ന്യൂഡല്‍ഹി: ഇന്ത്യന്‍ തിരഞ്ഞെടുപ്പ് കമ്മിഷനിലെ മുതിര്‍ന്ന ഉദ്യോഗസ്ഥന്റെ പ്രവര്‍ത്തനത്തിനെതിരെ രണ്ട് തിരഞ്ഞെടുപ്പ് കമ്മിഷണര്‍മാര്‍ നല്‍കിയ പരാതികളില്‍ തുടര്‍നടപടി സ്വീകരിക്കേണ്ടതില്ലെന്ന് കേന്ദ്ര മന്ത്രിസഭാ സെക്രട്ടേറിയറ്റ് തീരുമാനിച്ചതായി വിവരാവകാശ നിയമപ്രകാരമുള്ള രേഖകള്‍. പരാതികള്‍ കമ്മിഷണര്‍മാര്‍ വ്യക്തിഗത നിലയിലാണ് നല്‍കിയതെന്നും തിരഞ്ഞെടുപ്പ് കമ്മിഷന്റെ ഔദ്യോഗിക നിലപാടായി അവയെ കണക്കാക്കാനാവില്ലെന്നും ചൂണ്ടിക്കാട്ടിയാണ് നടപടി ഒഴിവാക്കിയത്. വിഷയത്തില്‍ കേന്ദ്രത്തിന്റെ ഇടപെടല്‍ ഭരണഘടനാ സ്ഥാപനമായ തിരഞ്ഞെടുപ്പ് കമ്മിഷന്റെ സ്വതന്ത്ര പ്രവര്‍ത്തനത്തില്‍ കൈകടത്തലായി വ്യാഖ്യാനിക്കപ്പെടാമെന്നും സെക്രട്ടേറിയറ്റ് വിലയിരുത്തി.
തിരഞ്ഞെടുപ്പ് കമ്മിഷണര്‍മാരായ സുഖ്ബീര്‍ സിങ് സന്ധു, വിവേക് ജോഷി എന്നിവരാണ് മുതിര്‍ന്ന ഡെപ്യൂട്ടി തിരഞ്ഞെടുപ്പ് കമ്മിഷണര്‍ മനീഷ് ഗാര്‍ഗിന്റെ പ്രവര്‍ത്തനത്തെക്കുറിച്ച് കേന്ദ്ര ക്യാബിനറ്റ് സെക്രട്ടറി ടി.വി. സോമനാഥന് ജൂലൈ 29ന് പ്രത്യേകം കത്തുകള്‍ നല്‍കിയത്. സാമൂഹിക പ്രവര്‍ത്തകനും വിരമിച്ച നാവികസേനാ ഉദ്യോഗസ്ഥനുമായ ലോകേഷ് കെ. ബത്ര നല്‍കിയ വിവരാവകാശ അപേക്ഷയ്ക്കുള്ള മറുപടിയിലാണ് പരാതികളുമായി ബന്ധപ്പെട്ട രേഖകള്‍ പുറത്തുവന്നത്.
മുതിര്‍ന്ന ഡെപ്യൂട്ടി തിരഞ്ഞെടുപ്പ് കമ്മിഷണര്‍മാര്‍, ഡെപ്യൂട്ടി തിരഞ്ഞെടുപ്പ് കമ്മിഷണര്‍മാര്‍, ഡയറക്ടര്‍ ജനറല്‍മാര്‍, തത്തുല്യ പദവികളിലുള്ള ഉദ്യോഗസ്ഥര്‍ എന്നിവരുടെ ജോലിവിഭജനം മനീഷ് ഗാര്‍ഗ് പരിഷ്‌കരിച്ചെന്നാണ് കമ്മിഷണര്‍മാരുടെ പരാതി. തിരഞ്ഞെടുപ്പ് കമ്മിഷന്റെ മുന്‍കൂര്‍ ചര്‍ച്ചയോ അനുമതിയോ ബന്ധപ്പെട്ട ഉദ്യോഗസ്ഥരെ അറിയിക്കലോ ഇല്ലാതെയാണ് മാറ്റങ്ങള്‍ വരുത്തിയതെന്നും ഇതിനെതിരെ നേരത്തേ വാക്കാലും രേഖാമൂലവും നിര്‍ദേശങ്ങള്‍ നല്‍കിയിരുന്നെന്നും പരാതിയില്‍ ചൂണ്ടിക്കാട്ടിയിരുന്നു. ഭരണപരമായ ചുമതലകളുമായി ബന്ധപ്പെട്ട ഫയല്‍ ആവശ്യപ്പെട്ടിട്ടും ലഭിച്ചില്ലെന്ന് വിവേക് ജോഷി പരാതിപ്പെട്ടതായും റിപ്പോര്‍ട്ടുകളുണ്ട്.
ഓഗസ്റ്റ് മൂന്നിന് തയ്യാറാക്കിയ ആഭ്യന്തര കുറിപ്പില്‍ വിഷയത്തില്‍ മുഖ്യ തിരഞ്ഞെടുപ്പ് കമ്മിഷണറുടെ അഭിപ്രായം തേടാനുള്ള നിര്‍ദേശം ഉയര്‍ന്നിരുന്നു. എന്നാല്‍, കമ്മിഷണര്‍മാരുടെ കത്തുകള്‍ വ്യക്തിഗത നിലയിലുള്ളവയാണെന്നും കമ്മിഷന്റെ കൂട്ടായ ഔദ്യോഗിക ആശയവിനിമയമായി അവയെ കാണാനാവില്ലെന്നും തുടര്‍ന്നുള്ള കുറിപ്പില്‍ വ്യക്തമാക്കി. പരാതികള്‍ ലഭിച്ചതായി ഇരുവര്‍ക്കും മറുപടി നല്‍കാനും അതിന്റെ പകര്‍പ്പ് മുഖ്യ തിരഞ്ഞെടുപ്പ് കമ്മിഷണറുടെ ഓഫീസിന് കൈമാറാനും തീരുമാനിച്ചു. ഭാവിയില്‍ ഉദ്യോഗസ്ഥനെ സംബന്ധിച്ച തീരുമാനങ്ങളെടുക്കുമ്പോള്‍ പരിഗണിക്കാനായി വിഷയം രേഖകളില്‍ ഉള്‍പ്പെടുത്തുകയും ചെയ്തു.
2023ലെ ചീഫ് ഇലക്ഷന്‍ കമ്മിഷണറും മറ്റ് ഇലക്ഷന്‍ കമ്മിഷണര്‍മാരും (നിയമനം, സേവന വ്യവസ്ഥകള്‍, കാലാവധി) നിയമത്തിലെ 18ാം വകുപ്പ് ചൂണ്ടിക്കാട്ടിയാണ് സെക്രട്ടേറിയറ്റ് നിലപാട് വിശദീകരിച്ചത്. കമ്മിഷന്റെ പ്രവര്‍ത്തനങ്ങളില്‍ പരമാവധി ഏകകണ്ഠമായ തീരുമാനങ്ങളാണ് വേണ്ടതെന്നും അഭിപ്രായവ്യത്യാസങ്ങള്‍ വോട്ടെടുപ്പിലൂടെ പരിഹരിക്കാമെന്നും ഈ വകുപ്പ് വ്യവസ്ഥ ചെയ്യുന്നു. കേന്ദ്ര മന്ത്രിസഭയുടെ നിയമന സമിതിയാണ് മനീഷ് ഗാര്‍ഗിനെ 2024 സെപ്റ്റംബര്‍ രണ്ടിന് തിരഞ്ഞെടുപ്പ് കമ്മിഷനില്‍ നിയമിച്ചത്. എന്നാല്‍, അവിടത്തെ അദ്ദേഹത്തിന്റെ പ്രവര്‍ത്തനവും പെരുമാറ്റവും കമ്മിഷന്റെ ചട്ടങ്ങള്‍ക്കും മാര്‍ഗനിര്‍ദേശങ്ങള്‍ക്കും വിധേയമാണെന്നും സെക്രട്ടേറിയറ്റ് വ്യക്തമാക്കി.
സെപ്റ്റംബര്‍ 26ന് പുറത്തിറക്കിയ പ്രസ്താവനയില്‍, മനീഷ് ഗാര്‍ഗ് പുറപ്പെടുവിച്ച ജോലിവിഭജന ഉത്തരവുകള്‍ രണ്ട് കമ്മിഷണര്‍മാരുടെ നിര്‍ദേശത്തെത്തുടര്‍ന്ന് നടപ്പാക്കിയിട്ടില്ലെന്ന് തിരഞ്ഞെടുപ്പ് കമ്മിഷന്‍ അറിയിച്ചിരുന്നു. പരാതികള്‍ കമ്മിഷന്റെ നയപരമായ തീരുമാനങ്ങളെയോ വിവരസാങ്കേതിക വിഭാഗത്തിന്റെ പ്രവര്‍ത്തനത്തെയോ സംബന്ധിച്ചല്ലെന്നും ഡെപ്യൂട്ടേഷനിലുള്ള ഒരു ഉദ്യോഗസ്ഥന്റെ പ്രവര്‍ത്തനത്തെക്കുറിച്ചാണെന്നും കമ്മിഷന്‍ വിശദീകരിച്ചു. അതേസമയം, പരാതികളുടെ ഉള്ളടക്കവും തുടര്‍നടപടികളുമായി ബന്ധപ്പെട്ട കൂടുതല്‍ വിവരങ്ങളും പുറത്തുവരുന്നതോടെ കമ്മിഷനിലെ ആഭ്യന്തര അഭിപ്രായവ്യത്യാസങ്ങളെക്കുറിച്ചുള്ള ചര്‍ച്ചകള്‍ക്ക് കൂടുതല്‍ വ്യക്തത ലഭിക്കുമെന്നാണ് വിലയിരുത്തല്‍.
തിരഞ്ഞെടുപ്പ് കമ്മിഷനിലെ മുതിര്‍ന്ന ഉദ്യോഗസ്ഥനെതിരായ പരാതിയില്‍ നടപടിയില്ല; വിവരാവകാശ രേഖകള്‍ പുറത്ത്
