കറാച്ചി: മുത്തശ്ശിയുടെ നാല്‍പ്പതാം ചരമദിന ചടങ്ങുകള്‍ ആര്‍ഭാടമായി നടത്തിയ ഒരു പാക്കിസ്താന്‍ ഭിക്ഷക്കാരന്റെ അമ്പരപ്പിക്കുന്ന കഥകളാണ് സാമൂഹിക മാധ്യമങ്ങളില്‍ വൈറലായി മാറുന്നത്.
പാകിസ്ഥാനിലെ ഗുജ്‌റന്‍വാലയില്‍ ഭിക്ഷാടനം നടത്തുന്ന ഒരു വ്യക്തിയാണ് ഈ അതിംഗഭീര വിരുന്ന് നടത്തിയത്. റിപ്പോര്‍ട്ടുകള്‍ പ്രകാരം ഏകദേശം 5 കോടി രൂപയാണ് ആഘോഷങ്ങള്‍ക്കായി ഇയ്യാള്‍ പൊടിച്ചത്. ഏകദേശം 20000 ക്ഷണിതാക്കളായിരുന്നു പരിപാടിക്കുണ്ടായിരുന്നത്. ഇവരെ ക്ഷണിക്കുക മാത്രമല്ല, വേദിയിലേക്ക് കൊണ്ടുപോകാന്‍ 2,000 ത്തോളം വാഹനങ്ങള്‍ ക്രമീകരിക്കുകയും ചെയ്തിരുന്നു.
റിപ്പോര്‍ട്ടുകള്‍ പ്രകാരം പിച്ചക്കാരന്റെ പാര്‍ട്ടി രാജ്യത്തെ കോടീശ്വരന്‍മാരെ വരെ അമ്പരപ്പിച്ചിട്ടുണ്ട്. പാകിസ്താന്‍ കടുത്ത സാമ്പത്തിക പ്രതിസന്ധി നേരിടുന്ന സമയത്താണ് രാജ്യത്ത് നിന്ന് ഇത്തരം ദൂര്‍ത്തുകളുടെ വാര്‍ത്ത ഉയരുന്നതെന്നതും ശ്രദ്ധേയം തന്നെ. ഗുജ്‌റന്‍വാലയിലെ രാഹ്വാലി റെയില്‍വേ സ്റ്റേഷനു സമീപമാണ് പരിപാടി നടന്നത്. പഞ്ചാബിന്റെ വിവിധ ഭാഗങ്ങളില്‍ നിന്ന് ആയിരക്കണക്കിന് ആളുകള്‍ പാര്‍ട്ടിയില്‍ പങ്കെടുത്തു.
ഉച്ചഭക്ഷണത്തിനായി കുടുംബം പരമ്പരാഗത വിഭവങ്ങളായ സിരി പായെ, മുറബ്ബ, വിവിധ മാംസവിഭവങ്ങള്‍ എന്നിവ ഒരുക്കിയിരുന്നു. പലരും വിഭവ സമൃദ്ധമായ മെനു കണ്ട് വാ പൊളിച്ചുവെന്നാണ് വിവരം. അത്താഴത്തിന് ടെന്‍ഡര്‍ മട്ടണ്‍, നാന്‍ മതര്‍ ഗഞ്ച് (മധുരം ഉള്ള ചോറ്), നിരവധി പലഹാരങ്ങള്‍ എന്നിവ ഒരുക്കിയിരുന്നു. പാര്‍ട്ടിക്കായി മാത്രം ഏകദേശം 250 ആടുകളെ കൊന്നുവെന്നും റിപ്പോര്‍ട്ടുകള്‍ വ്യക്തമാക്കുന്നു. എന്തായാലും പാര്‍ട്ടിയില്‍ പങ്കെടുത്തവര്‍ എല്ലാം വളരെ ഹാപ്പിയാണ്.
വിരുന്നിന്റെ വിഡിയോകളും, ചിത്രങ്ങളും ഇതിനകം സോഷ്യല്‍ മീഡിയകളില്‍ തരംഗമാണ്. അത്തരമൊരു ആഢംബര പരിപാടിക്കു പിന്നിലെ സാമ്പത്തിക സ്രോതസിനെക്കുറിച്ചും ചില ചോദ്യങ്ങള്‍ ഉയരുന്നുണ്ട്. ഇതിന് കാരണം കുടുംബത്തിന്റെ ഭിക്ഷാടന പശ്ചത്തലമാണ്. അതേസമയം പിച്ചക്കാരന്റെ പേരോ, വിലാസമോ പോലുള്ള വിവരങ്ങള്‍ ഇപ്പോഴും ലഭ്യമല്ല. പാര്‍ട്ടിയില്‍ പങ്കെടുത്തവരുടെ വിവരങ്ങളും ലഭ്യമല്ല. കുടുംബാംഗങ്ങളും ഭിക്ഷാടനം നടത്തിയാണ് ജീവിക്കുന്നതെന്നാണു റിപ്പോര്‍ട്ടുകള്‍ വ്യക്തമാക്കുന്നത്.
മുത്തശ്ശിയുടെ ചരമദിനത്തിന് പിച്ചക്കാരന്‍ ചെലവാക്കിയ് 5 കോടി; സദ്യയില്‍ പങ്കെടുത്തത് 20000 പേര്‍
