ഡിട്രോയിറ്റ്: ഇന്ത്യന്‍ ഓവര്‍സീസ് കോണ്‍ഗ്രസ് മിഷിഗണ്‍ ചാപ്റ്ററിന്റെ ആഭിമുഖ്യത്തില്‍ കാസര്‍ഗോഡ് എം പിയും കോണ്‍ഗ്രസ് നേതാവുമായ രാജ്മോഹന്‍ ഉണ്ണിത്താന് മിഷിഗണില്‍ ആവേശകരമായ സ്വീകരണം നല്‍കി. ഇന്ത്യന്‍ നാഷണല്‍ കോണ്‍ഗ്രസിന്റെ ചരിത്രവും രാഷ്ട്രീയവും കൃത്യമായി അവതരിപ്പിച്ചുകൊണ്ട് രാജ്മോഹന്‍ ഉണ്ണിത്താന് മുഖ്യപ്രഭാഷണം നടത്തി. താന്‍ എന്നും നിലപാടുകളുള്ള ഒരു കോണ്‍ഗ്രസ്സുകാരന്‍ ആയിരിക്കുമെന്നും സ്ഥാനങ്ങളെക്കാളപ്പുറം കോണ്‍ഗ്രസ് പ്രസ്ഥാനമാണ് ജീവനുതുല്യം വലുതെന്നും അദ്ദേഹം ആവര്‍ത്തിച്ചു പറഞ്ഞു. കാന്റണ്‍ ഒതെന്റിക്ക ഇന്ത്യന്‍ കുസീന്‍ റെസ്റ്റോറന്റില്‍ നടന്ന സ്വീകരണ സമ്മേളനത്തില്‍ ഇന്ത്യന്‍ ഓവര്‍സീസ് കോണ്‍ഗ്രസ് മിഷിഗണ്‍ ചാപ്റ്ററിന്റെ പ്രസിഡന്റ് ഡോ. മാത്യു വര്‍ഗീസ് അധ്യക്ഷത വഹിച്ചു. അജയ് അലക്‌സ്, ജോണ്‍ വര്‍ഗീസ് (ജോജി), പ്രിന്‍സ് ഏബ്രഹാം എന്നിവര്‍ ആശംസ പ്രസംഗം നടത്തി. അലന്‍ ജോണ്‍ സ്വാഗതം ആശംസിക്കുകയും സൈജന്‍ കണിയോടിക്കല്‍ നന്ദി രേഖപ്പെടുത്തുകയും ചെയ്തു.
മിഷിഗണില്‍ രാജ്മോഹന്‍ ഉണ്ണിത്താന് വന്‍ സ്വീകരണം
