രാജ്ഗിര്‍: ഏഷ്യ കപ്പ് ഹോക്കിയില്‍ ഇന്ത്യ ചാംപ്യന്‍മാരായി. ഫൈനലില്‍ ദക്ഷിണ കൊറിയയെ ഒന്നിനെതിരേ നാല് ഗോളുകള്‍ക്കാണ് ഇന്ത്യ പരാജയപ്പെടുത്തിയത്. ഇതോടെ അടുത്ത വര്‍ഷം നെതര്‍ലന്‍ഡ്‌സിലും ബെല്‍ജിയത്തിലുമായി നടക്കുന്ന ലോകകപ്പിനും ഇന്ത്യ യോഗ്യത നേടി. നാലാം തവണയാണ് ഇന്ത്യ ഏഷ്യ കപ്പ് ജേതാക്കളാകുന്നത്. 2003, 2007, 2017 വര്‍ഷങ്ങളിലാണ് ഇതിനു മുമ്പ് കിരീടം ചൂടിയത്.
ദില്‍പ്രീത് സിങ് ഇന്ത്യയ്ക്കായി രണ്ടു ഗോളടിച്ചു. അമിത് രോഹിദാസ്, സുഖ്ജീത് സിങ് എന്നിവരും സ്‌കോര്‍ ചെയ്തു. പ്ലേ മേക്കറുടെ റോളില്‍ ക്യാപ്റ്റന്‍ ഹര്‍മന്‍പ്രീത് സിങ്ങും മിന്നിത്തിളങ്ങി. ടൂര്‍ണമെന്റില്‍ തുടക്കത്തിലെ പാളിച്ചകളെ മറികടന്ന ഇന്ത്യ അവസാന മൂന്നു മത്സരങ്ങളില്‍ 15 ഗോളാണ് അടിച്ചുകൂട്ടിയത്.