കൊച്ചി: ലൈംഗികാതിക്രമ കേസില്‍ മുന്‍ മന്ത്രി ഡോ. എ നീലലോഹിതദാസന്‍ നാടാരെ കുറ്റവിമുക്തനാക്കി. ജില്ലാ കോടതിയുടെ വിധിക്കെതിരേ നീലലോഹിതദാസന്‍ നാടാര്‍ ഹര്‍ജി നല്‍കിയിരുന്നു. ഇതിലാണ് ഹൈക്കോടതി വിധി പറഞ്ഞത്. ജസ്റ്റിസ് കൗസര്‍ എടപ്പഗത്തിന്റെ സിംഗിള്‍ ബെഞ്ചാണ് നീലലോഹിതദാസന്റെ ശിക്ഷ റദ്ദാക്കിയത്.
പരാതിക്കാരിയുടെ മൊഴിയിലുള്ള അവ്യക്തത ചൂണ്ടിക്കാട്ടിയാണ് ഹൈക്കോടതി ശിക്ഷ റദ്ദാക്കിയിരിക്കുന്നത്. 1999ല്‍ ഐ എഫ് എസ് ഉദ്യോഗസ്ഥയെ കോഴിക്കോട് ഗസ്റ്റ് ഹൗസിലേക്ക് വിളിച്ചുവരുത്തുകയും തിരിച്ചിറങ്ങുന്ന സമയത്ത് മോശമായി പെരുമാറിയെന്നുമായിരുന്നു പരാതി.