നിര്മിതബുദ്ധിയുടെ അപകടസാധ്യതകളും നിയന്ത്രണവും സംബന്ധിച്ച ചര്ച്ചകള് ശക്തമാകുന്നു
വാഷിംഗ്ടണ്: നിര്മിതബുദ്ധി (എ ഐ) വ്യവസായത്തിനും ഡേറ്റാ സെന്ററുകള്ക്കും ശക്തമായ പിന്തുണ പ്രഖ്യാപിച്ച് യു എസ് പ്രസിഡന്റ് ഡൊണാള്ഡ് ട്രംപ്. മേഖലയെ ദുര്ബലപ്പെടുത്തുകയോ തകര്ക്കുകയോ ചെയ്യുന്ന നീക്കങ്ങള് അനുവദിക്കില്ലെന്ന് ട്രംപ് വ്യക്തമാക്കി. ഇതിനിടെ, നിര്മിതബുദ്ധിയുമായി ബന്ധപ്പെട്ട് ഉയരുന്ന വിമര്ശനങ്ങളെ പ്രതിരോധിക്കുന്നതിന്റെ ഭാഗമായി സര്ക്കാര് സംവിധാനമായ 'എ ഐ ഫോഴ്സ്' രൂപീകരിക്കുമെന്നും അദ്ദേഹം പ്രഖ്യാപിച്ചു.
ലിബറലുകള് നിര്മിതബുദ്ധി മേഖലയെ 'തകര്ക്കാനോ നശിപ്പിക്കാനോ' ശ്രമിക്കുകയാണെന്ന് ട്രംപ് ആരോപിച്ചു. യു എസ് ഈ വ്യവസായത്തിന് തുടര്ന്നും പിന്തുണ നല്കണമെന്നും അദ്ദേഹം പറഞ്ഞു. അമേരിക്കന് പ്രസിഡന്റായ താന് ഇത് സംഭവിക്കാന് അനുവദിച്ച് നോക്കിനില്ക്കില്ലെന്ന് ട്രംപ് തന്റെ സോഷ്യല് മീഡിയ പ്ലാറ്റ്ഫോമായ ട്രൂത്ത് സോഷ്യലില് കുറിച്ചു.
അതിശയകരമായ വ്യവസായത്തിന്റെ വളര്ച്ചയെ ഒരു തരത്തിലും തടസ്സപ്പെടുത്തുകയോ മന്ദഗതിയിലാക്കുകയോ ചെയ്യില്ലെന്നും അതിനെ സംരക്ഷിക്കുകയും സഹായിക്കുകയും മേല്നോട്ടം വഹിക്കുകയും ചെയ്യുമെന്നും ട്രംപ് വ്യക്തമാക്കി.
എന്തിനാണ് എ ഐ ഫോഴ്സ്
എ ഐ ഫോഴ്സിന്റെ പ്രധാന ചുമതല 'മോശം' പ്രവര്ത്തകരെ കണ്ടെത്തുകയായിരിക്കുമെന്ന് ട്രംപ് പറഞ്ഞു. കൂടാതെ, നിര്മിതബുദ്ധിയുമായി ബന്ധപ്പെട്ട കാര്യങ്ങള് ഏകോപിപ്പിക്കുന്നതിനായി ഉടന് ഒരു എ ഐ കോഓര്ഡിനേറ്റര് അഥവാ 'സാര്' (ചുമതലക്കാരന്) നിയമിക്കുമെന്നും അദ്ദേഹം അറിയിച്ചു. പുതിയ പദവിയുടെ കൂടുതല് വിശദാംശങ്ങള് അദ്ദേഹം പുറത്തുവിട്ടിട്ടില്ല.
വന്തോതില് വൈദ്യുതി ആവശ്യമായ ഡേറ്റാ സെന്ററുകളുടെ വ്യാപനം സംബന്ധിച്ച് പൊതുജന ആശങ്കകള് വര്ധിക്കുന്നതിനിടെയാണ് ട്രംപിന്റെ പുതിയ പ്രഖ്യാപനം. സ്വന്തം സമൂഹങ്ങളില് ഇത്തരം ഡേറ്റാ സെന്ററുകള് സ്ഥാപിക്കുന്നതിനെ അമേരിക്കക്കാരില് വലിയൊരു വിഭാഗം എതിര്ക്കുന്നതായി റിപ്പോര്ട്ടില് പരാമര്ശിച്ച അഭിപ്രായ സര്വേകള് വ്യക്തമാക്കുന്നു.
അതേസമയം, നിര്മിതബുദ്ധിയുടെ വികസന വേഗതയും അത്യാധുനിക എ ഐ സംവിധാനങ്ങളില് നിന്നുള്ള അപകടസാധ്യതകളും സംബന്ധിച്ച് വ്യവസായ മേഖലയിലെ ചില പ്രമുഖര് മുന്നറിയിപ്പ് നല്കിയിട്ടും ട്രംപ് സാങ്കേതികവിദ്യയ്ക്ക് പിന്തുണ തുടരുകയാണ്.
എ ഐ അപകടസാധ്യതയെക്കുറിച്ച് മുന്നറിയിപ്പ്
ആന്ത്രോപിക്കില് പ്രവര്ത്തിച്ചിരുന്ന മുന് എ ഐ ഗവേഷകനായ ജേക്കബ് കോക്സണ് അടുത്തിടെ നിര്മിതബുദ്ധിയുടെ അപകടസാധ്യതകളെക്കുറിച്ച് ആശങ്ക പ്രകടിപ്പിച്ചിരുന്നു. എ ഐ വികസിപ്പിക്കുന്ന ചിലര്ക്ക് ഈ സാങ്കേതികവിദ്യ ഈ ദശാബ്ദത്തിന്റെ അവസാനത്തോടെ മനുഷ്യരാശിക്ക് തന്നെ ഗുരുതരമായ ഭീഷണിയാകുമെന്ന വിശ്വാസമുണ്ടെന്ന് അദ്ദേഹം പറഞ്ഞു. എന്നാല് ഇത്തരം മുന്നറിയിപ്പുകളെ ട്രംപ് പലതവണ 'തട്ടിപ്പ്' എന്ന് വിശേഷിപ്പിച്ചിട്ടുണ്ട്.
ചൈനയുമായുള്ള നിര്മിതബുദ്ധി മത്സരത്തില് യു എസിന് പിന്നിലാകാന് കഴിയില്ലെന്നും ട്രംപ് വാദിക്കുന്നു. എ ഐ മേഖലയ്ക്ക് ആവശ്യമായ ഏക നിയന്ത്രണം 'ശക്തനും ബുദ്ധിമാനുമായ പ്രസിഡന്റാണ്' എന്ന നിലപാടും അദ്ദേഹം ആവര്ത്തിച്ചു.
എഐയ്ക്ക് മറ്റൊരു പേര് വേണമോ?
നിര്മിതബുദ്ധി എന്ന പേര് തന്നെ ഈ സാങ്കേതികവിദ്യയ്ക്ക് അനുയോജ്യമാണോ എന്ന ചോദ്യവും ട്രംപ് ഉന്നയിച്ചു. മറ്റൊരു സോഷ്യല് മീഡിയ പോസ്റ്റില് അദ്ദേഹം മൂന്ന് പേരുകളാണ് നിര്ദ്ദേശിച്ചത്. സുപ്പീരിയര് ഇന്റലിജന്സ് (ഉയര്ന്ന ബുദ്ധിശക്തി), എക്സ്ട്രീം ഇന്റലിജന്സ് (അത്യുന്നത ബുദ്ധിശക്തി), സുപ്രിം ഇന്റലിജന്സ് (പരമോന്നത ബുദ്ധിശക്തി) എന്നിവയാണവ.
വളര്ന്നുകൊണ്ടിരിക്കുന്ന ഈ വിപ്ലവത്തിന് ഏറ്റവും മികച്ച പേര് ഏതാണ്? എന്ന ചോദ്യവുമായി വോട്ടെടുപ്പില് പങ്കെടുക്കാനും ട്രംപ് ജനങ്ങളോട് ആവശ്യപ്പെട്ടു.
എ ഐ വികസനം മന്ദഗതിയിലാക്കണമെന്ന ആവശ്യത്തെ ട്രംപ് വിമര്ശിച്ചു
എ ഐ വികസനം മന്ദഗതിയിലാക്കണമെന്ന ആവശ്യത്തെയും ട്രംപ് വിമര്ശിച്ചിരുന്നു. ഇത്തരം ആശങ്കകള് ഉന്നയിക്കുന്നവരെ അദ്ദേഹം 'നെഗറ്റീവ്' ശക്തികളെന്നാണ് വിശേഷിപ്പിച്ചത്.
അയര്ലന്ഡ് സന്ദര്ശനത്തിനിടെ മാധ്യമ പ്രവര്ത്തകരോട് സംസാരിക്കുമ്പോഴായിരുന്നു ട്രംപിന്റെ പരാമര്ശം. സംഭവിക്കാനിടയില്ലാത്ത കാര്യങ്ങളെക്കുറിച്ചാണ് ചില വിമര്ശകര് ആശങ്ക ഉയര്ത്തുന്നതെന്നും അദ്ദേഹം പറഞ്ഞു.
നിലവില് നിര്മിതബുദ്ധി മേഖലയില് യു എസിന് ചൈനയെക്കാള് മുന്തൂക്കമുണ്ടെന്നും ആ നേട്ടം നിലനിര്ത്തേണ്ടത് പ്രധാനമാണെന്നും ട്രംപ് വ്യക്തമാക്കി. എ ഐ മേഖലയ്ക്ക് കൂടുതല് കര്ശനമായ നിയന്ത്രണങ്ങള് ഏര്പ്പെടുത്തണമോ അതോ വികസനത്തിന്റെ വേഗത കുറയ്ക്കണമോ എന്ന ചോദ്യത്തിന് മറുപടിയായാണ് അദ്ദേഹം ഇക്കാര്യം പറഞ്ഞത്.
ഇതിനിടെ, ഈ മാസം ആദ്യം ആന്ത്രോപിക് സി ഇ ഒ ഡാരിയോ അമോഡെയ് അത്യാധുനിക എ ഐയുടെ വികസന വേഗത നിയന്ത്രിക്കുന്നതിനായി മൂന്ന് ഭാഗങ്ങളുള്ള പദ്ധതി നിര്ദേശിച്ചിരുന്നു. കൂടുതല് പുരോഗമിച്ച എ ഐ മോഡലുകള് സൃഷ്ടിക്കുന്നതില് തന്നെ എ ഐ സംവിധാനങ്ങള് സഹായിക്കാന് ശേഷിയാര്ജിച്ചുവരികയാണെന്നും അതിനാല് സാങ്കേതികവിദ്യയുടെ പുരോഗതി എത്ര വേഗത്തിലാകുമെന്നതില് ആശങ്കയുണ്ടെന്നും അദ്ദേഹം ചൂണ്ടിക്കാട്ടി.