കൊച്ചി: എറണാകുളം നോര്ത്ത് പൊലീസ് സ്റ്റേഷനില് ഗര്ഭിണിയയെ പൊലീസ് മര്ദ്ദിക്കുന്നതിന്റെ സി സി ടി വി ദൃശ്യം പുറത്ത്. നോര്ത്ത് എസ് എച്ച് ഒ ആയിരുന്ന പ്രതാപ ചന്ദ്രനാണ് ഷൈമോള് എന് ജെ എന്ന സ്ത്രീയെ മുഖത്തടിച്ചത്. ഇവരെ ക്രൂരമായി മര്ദ്ദിക്കുന്നതിന്റെ ദൃശ്യങ്ങളാണ് ഇപ്പോള് പുറത്തു വന്നത്. ഷൈമോളെ നെഞ്ചത്ത് പിടിച്ചു തള്ളുന്നതും ദൃശ്യങ്ങളിലുണ്ട്. 2024ല് നോര്ത്ത് പൊലീസ് സ്റ്റേഷനിലായിരുന്നു ഞെട്ടിക്കുന്ന സംഭവം ഉണ്ടായത്.
പൊലീസ് കസ്റ്റഡിയില് എടുത്തയാളുടെ ഭാര്യയെയാണ് മര്ദ്ദിച്ചത്. 2024ല് തന്നെ മര്ദ്ദനമേറ്റ കാര്യം ഷൈമോള് പുറംലോകത്തെ അറിയിച്ചിരുന്നു. എന്നാല് അന്നുമുതല് ഷൈമോള് ദൃശ്യങ്ങള്ക്ക് വേണ്ടിയുള്ള നിയമപോരാട്ടത്തിലായിരുന്നു. പിന്നീട് കോടതിയില് നിന്നാണ് ഷൈമോള്ക്ക് ദൃശ്യങ്ങള് ലഭിച്ചത്. ഷൈമോളെ പൊലീസുകാരന് മുഖത്തടിക്കുകയും പിടിച്ചു തള്ളുകയും ചെയ്യുന്നത് ദൃശ്യങ്ങളില് വ്യക്തമാണ്. മര്ദ്ദനത്തിന് ശേഷം പൊലീസുകാരനെ മറ്റു പൊലീസ് ഉദ്യോഗസ്ഥര് പിടിച്ചുമാറ്റുന്നതും കാണാം.
അതേസമയം, ദൃശ്യങ്ങളുടെ അടിസ്ഥാനത്തില് ഇതുവരേയും നടപടിയെടുത്തിട്ടില്ല. വനിതാ പൊലീസുകാര് ഉള്പ്പെടെ നോക്കിനില്ക്കുമ്പോഴാണ് യുവതിക്ക് മര്ദ്ദനമേറ്റത്. നിലവില് അരൂരിലാണ് പ്രതാപ ചന്ദ്രന് ജോലി ചെയ്യുന്നത്.