ഒട്ടാവ: കാനഡയില് ചൈന ശക്തമായ ചാരപ്രവര്ത്തനങ്ങളും ആഭ്യന്തര ഇടപെടലുകളും നടത്തുന്നുണ്ടെന്ന് കാനഡയുടെ ചാര ഏജന്സിയായ കനേഡിയന് സെക്യൂരിറ്റി ഇന്റലിജന്സ് സര്വീസ് (സി എസ് ഐ എസ്) വ്യക്തമാക്കി. 2025 വാര്ഷിക റിപ്പോര്ട്ടിലാണ് ഗുരുതരമായ ആരോപണങ്ങള് ഉന്നയിച്ചിരിക്കുന്നത്.
ചൈനയുടെ ഇന്റലിജന്സ് ഏജന്സികള് വ്യാജ കമ്പനികളുടെ പേരില് പ്രമുഖ ജോലി വെബ്സൈറ്റുകളില് കൃത്രിമ ജോലി പരസ്യങ്ങള് നല്കുന്നതിലൂടെ കാനഡക്കാരെ ലക്ഷ്യമിടുന്നതായാണ് റിപ്പോര്ട്ട്. രഹസ്യവിവരങ്ങളിലേക്ക് പ്രവേശനം ഉള്ളവരെയോ അത്തരത്തിലുള്ള ബന്ധങ്ങളുള്ളവരെയോ കണ്ടെത്തുകയാണ് ഇതിന്റെ ലക്ഷ്യം.
സാമ്പത്തിക ബുദ്ധിമുട്ടുകളും തൊഴില് ആഗ്രഹങ്ങളും മുതലെടുക്കുന്ന ഇത്തരം പരസ്യങ്ങളിലേക്ക് പലരും അറിയാതെയാണ് അപേക്ഷകള് നല്കുന്നതെന്ന് സി എസ് ഐ എസ് ചൂണ്ടിക്കാട്ടുന്നു. അപേക്ഷകരില് ഭൂരിഭാഗത്തിനും സര്ക്കാര് രഹസ്യവിവരങ്ങളിലേക്ക് നേരിട്ട് പ്രവേശനം ഇല്ലെങ്കിലും അവരുടെ വ്യക്തിഗത വിവരങ്ങള് ഭാവിയില് അവരുടെ ബന്ധുക്കളെ ലക്ഷ്യമിടാന് ഉപയോഗിക്കപ്പെടാന് സാധ്യതയുണ്ടെന്നും റിപ്പോര്ട്ട് മുന്നറിയിപ്പ് നല്കുന്നു.
രാഷ്ട്രീയ, സാമ്പത്തിക, ശാസ്ത്രീയ, സൈനിക വിവരങ്ങള് ശേഖരിക്കുകയാണ് ചൈനയുടെ പ്രധാന ലക്ഷ്യമെന്ന് റിപ്പോര്ട്ടില് പറയുന്നു. കൂടാതെ ചൈനീസ് നയങ്ങളെ വിമര്ശിക്കുന്നവരെ പ്രത്യേകിച്ച് ഉയ്ഘൂര്, ടിബറ്റന് പ്രശ്നങ്ങള്, ഹോങ്കോങ്ങിലെ ജനാധിപത്യ നിയന്ത്രണങ്ങള്, തായ്വാനുമായി ബന്ധപ്പെട്ട വിഷയങ്ങള് അടിച്ചമര്ത്താനും ശ്രമമുണ്ടെന്ന് റിപ്പോര്ട്ട് ചൂണ്ടിക്കാണിക്കുന്നു.
കാനഡയിലെ അക്കാദമിക് ഗവേഷണ മേഖലയെയും ലക്ഷ്യമിട്ട് ചാരപ്രവര്ത്തനങ്ങള് നടക്കുന്നതായി സി എസ് ഐ എസ് സുരക്ഷാ മുന്നറിയിപ്പുകള് പുറത്തിറക്കിയിട്ടുണ്ട്. കൂടാതെ കാനഡയിലെ തെരഞ്ഞെടുപ്പുകളില് ഇടപെടുക, പ്രവാസി സമൂഹത്തെ ഉപദ്രവിക്കുക, സാങ്കേതികവിദ്യ മോഷണം എന്നിവയും റിപ്പോര്ട്ടില് ഉള്പ്പെടുത്തിയിട്ടുണ്ട്.
കഴിഞ്ഞ രണ്ടു വര്ഷത്തിനിടെ കാനഡ സര്ക്കാര് ഏജന്സികളുമായി സഹകരിച്ച് ചൈനീസ് സൈന്യത്തിനായി കാനഡയിലെ നിലവിലുള്ളതും മുന്കാലത്തേയും സൈനികരെ റിക്രൂട്ട് ചെയ്യാനുള്ള ശ്രമങ്ങള് തടയാന് നടപടികള് സ്വീകരിച്ചതായും സി എസ് ഐ എസ് വ്യക്തമാക്കി.
രാഷ്ട്രീയ നേതാക്കളും ഉദ്യോഗസ്ഥരും ബിസിനസ് പ്രമുഖരുമാണ് ചൈനീസ് ചാരപ്രവര്ത്തനത്തിന്റെ പ്രധാന ലക്ഷ്യങ്ങള്. ബ്ലാക്ക്മെയില്, കൈക്കൂലി, ലൈംഗിക വലയങ്ങള് തുടങ്ങിയ രീതികള് ഇതിനായി ഉപയോഗിക്കുന്നതായും റിപ്പോര്ട്ട് ആരോപിക്കുന്നു. ബാങ്ക് ഓഫ് ചൈന പോലുള്ള സ്ഥാപനങ്ങളെയും വിദേശ സ്വാധീന പ്രവര്ത്തനങ്ങള്ക്ക് ഉപയോഗിക്കുന്നതായി റിപ്പോര്ട്ടില് പറയുന്നു.
കാനഡയിലെ പ്രമുഖര് ചൈന സന്ദര്ശിക്കാന് പദ്ധതിയിടുമ്പോള് അവരുടെ വിവരങ്ങള് ബെയ്ജിംഗിനെ അറിയിക്കാന് ചൈനീസ് കോണ്സുലേറ്റുകള്ക്കും വിസ ഓഫിസുകള്ക്കും നിര്ദേശം നല്കിയിട്ടുണ്ടെന്നും റിപ്പോര്ട്ട് വ്യക്തമാക്കുന്നു. കൂടാതെ കോണ്ഫറന്സുകളില് പങ്കെടുക്കുന്ന കാനഡ ബിസിനസ് പ്രതിനിധികളുടെ യാത്ര വിവരങ്ങളും നിരീക്ഷണ വിധേയമാക്കുന്നുവെന്നാണ് ആരോപണം.
2018ല് ഹുവവി എക്സിക്യൂട്ടീവ് മെംഗ് വാന്ഴുയെ അമേരിക്കന് ആവശ്യപ്രകാരം അറസ്റ്റ് ചെയ്ത സംഭവത്തെ തുടര്ന്ന് ഇരു രാജ്യങ്ങളുടെയും ബന്ധം വഷളായിരുന്നു. പിന്നാലെ ചൈന രണ്ട് കാനഡക്കാരെ ചാരപ്രവര്ത്തനക്കുറ്റം ചുമത്തി അറസ്റ്റ് ചെയ്തിരുന്നു. 2021ല് കരാറിലൂടെ ഇവരെല്ലാം മോചിതരായി.
ഇതിനിടെ, കാനഡ പ്രധാനമന്ത്രി മാര്ക്ക് കര്ണി ചൈനയുമായി പുതിയ തന്ത്രപരമായ ബന്ധം സ്ഥാപിക്കാന് ശ്രമങ്ങള് തുടരുന്ന സാഹചര്യത്തിലാണ് സി എസ് ഐ എസിന്റെ പുതിയ റിപ്പോര്ട്ട് പുറത്തുവന്നത്.