കൊച്ചി: തിരുവനന്തപുരം കോര്‍പ്പറേഷന്‍ മുട്ടട വാര്‍ഡിലെ യു ഡി എഫ് സ്ഥാനാര്‍ഥി വൈഷ്ണ സുരേഷിന്റെ പേര് വോട്ടര്‍ പട്ടികയില്‍ നിന്ന് നീക്കിയ നടപടി റദ്ദാക്കാന്‍ ഉത്തരവിട്ട് സംസ്ഥാന തെരഞ്ഞെടുപ്പ് കമ്മിഷന്‍. ഇതോടെ തദ്ദേശ തെരഞ്ഞെടുപ്പില്‍ വൈഷ്ണയ്ക്ക് മത്സരിക്കാം. വോട്ട് ഒഴിവാക്കിയത് നിയമപരമല്ലെന്നും സ്വന്തം ഭാഗം പറയുന്നതിനുള്ള അവസരം നിഷേധിച്ചുവെന്നും തെരഞ്ഞെടുപ്പു കമ്മിഷന്‍ ചൂണ്ടിക്കാണിച്ചിട്ടുണ്ട്. കോടതി നിര്‍ദേശപ്രകാരം തെരഞ്ഞെടുപ്പു കമ്മിഷന്‍ ആസ്ഥാനത്ത് നടന്ന ഹിയറിങ്ങില്‍ വൈഷ്ണ സുരേഷും പരാതിക്കാരനായ ധനേഷ് കുമാറും കോര്‍പറേഷന്‍ സെക്രട്ടറിയും ഹാജരായിരുന്നു.
വൈഷ്ണയുടെ പേര് ഒഴിവാക്കിയതിന്റെ കാരണം ബോധിപ്പിക്കാന്‍ കോര്‍പറേഷന്‍ സെക്രട്ടറിക്ക് സാധിച്ചില്ല. വോട്ടര്‍ പട്ടികയില്‍ വൈഷ്ണ സുരേഷിന്റെ പേരിനൊപ്പം തെറ്റായ വീട്ടു നമ്പറാണ് ഉണ്ടായിരുന്നതെന്നും വ്യാജ ടി സി നമ്പര്‍ ഉപയോഗിച്ചാണ് പാസ്‌പോര്‍ട്ടും ലൈസന്‍സും സമ്പാദിച്ചതെന്നുമാണ് പരാതിക്കാരനായ ധനേഷ് കുമാര്‍ ആരോപിച്ചിരുന്നത്.