ന്യൂഡല്ഹി: ഗോവ ബാഗ ബീച്ചിലെ നൈറ്റ് ക്ലബിലുണ്ടായ തീപിടിത്തത്തെത്തുടര്ന്ന് 25 പേര് മരിക്കാനിടയായ സംഭവത്തില് ഉടമകളായ ലുത്ര സഹോദരന്മാര്ക്കെതിരേ ഇന്റര്പോള് ബ്ലൂ കോര്ണര് നോട്ടീസ് പുറത്തിറക്കി.
അപകടമുണ്ടായതിനു പിന്നാലെ സൗരഭ് ലുത്രയും സഹോദരന് ഗൗരവ് ലുത്രയും തായ്ലന്റിലേക്ക് കടന്നിരുന്നു. നൈറ്റ് ക്ലബ് മാനേജര് ഉള്പ്പടെ നാലു ക്ലബ് ജീവനക്കാരെ ഇതുവരെ പൊലീസ് അറസ്റ്റ് ചെയ്തിട്ടുണ്ട്.
കഴിഞ്ഞ ഞായറാഴ്ച പുലര്ച്ചെയായിരുന്നു അപകടമുണ്ടായത്. അടുക്കളയിലെ ഗ്യാസ് സിലിണ്ടര് പൊട്ടിത്തെറിച്ചതാണ് അപകടത്തിന് കാരണമായത്.
'ബോളിവുഡ് ബാംഗര് നൈറ്റ്' എന്ന് പേരിട്ടിരുന്ന പരിപാടിയില് വിദേശികള് ഉള്പ്പടെ 100ലധികം പേര് പങ്കെടുത്തിരുന്നു. സംഭവത്തില് മുഖ്യമന്ത്രി പ്രമോദ് സാവന്ത് ജുഡീഷ്യല് അന്വേഷണം പ്രഖ്യാപിച്ചിരുന്നു.