മുംബൈ: ബോളിവുഡ് താരം സല്‍മാന്‍ ഖാന്റെ ബാന്ദ്രയിലുള്ള അപ്പാര്‍ട്ട്‌മെന്റിലേക്ക് അതിക്രമിച്ചു കയറാന്‍ ശ്രമിച്ച രണ്ടു പേര്‍ അറസ്റ്റില്‍. ഒരു സ്ത്രീയും പുരുഷനുമാണ് രണ്ടു ദിവസങ്ങളിലായി അറസ്റ്റിലായത്.
അപ്പാര്‍ട്‌മെന്റിനു സമീപം സംശയാസ്പദമായി ചുറ്റിക്കറങ്ങിയ പുരുഷനെ സുരക്ഷാ ജീവനക്കാര്‍ ചോദ്യം ചെയ്തിരുന്നു. അകത്തേക്ക് കടത്തി വിടണമെന്ന് ആവശ്യപ്പെട്ടെങ്കിലും അത് അനുവദിക്കാഞ്ഞതിനു പിന്നാലെ ദേഷ്യപ്പെട്ട് മൊബൈല്‍ ഫോണ്‍ എറിഞ്ഞുടച്ചതിനു ശേഷം ഇയാള്‍ തിരിച്ചു പോവുകയായിരുന്നു. പിറ്റേദിവസം വൈകിട്ട് വീണ്ടും തിരിച്ചെത്തി ഒളിച്ച് ഗേറ്റിലൂടെ കടക്കുകയായിരുന്നു. സല്‍മാനെ കാണാനായിരുന്നു ശ്രമമെന്നാണ് പ്രതിയുടെ മൊഴി.
സല്‍മാനെ കാണണമെന്ന് ആവശ്യപ്പെട്ട് എത്തിയ ഒരു സ്ത്രീയും സുരക്ഷാ ജീവനക്കാരെ എതിര്‍ത്ത് അപ്പാര്‍ട്ട്‌മെന്റിലേക്ക് കടന്നു കയറാന്‍ ശ്രമിച്ചു. ഇവരെയും പൊലീസിനു കൈമാറി.