ഒട്ടാവ: കാനഡയിലെ നാല് പ്രവിശ്യകളില് അതിശക്തമായ ചൂട് അനുഭവപ്പെടുമെന്ന് പരിസ്ഥിതി വകുപ്പ് മുന്നറിയിപ്പ് നല്കി. ഉയര്ന്ന ഈര്പ്പത്തെ തുടര്ന്ന് അനുഭവപ്പെടുന്ന താപനില 40 മുതല് 45 ഡിഗ്രി സെല്ഷ്യസ് വരെയാകുമെന്നാണ് മുന്നറിയിപ്പില് പറയുന്നത്.
സസ്കാച്ചെവാനിന്റെ തെക്കുകിഴക്കന് മേഖല മുതല് ക്യൂബെക്കിന്റെ പടിഞ്ഞാറന് അതിര്ത്തി വരെയുള്ള വിശാല പ്രദേശങ്ങളിലാണ് ചൂട് മുന്നറിയിപ്പ് നല്കിയിരിക്കുന്നത്. തെക്കന്, മധ്യ മാനിറ്റോബയിലും ടൊറന്റോ, ഒട്ടാവ ഉള്പ്പെടെ ഒന്റാറിയോയിലെ ഭൂരിഭാഗം പ്രദേശങ്ങളിലും ഉയര്ന്ന താപനില, കടുത്ത ഈര്പ്പം, ചൂട് മൂലമുള്ള ആരോഗ്യപ്രശ്നങ്ങള്, ചിലയിടങ്ങളില് മോശം വായു ഗുണനിലവാരം എന്നിവയ്ക്ക് സാധ്യതയുണ്ടെന്ന് അധികൃതര് അറിയിച്ചു.
മുന്നറിയിപ്പ് പ്രദേശങ്ങളില് പകല് താപനില 30 ഡിഗ്രി സെല്ഷ്യസിന് മുകളിലായിരിക്കുമെന്നാണ് പ്രവചനം. ഒന്റാറിയോയിലെ തണ്ടര് ബേയില് 38 ഡിഗ്രി സെല്ഷ്യസ് വരെ ഉയരുമെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.
സസ്കാച്ചെവാന്, മാനിറ്റോബ, വടക്കുപടിഞ്ഞാറന് ഒന്റാറിയോ എന്നിവിടങ്ങളില് തിങ്കളാഴ്ചയും മറ്റ് മുന്നറിയിപ്പ് മേഖലകളില് ചൊവ്വാഴ്ചയും കൂടുതല് ചൂട് അനുഭവപ്പെടും. മാനിറ്റോബയിലെ ഏഴ് പ്രദേശങ്ങളില് ഞായറാഴ്ച പുതിയ ഉയര്ന്ന താപനില രേഖപ്പെടുത്തി. പോര്ട്ടേജ് ലാ പ്രയറിയില് 35.7 ഡിഗ്രി സെല്ഷ്യസ് രേഖപ്പെടുത്തിയതോടെ രണ്ടാം ലോകമഹായുദ്ധകാലത്ത് സ്ഥാപിച്ച റെക്കോര്ഡാണ് മറികടന്നത്.
കാട്ടുതീയുടെ പുക കാരണം ഇതിനകം മോശമായിരിക്കുന്ന വായു ഗുണനിലവാരം ചൂടും ഈര്പ്പവും വര്ധിക്കുന്നതോടെ വീണ്ടും കൂടുതല് മോശമാകാന് സാധ്യതയുണ്ടെന്നും പരിസ്ഥിതി വകുപ്പ് മുന്നറിയിപ്പ് നല്കി.
ജനങ്ങളുടെ സുരക്ഷയ്ക്കായി ടൊറന്റോ നഗരത്തില് കുടിവെള്ള വിതരണ കേന്ദ്രങ്ങള്, തണല് കേന്ദ്രങ്ങള്, നീന്തല്ക്കുളങ്ങള്, ബീച്ചുകള്, സ്പ്ലാഷ് പാഡുകള് എന്നിവ തുറന്നിട്ടുണ്ടെന്ന് നഗര ഭരണകൂടം അറിയിച്ചു. വിന്നിപെഗില് വിനോദകേന്ദ്രങ്ങളും ലൈബ്രറികളും തണല് കേന്ദ്രങ്ങളായി പ്രവര്ത്തിക്കുന്നുണ്ട്.
ജാഗ്രതാ നിര്ദേശങ്ങള്
കടുത്ത ചൂട് മൂലമുള്ള ക്ഷീണത്തിന്റെ ലക്ഷണങ്ങളായ തലവേദന, തലകറക്കം, അമിത ദാഹം, ക്ഷീണം എന്നിവ ശ്രദ്ധിക്കണമെന്ന് പരിസ്ഥിതി വകുപ്പ് നിര്ദേശിച്ചു. ഹീറ്റ് സ്ട്രോക്കിന്റെ ലക്ഷണങ്ങള് പ്രകടിപ്പിക്കുന്നവര്ക്ക് അടിയന്തര ചികിത്സ ഉറപ്പാക്കണമെന്നും അധികൃതര് അറിയിച്ചു.
പ്രായമായവര്, ഒറ്റയ്ക്ക് താമസിക്കുന്നവര്, മറ്റ് ആരോഗ്യ അപകടസാധ്യതയുള്ളവര് എന്നിവരെ ദിവസത്തില് പലതവണ പരിശോധിച്ച് സുരക്ഷ ഉറപ്പാക്കണമെന്നും നിര്ദേശമുണ്ട്.
പൊതുജനങ്ങള്ക്ക് നല്കിയ പ്രധാന നിര്ദേശങ്ങള്:
- ദാഹം തോന്നുന്നതിന് മുമ്പുതന്നെ ആവശ്യത്തിന് വെള്ളം കുടിക്കുക.
- വീട്ടിനുള്ളില് ചൂട് കൂടുതലാണെങ്കില് തണല് കേന്ദ്രങ്ങള്, കമ്മ്യൂണിറ്റി സെന്ററുകള്, ലൈബ്രറികള്, തണലുള്ള പാര്ക്കുകള് എന്നിവിടങ്ങളിലേക്ക് മാറുക.
- പുറംപ്രവര്ത്തനങ്ങള് രാവിലെ അല്ലെങ്കില് വൈകുന്നേരം പോലുള്ള തണുപ്പുള്ള സമയങ്ങളില് ക്രമീകരിക്കുക.
- ഇളം നിറത്തിലുള്ള, അയഞ്ഞ വസ്ത്രങ്ങളും വിശാലമായ തൊപ്പിയും ധരിക്കുക.
- പ്രാദേശിക പൊതുജനാരോഗ്യ വകുപ്പിന്റെ നിര്ദേശങ്ങള് പാലിക്കുക.