ധാക്ക: ബംഗ്ലാദേശില്‍ നിന്നുള്ള ഒന്‍പത് വയസ്സുകാരന്‍ ചെസ് പ്രതിഭ റയാന്‍ റാഷിദ് മുഗ്ധ അഞ്ച് തവണ ലോക ചാമ്പ്യനും നോര്‍വീജിയന്‍ ഗ്രാന്‍ഡ്മാസ്റ്ററുമായ മാഗ്നസ് കാള്‍സണെ ഓണ്‍ലൈന്‍ ചെസ് മത്സരത്തില്‍ പരാജയപ്പെടുത്തി.
അസാധാരണ നേട്ടം ചെസ്സ് ലോകത്തെ മുഴുവന്‍ അത്ഭുതപ്പെടുത്തുകയും ബംഗ്ലാദേശിന് അഭിമാനമാവുകയും ചെയ്തു.
ജനുവരി 18ന് ഏറ്റവും വലിയ ഓണ്‍ലൈന്‍ ചെസ് പ്ലാറ്റ്ഫോമായ Chess.comലാണ് മത്സരം നടന്നത്. ധാക്കയിലെ സൗത്ത് പോയിന്റ് സ്‌കൂളിലെ മൂന്നാം ക്ലാസ് വിദ്യാര്‍ഥിയായ മുഗ്ധ തന്റെ പരിശീലകനായ നയിം ഹഖിന്റെ അക്കൗണ്ട് ഉപയോഗിച്ചാണ് കളിച്ചത്. കാരണം മുഗ്ധയ്ക്ക് ഇതുവരെ സ്വന്തമായി പ്രൊഫൈലോ ഔദ്യോഗിക ചെസ്സ് കിരീടമോ ഇല്ല.
'ബുള്ളറ്റ്' ഫോര്‍മാറ്റിലാണ് ഗെയിം കളിച്ചത്. കളിക്കാര്‍ക്ക് അവരുടെ നീക്കങ്ങള്‍ പൂര്‍ത്തിയാക്കാന്‍ ഒരു മിനിറ്റ് മാത്രമാണ് സമയം അനുവദിക്കുക. ഈ ഫോര്‍മാറ്റ് ഫിഡെ മാസ്റ്റേഴ്സ്, ഇന്റര്‍നാഷണല്‍ മാസ്റ്റേഴ്സ്, ഗ്രാന്‍ഡ്മാസ്റ്റേഴ്സ് എന്നിവര്‍ക്കിടയില്‍ ജനപ്രിയമാണ്.
പ്ലാറ്റ്ഫോമിലെ റാന്‍ഡം പെയറിംഗ് സിസ്റ്റമാണ് മുഗ്ധയെ അപ്രതീക്ഷിതമായി കാള്‍സണുമായി കളിക്ക് എത്തിച്ചത്. ആകസ്മികമായ ഒരു മൗസ് ക്ലിക്ക് കാള്‍സണ്‍ രാജ്ഞിയെ തെറ്റായ ചതുരത്തിലേക്ക് മാറ്റിയതാണ് മുഗ്ധയ്ക്ക് വിജയിക്കാനുള്ള അവസരം സൃഷ്ടിച്ചത്.
മുഗ്ധയുടെ വളര്‍ന്നുവരുന്ന നേട്ടങ്ങളുടെ പട്ടികയില്‍ ഏറ്റവും പുതിയതാണ് ഈ അത്ഭുതം. ബംഗ്ലാദേശില്‍ നിലവിലെ അണ്ടര്‍-10 ജൂനിയര്‍ ചാമ്പ്യനാണ് മുഗ്ധ. കഴിഞ്ഞ ഡിസംബറില്‍ ബാങ്കോക്കില്‍ നടന്ന ഏഷ്യന്‍ സ്‌കൂള്‍ ചെസ് ചാമ്പ്യന്‍ഷിപ്പില്‍ രാജ്യത്തെ പ്രതിനിധീകരിച്ചിരുന്നു.
കാള്‍സണെതിരായ വിജയം മുഗ്ധയെ ചെസ്സ് ലോകത്തിലെ ഏറ്റവും തിളക്കമുള്ള യുവ പ്രതിഭകളില്‍ ഒരാളായി മാറ്റി.
മുഗ്ധയുടെ പിതാവ് മഹ്ബൂബര്‍ റാഷിദും പരിശീലകനും അവന്റെ വിജയത്തില്‍ അതിയായ അഭിമാനം പ്രകടിപ്പിച്ചു. ബംഗ്ലാദേശിന് ഇത് പ്രചോദനത്തിന്റെ നിമിഷമാണെന്നാണ് അവര്‍ വിശേഷിപ്പിച്ചത്.