തിരുവനന്തപുരം: പ്ലസ് ടു, വൊക്കേഷണൽ ഹയർസെക്കൻഡറി പരീക്ഷകളുടെ ഫലം പ്രഖ്യാപിച്ചു. പ്ലസ് ടുവിന് 77. 97 ശതമാനവും വൊക്കേഷണൽ ഹയർ സെക്കൻഡറിക്ക് 72.49 ശതമാനവുമാണ് വിജയം. വിദ്യാഭ്യാസമന്ത്രി എന്.ഷംസുദ്ദീനാണ് ഫലം പ്രഖ്യാപിച്ചത്. മാർച്ച് ആറ് മുതൽ 26 വരെയാണ് ഹയർസെക്കൻഡറി പരീക്ഷ നടന്നത്. ജൂൺ 29 മുതൽ ജുലൈ മൂന്ന് വരെ സേ പരീക്ഷ നടത്തും. 1990 സ്കൂളുകളിൽ നിന്ന് 3,72,423 പേർ പരീക്ഷയെഴുതിയപ്പോൾ 290398 പേർ പരീക്ഷയിൽ യോഗ്യത നേടി. കഴിഞ്ഞ വർഷം ഹയർസെക്കൻഡറി പരീക്ഷയിൽ 77.81 ശതമാനവും വിഎച്ച്എസ്ഇയിൽ 70.06 ശതമാനവും വിജയശതമാനമായിരുന്നു. മുന്വര്ഷത്തേക്കാള് വിജയശതമാനത്തില് 0.16 ശതമാനം വര്ധനയുണ്ട്.
സയൻസ് ഗ്രൂപ്പ് - 84.55 ശതമാനം, ഹ്യുമാനിറ്റിസ്- 66.38 ശതമാനം, കൊമേഴ്സ് - 74.74 ശതമാനം എന്നിവയാണ് വിജയ ശതമാനം. സർക്കാർ സ്കൂൾ വിജയശതമാനം 72.66. എയ്ഡഡ് സ്കൂളുകളുടെ വിജയശതമാനം 82.82. 78.18 ശതമാനമാണ് അൺ എയ്ഡഡ് സ്കൂളുകളുടെ വിജയം. 85.67 ശതമാനം ആണ് സ്പെഷ്യൽ സ്കൂൾ വിജയം. സയന്സ് വിഭാഗത്തില് 1,58,836 കുട്ടികളും ഹ്യുമാനിറ്റീസില് 50,398 പേരും കൊമേഴ്സില് 81,147 കുട്ടികളും ഉപരിപഠനത്തിനു യോഗ്യത നേടി. 30561 കുട്ടികള്ക്കു മുഴുവന് വിഷയങ്ങള്ക്കും എ പ്ലസ് ലഭിച്ചു. കഴിഞ്ഞവർഷത്തേക്കാൾ കൂടുതൽ ആണിത്. ടെക്നിക്കൽ ഫലം 72.82 ശതമാനമാണ്. 50 പേർക്ക് ഫുൾ എ പ്ലസ് ലഭിച്ചു.
വിജയശതമാനം ഏറ്റവും കുടുതല് ഇടുക്കിയും കുറവ് കാസര്കോടുമാണ്. 76 സ്കൂളുകൾ നൂറ് ശതമാനം വിജയം കരസ്ഥമാക്കി. ഇതില് ഒന്പത് എണ്ണം സര്ക്കാര് സ്കൂള് ആണ്. 30 അണ് എയ്ഡഡ് സ്കൂളും ഉള്പ്പെടുന്നു. 50 പെണ്കുട്ടികള്ക്കും 10 ആണ്കുട്ടികള്ക്കും മുഴുവന് മാര്ക്കും (1200) ലഭിച്ചു.
ഔദ്യോഗിക ഫല പ്രഖ്യാപനത്തിനുശേഷം വെബ്സൈറ്റുകളിലും മൊബൈല് ആപ്ലിക്കേഷനുകളിലും ഫലം ലഭ്യമാകും. കേരള സര്ക്കാരിന്റെ വിവിധ സേവനങ്ങള് നല്കുന്ന nammudekeralam.kerala.gov.in സൈറ്റിലൂടെയും മൊബൈല് ആപ്ലിക്കേഷന് വഴിയും കൂടാതെ വാട്ട്സ് ആപ്പിലൂടെയും പരീക്ഷ ഫലം അറിയാം.
ഫലം അറിയാവുന്ന വെബ്സൈറ്റുകൾ: nammudekeralam.kerala.gov.in, www.results.hse.kerala.gov.in, www.prd.kerala.gov.in, results.kerala.gov.in, results.digilocker.gov.in, www.results.kite.kerala.gov.in, examresults.kerala.gov.in. മൊബൈൽആപ്പുകൾ: SAPHALAM 2026, iExaMS-Kerala
പ്ലസ് ടു, വൊക്കേഷണൽ ഹയർ സെക്കൻഡറി പരീക്ഷാഫലം പ്രഖ്യാപിച്ചു; 77.97% വിജയം
