ഇസ്ലാമാബാദ്/ തെഹ്റാന്: പശ്ചിമേഷ്യയിലെ സംഘര്ഷാവസ്ഥ ലഘൂകരിക്കുന്നതിനുള്ള മധ്യസ്ഥശ്രമങ്ങള് തുടരണമെന്ന് ഇറാന് പാകിസ്ഥാനോട് അഭ്യര്ഥിച്ചു. ഇറാന് വിദേശകാര്യ മന്ത്രി അബ്ബാസ് അറഘ്ചിയും പാകിസ്ഥാന് ഉപപ്രധാനമന്ത്രിയും വിദേശകാര്യ മന്ത്രിയുമായ ഇസ്ഹാഖ് ദാറും തമ്മില് നടന്ന ടെലിഫോണ് സംഭാഷണത്തിലാണ് ഈ അഭ്യര്ഥന മുന്നോട്ടുവെച്ചത്.
പാകിസ്ഥാന് വിദേശകാര്യ മന്ത്രാലയം പുറത്തിറക്കിയ പ്രസ്താവന പ്രകാരം മേഖലയിലെ നിലവിലെ സാഹചര്യം ഇരുവരും വിശദമായി ചര്ച്ച ചെയ്തു. പ്രാദേശിക നയതന്ത്ര ശ്രമങ്ങളില് പാകിസ്ഥാന് വഹിച്ച സൃഷ്ടിപരമായ പങ്കിനെ അഭിനന്ദിച്ച അറാഘ്ചി, സംഘര്ഷം കുറയ്ക്കാനും വെടിനിര്ത്തല് നിലനിര്ത്താനുമുള്ള ശ്രമങ്ങള്ക്ക് പാകിസ്ഥാന് നല്ല ബന്ധങ്ങള് ഉപയോഗിച്ച് പിന്തുണ തുടരണമെന്ന് ആവശ്യപ്പെട്ടു.
നിലവിലുള്ള ധാരണകള് തകരാതിരിക്കാനും വെടിനിര്ത്തല് കരാര് നിലനില്ക്കുന്നതും ഉറപ്പാക്കേണ്ടത് അതീവ പ്രധാനമാണെന്ന് ഇസ്ഹാഖ് ദാര് സംഭാഷണത്തിനിടെ വ്യക്തമാക്കി. മേഖലയിലെ സ്ഥിതിഗതികളെക്കുറിച്ച് പാകിസ്ഥാന് ഗൗരവമായ ആശങ്ക പങ്കുവെച്ചതായും പ്രസ്താവനയില് പറയുന്നു.
ലെബനനില് ഇസ്രായേല് സൈനിക നടപടികള് തുടരുന്ന സാഹചര്യത്തില് മധ്യസ്ഥരിലൂടെ നടക്കുന്ന ചര്ച്ചകളും സന്ദേശ കൈമാറ്റവും താത്ക്കാലികമായി നിര്ത്തിവച്ചതായി ഇറാന്റെ തസ്നീം വാര്ത്താ ഏജന്സി റിപ്പോര്ട്ട് ചെയ്തതിന് പിന്നാലെയാണ് ഈ നീക്കം.
അതേസമയം, അമേരിക്കന് പ്രസിഡന്റ് ഡൊണള്ഡ് ട്രംപ് ഇസ്രായേല് പ്രധാനമന്ത്രി ബെഞ്ചമിന് നെതന്യാഹുവുമായും ഹിസ്ബുല്ല പ്രതിനിധികളുമായും നടത്തിയ ചര്ച്ചകള്ക്ക് പിന്നാലെ ആക്രമണങ്ങള് അവസാനിപ്പിക്കുന്നതുമായി ബന്ധപ്പെട്ട ധാരണയിലെത്തിയതായി അവകാശപ്പെട്ടു.
ഇസ്രായേല് പ്രധാനമന്ത്രി ബെഞ്ചമിന് നെതന്യാഹുവുമായി ഫലപ്രദമായ സംഭാഷണം നടത്തിയതായും ബെയ്റൂത്തിലേക്ക് സൈന്യത്തെ അയക്കില്ലെന്നും ട്രംപ് തന്റെ സോഷ്യല് മീഡിയ പ്ലാറ്റ്ഫോമില് കുറിച്ചു.
ഹിസ്ബുല്ലയും വെടിവെപ്പ് അവസാനിപ്പിക്കാന് സമ്മതിച്ചിട്ടുണ്ടെന്നും ഇസ്രായേല് അവരേയും അവര് ഇസ്രായേലിനെയും ആക്രമിക്കില്ലെന്നുമുള്ള ഉറപ്പ് ലഭിച്ചതായും ട്രംപ് വ്യക്തമാക്കി.
എന്നിരുന്നാലും, ലെബനനിലെ സ്ഥിതിഗതികള് ഇപ്പോഴും സങ്കീര്ണമായി തുടരുന്നതിനാല് വെടിനിര്ത്തല് കരാര് എത്രത്തോളം നിലനില്ക്കുമെന്ന കാര്യത്തില് അനിശ്ചിതത്വം തുടരുകയാണ്.