ഹൂസ്റ്റണ്‍: 'ഓതിരം 2025' എന്ന പേരില്‍ ഒക്ടോബര്‍ 5ന് 6 മണിക്ക് സ്റ്റാഫോര്‍ഡ് സിവിക് സെന്ററില്‍ വച്ച് വിവിധ ആയോധനകലകളുടെ പ്രദര്‍ശനവും,നൃത്തനൃത്യ നാട്യ കലാരൂപങ്ങളുടെ ആവിഷ്‌കാരവും നടക്കും. ഒരു കാലഘട്ടത്തില്‍ തെക്കു വടക്കന്‍ കേരളത്തെ ഇളക്കിമറിച്ചിരുന്ന കേരളത്തിന്റെ സ്വന്തം കളരിപ്പയറ്റാണ് പ്രധാന ഇനം. കളരി ദേവതകളും, ഗുരുക്കന്മാരും അരങ്ങുവാണിരുന്ന മലബാര്‍ പ്രദേശത്തിന്റെ ഹൃദയ താളങ്ങളെ തൊട്ടുണര്‍ത്തിയിരുന്ന കളരിപ്പയറ്റ് ഒരു നോക്കു കാണുവാന്‍ ഹൂസ്റ്റണ്‍ മലയാളി സമൂഹത്തിലെ പുതുതലമുറ വെമ്പല്‍ കൊള്ളുകയാണ്. കളരിപ്പയറ്റിനു പുറമേ കരാട്ടെയും, മറ്റ് സമ്മിശ്രങ്ങളായ ആയോധനകലകളും പരിപാടിയില്‍ ഉള്‍പ്പെടുത്തിയിട്ടുണ്ട്. ആയോധനകലകളുടെ മാതാവ് എന്നറിയപ്പെടുന്ന കളരിപ്പയറ്റ് അമേരിക്കയില്‍ ഇദം പ്രഥമമായി അരങ്ങേറുകയാണ്.
തെക്കന്‍ കളരികളുടെയും, വടക്കന്‍ കളരികളുടെയും ആശാന്‍ സ്ഥാനീയനായ രാജു ആശാന്റെ നേതൃത്വത്തിലും, ശിക്ഷണത്തിലും ആണ് പരിപാടി അരങ്ങേറുന്നത്.
കരാട്ടെയില്‍ ബ്ലാക്ക് ബെല്‍റ്റ് കരസ്ഥമാക്കിയിട്ടുള്ള ആശാന്‍ തഞ്ചാവൂര്‍ സിലംബത്തിലും പ്രാഗല്ഭ്യം നേടിയിട്ടുണ്ട്. കലാപ്രേമികളെ പുളകച്ചാര്‍ത്ത് അണിയിക്കുന്ന നൃത്ത നൃത്യങ്ങളും, നാട്യപ്രധാനമായ നാടകവും, അസുരവാദ്യമായ ചെണ്ടയില്‍ വിരചിക്കുന്ന പഞ്ചാരിമേളവും പ്രേക്ഷകര്‍ക്കായി ഒരുക്കിയിട്ടുണ്ട്.
ഈ കലാപരിപാടിയുടെ വിജയത്തിനായി മുന്‍കൂട്ടി ടിക്കറ്റുകള്‍ കരസ്ഥമാക്കി ഏവരുടെയും സഹകരണം ഉണ്ടാകണമെന്ന് സംഘാടകരായ റെജി കളത്തില്‍, സന്ദീപ് തേവര്‍വേലില്‍, ഷിജോ ചാണ്ടപിള്ള, ശബരി സുരേന്ദ്രന്‍,അനില സന്ദീപ് എന്നിവര്‍ അറിയിച്ചു. മലയാളി സമൂഹത്തിന്റെ താല്‍പര്യപ്രകാരം ഈ പരിപാടി എല്ലാവര്‍ഷവും തുടര്‍ന്നു കൊണ്ടുപോകുവാന്‍ ആഗ്രഹിക്കുന്നതായും രാജു ആശാന്‍ അറിയിച്ചു.
സജി പുല്ലാട്‌
'ഓതിരം 2025' ഒക്ടോബര്‍ 5ന് സ്റ്റാഫോര്‍ഡ് സിവിക് സെന്ററില്‍
