഒരേയൊരു കാര്യം അവര്‍ കസ്റ്റഡിയിലായതിന് ശേഷവും അവരുമായി ചര്‍ച്ച നടത്തുക എന്നതാണെന്ന് അദ്ദേഹം പറഞ്ഞു.
9/11 ആക്രമണത്തിന്റെ മുഖ്യ ആസൂത്രകരായ മൂന്നു പ്രതികള്‍ യുഎസുമായി അപ്പീല്‍ കരാറിലെത്തി
