ശ്രീനഗര്‍: ജമ്മു കശ്മീരിലെ ജനങ്ങള്‍ക്ക് നല്‍കിയ വാഗ്ദാനങ്ങള്‍ പാലിക്കുമെന്ന് പ്രധാനമന്ത്രി നരേന്ദ്ര മോഡി തിങ്കളാഴ്ച പറഞ്ഞു, സംസ്ഥാന പദവി പുനഃസ്ഥാപിക്കണമെന്ന മുഖ്യമന്ത്രി ഒമര്‍ അബ്ദുള്ളയുടെ ആവശ്യത്തെക്കുറിച്ചുള്ള പരോക്ഷ പരാമര്‍ശമായാണ് ഈ പ്രസ്താവന വിലയിരുത്തപ്പെടുന്നത്.
ശ്രീനഗറില്‍ നിന്ന് സോനാമാര്‍ഗിലേക്ക് 6.4 കിലോമീറ്റര്‍ ദൈര്‍ഘ്യമുള്ള തന്ത്രപ്രധാനമായ തുരങ്കം ഉദ്ഘാടനം ചെയ്ത ശേഷം ഒമര്‍ ബ്ദുള്ളയുമായി വേദി പങ്കിട്ട പൊതുയോഗത്തിലാണ് പ്രധാനമന്ത്രി ഇക്കാര്യം പറഞ്ഞത്.
കശ്മീരിനെ ഇന്ത്യയുടെ കിരീടമായി വിശേഷിപ്പിച്ച പ്രധാനമന്ത്രി ഈ കിരീടം രത്‌നങ്ങള്‍ കൊണ്ട് അലങ്കരിച്ചാല്‍ മാത്രമേ 'വിക്ഷിത് ഭാരത്' എന്ന സ്വപ്‌നം സാക്ഷാത്കരിക്കപ്പെടുകയുള്ളൂ എന്നും പറഞ്ഞു.
കശ്മീര്‍ താഴ്വര ഉടന്‍ തന്നെ ട്രെയിന്‍ വഴി ബന്ധിപ്പിക്കപ്പെടുമെന്നും അതിനെക്കുറിച്ച് ജനങ്ങള്‍ക്കിടയില്‍ ആവേശമുണ്ടെന്നും മോഡി പറഞ്ഞു.
കഴിഞ്ഞ വര്‍ഷം ഒക്ടോബര്‍ 20ന് തുരങ്കത്തിനടുത്തുണ്ടായ ഭീകരാക്രമണത്തില്‍ കൊല്ലപ്പെട്ട ഏഴ് പേര്‍ക്കും അദ്ദേഹം ആദരാഞ്ജലികള്‍ അര്‍പ്പിച്ചു.
പദ്ധതി ഉദ്ഘാടനം ചെയ്ത ശേഷം പ്രധാനമന്ത്രി തുരങ്കത്തിനകത്തു കടന്ന് പദ്ധതി ഉദ്യോഗസ്ഥരുമായി സംവദിച്ചു.
തുരങ്കം പൂര്‍ത്തിയാക്കാന്‍ കഠിനമായ സാഹചര്യങ്ങള്‍ക്കിടയിലും സൂക്ഷ്മതയോടെ പ്രവര്‍ത്തിച്ച നിര്‍മ്മാണ തൊഴിലാളികളെയും അദ്ദേഹം കണ്ടു.
ജമ്മു കശ്മീരിന്റെയും ഇന്ത്യയുടെയും വികസനത്തിനായി കഠിനാധ്വാനം ചെയ്യുകയും ജീവന്‍ പണയപ്പെടുത്തുകയും ചെയ്ത തൊഴിലാളികള്‍ക്ക് അദ്ദേഹം നന്ദി പറഞ്ഞു.
മഞ്ഞുമൂടിയ മനോഹരമായ പര്‍വതനിരകളെയും മനോഹരമായ കാലാവസ്ഥയെയും അഭിനന്ദിച്ച മോഡി, മുഖ്യമന്ത്രി സോഷ്യല്‍ മീഡിയയില്‍ പങ്കിട്ട സമീപകാല ചിത്രങ്ങള്‍ കണ്ടതിനുശേഷം ജമ്മു കശ്മീര്‍ സന്ദര്‍ശിക്കാനുള്ള തന്റെ ആഗ്രഹം വര്‍ദ്ധിച്ചുവെന്ന് പറഞ്ഞു.
സോനാമാര്‍ഗ്, കാര്‍ഗില്‍, ലേ എന്നിവിടങ്ങളിലെ ജനങ്ങളുടെ ജീവിതം ഈ തുരങ്കം ഗണ്യമായി ലഘൂകരിക്കുമെന്ന് അദ്ദേഹം എടുത്തുപറഞ്ഞു.
ഹിമപാതങ്ങള്‍, കനത്ത മഞ്ഞുവീഴ്ച, മണ്ണിടിച്ചില്‍ എന്നിവ മൂലം പലപ്പോഴും റോഡ് അടച്ചിടേണ്ടിവരുന്ന ബുദ്ധിമുട്ടുകള്‍ ഈ തുരങ്കം കുറയ്ക്കുമെന്ന് പ്രധാനമന്ത്രി അഭിപ്രായപ്പെട്ടു.
ജമ്മു കശ്മീരിന്റെ സംസ്ഥാന പദവി എപ്പോള്‍ പുനഃസ്ഥാപിക്കപ്പെടുമെന്ന് ആളുകള്‍ പലപ്പോഴും തന്നെ കാണുകയും ചോദിക്കുകയും ചെയ്യാറുണ്ടെന്ന് മുഖ്യമന്ത്രി പറഞ്ഞു.
കേന്ദ്രമന്ത്രി നിതിന്‍ ഗഡ്കരിയും ജമ്മു കശ്മീര്‍ ലെഫ്റ്റനന്റ് ഗവര്‍ണര്‍ മനോജ് സിന്‍ഹയും ഉദ്ഘാടന വേളയില്‍ പങ്കെടുത്തു.
ഏകദേശം 12 കിലോമീറ്റര്‍ നീളമുള്ള സോനാമാര്‍ഗ് ടണല്‍ പദ്ധതി 2,700 കോടി രൂപയിലധികം ചെലവിലാണ് നിര്‍മിച്ചത്. ഇതില്‍ 6.4 കിലോമീറ്റര്‍ നീളമുള്ള സോനാമാര്‍ഗ് പ്രധാന തുരങ്കവും ഒരു എഗ്രസ് ടണലും അപ്രോച്ച് റോഡുകളും ഉള്‍പ്പെടുന്നു.
സമുദ്രനിരപ്പില്‍ നിന്ന് 8,650 അടിയിലധികം ഉയരത്തില്‍ സ്ഥിതി ചെയ്യുന്ന തുരങ്കം ശ്രീനഗറില്‍ നിന്ന് സോനാമാര്‍ഗിലേക്കുള്ള വഴിയില്‍ എല്ലാ കാലാവസ്ഥയിലും കണക്റ്റിവിറ്റി വര്‍ധിപ്പിക്കുകയും മണ്ണിടിച്ചില്‍, ഹിമപാത പാതകള്‍ ഒഴിവാക്കുകയും തന്ത്രപരമായി നിര്‍ണായകമായ ലഡാക്ക് മേഖലയിലേക്ക് സുരക്ഷിതവും തടസ്സമില്ലാത്തതുമായ പ്രവേശനം ഉറപ്പാക്കുകയും ചെയ്യും.
സോനാമാര്‍ഗിനെ വര്‍ഷം മുഴുവനും ലക്ഷ്യസ്ഥാനമാക്കി മാറ്റുന്നതിലൂടെയും ശൈത്യകാല വിനോദസഞ്ചാരം, സാഹസിക കായിക വിനോദങ്ങള്‍, പ്രാദേശിക ഉപജീവനമാര്‍ഗ്ഗങ്ങള്‍ എന്നിവ വര്‍ധിപ്പിക്കുന്നതിലൂടെയും ടൂറിസത്തെ പ്രോത്സാഹിപ്പിക്കും.
2028-ല്‍ പൂര്‍ത്തിയാകാന്‍ പോകുന്ന സോജില ടണലിനൊപ്പം റൂട്ട് ദൈര്‍ഘ്യം 49 കിലോമീറ്ററില്‍ നിന്ന് 43 കിലോമീറ്ററായി കുറയ്ക്കുകയും വാഹന വേഗത മണിക്കൂറില്‍ 30 കിലോമീറ്ററില്‍ നിന്ന് 70 കിലോമീറ്ററായി വര്‍ധിപ്പിക്കുകയും ചെയ്യും, ഇത് ശ്രീനഗര്‍ താഴ്വരയ്ക്കും ലഡാക്കിനും ഇടയില്‍ സുഗമമായ എന്‍ എച്ച് 1 കണക്ടിവിറ്റി ഉറപ്പാക്കും.