ലോസ് ഏഞ്ചലസ്: ഭരണഘടന നടപ്പിലാക്കാന്‍ എഫ് ബി ഐക്ക് ആരുടേയും അനുവാദം ആവശ്യമില്ലെന്നും തന്റെ ഉത്തരവാദിത്വം അമേരിക്കന്‍ ജനതയോടാണ് രാഷ്ട്രീയ പഞ്ച് ലൈനുകളോടല്ലെന്നും എഫ് ബി ഐ ഡയറക്ടറുടെ എക്‌സ് പോസ്റ്റ്. ലോസ് ഏഞ്ചലസിലെ പ്രതിഷേധത്തിന്റെ മൂന്നാം ദിവസമാണ് എഫ് ബി ഐ ഡയറക്ടര്‍ കാഷ് പട്ടേല്‍ ഗവര്‍ണര്‍ ന്യൂസോമിന് മുന്നറിയിപ്പായി പോസ്റ്റിട്ടത്.
ലോസ് ഏഞ്ചലസ് കൊള്ളക്കാരായ കുറ്റവാളികളാല്‍ ഉപരോധിക്കപ്പെട്ടതായും തങ്ങള്‍ ക്രമസമാധാനം പുനഃസ്ഥാപിക്കുമെന്നും പറഞ്ഞ അദ്ദേഹം പ്രതിഷേധങ്ങളെ അപലപിച്ചു.
ട്രംപ് നാഷണല്‍ ഗാര്‍ഡ് സൈനികരെ വിന്യസിച്ചത് നിയമവിരുദ്ധമാണെന്ന് ഗവര്‍ണര്‍ ഗാവിന്‍ ന്യൂസോം പറഞ്ഞതിന് ശേഷമായിരുന്നു കാഷ് പട്ടേല്‍ ഇക്കാര്യം പറഞ്ഞത്. മാത്രമല്ല, താന്‍ നിങ്ങളോട് ചോദിക്കുകയല്ല പറയുകയാണെന്നും അദ്ദേഹം വിശദീകരിച്ചു.
അതിര്‍ത്തി പട്രോള്‍ സേനയും പ്രകടനക്കാരും തമ്മിലുള്ള ഏറ്റുമുട്ടല്‍ അക്രമാസക്തമായതോടെ ഗവര്‍ണര്‍ ന്യൂസോം അസ്വസ്ഥതയ്ക്കും അക്രമത്തിനും കുഴപ്പത്തിനും ട്രംപിന് മേലാണ് കുറ്റം ചുമത്തിയത്. നാഷണല്‍ ഗാര്‍ഡ് സൈനികരെ വിന്യസിച്ചത് നിയമവിരുദ്ധമാണെന്ന് അദ്ദേഹം പറയുകയും വൈറ്റ് ഹൗസിനോട് സൈറ്റില്‍ നിന്ന് അവരെ പിന്‍വലിക്കാന്‍ ഔദ്യോഗികമായി അഭ്യര്‍ഥിക്കുകയും ചെയ്തു. അവരുടെ സാന്നിധ്യം അസ്വസ്ഥത വര്‍ധിപ്പിക്കുകയേയുള്ളൂവെന്ന് അദ്ദേഹം മുന്നറിയിപ്പ് നല്‍കി. സമാധാനം നിലനിര്‍ത്താനാണ് തങ്ങള്‍ ഇവിടെയുള്ളതെന്നും ട്രംപിന്റെ രാഷ്ട്രീയ കളികള്‍ കളിക്കരുതെന്നും അദ്ദേഹം പറഞ്ഞു.
പ്രതിഷേധക്കാര്‍ കാറുകള്‍ കത്തിക്കുന്നതും സ്‌ഫോടക വസ്തുക്കള്‍ എറിയുന്നതിന്റേയും ദൃശ്യങ്ങള്‍ പുറത്തുവന്നതോടെ ലോസ് ഏഞ്ചലസ് പ്രതിഷേധങ്ങള്‍ക്ക് വിനാശകരമായ വഴിത്തിരിവായി. തുടര്‍ന്ന്, സാഹചര്യം നിയന്ത്രിക്കാന്‍ 2000 ട്രൂപ്പര്‍മാരെ വിന്യസിക്കാന്‍ പ്രസിഡന്റ് ട്രംപ് തീരുമാനിക്കുകയായിരുന്നു. കുടിയേറ്റ നിയമങ്ങള്‍ നടപ്പിലാക്കിയതിനെത്തുടര്‍ന്ന് ക്രോംപ്ടണിലെയും പാരാമൗണ്ടിലെയും പ്രധാന പ്രദേശങ്ങളില്‍ നടത്തിയ റെയ്ഡുകള്‍ ഫെഡറല്‍ കെട്ടിടത്തിന് പുറത്ത് 500-ലധികം പ്രകടനക്കാര്‍ ഒത്തുകൂടി.
ഫെഡറല്‍ നിയമ നിര്‍വ്വഹണത്തില്‍ ഇടപെടുന്നവര്‍ക്ക് കര്‍ശനമായ നിയമ പ്രത്യാഘാതങ്ങള്‍ നേരിടേണ്ടിവരുമെന്ന് ട്രംപ് ഭരണകൂടം വ്യക്തമാക്കി. ലോസ് ഏഞ്ചലസ് പ്രതിഷേധങ്ങളെ കുടിയേറ്റ കലാപം എന്നാണ് വിളിച്ചത്.
ജൂണ്‍ ഏഴിന് വെള്ളിയാഴ്ച ഐ സി ഇ എന്‍ഫോഴ്സ്മെന്റ് നടപടികള്‍ക്ക് മറുപടിയായി ലോസ് ഏഞ്ചലസ് ഫെഡറല്‍ കെട്ടിടത്തിന് സമീപമാണ് പ്രതിഷേധങ്ങള്‍ ആരംഭിച്ചത്. നഗരത്തിലെ രണ്ട് പ്രധാന സ്ഥലങ്ങളില്‍ നടത്തിയ റെയ്ഡുകളില്‍ കുടിയേറ്റ ലംഘനങ്ങള്‍ സംശയിക്കുന്ന 44 പേരാണ് അറസ്റ്റിലായത്.