ടെഹ്‌റാന്‍: ഇറാന്റെ പരമോന്നത നേതാവ് ആയത്തുല്ല അലി ഖംനേയ് ശനിയാഴ്ച ഹിസ്ബുല്ല തലവന്‍ ഹസന്‍ നസ്റല്ലയെ ഇസ്രായേല്‍ കൊലപ്പെടുത്തിയതിന് പ്രതികാരം ചെയ്യുമെന്ന് പ്രഖ്യാപിച്ചു. അദ്ദേഹത്തെ രാജ്യത്തിനുള്ളിലെ സുരക്ഷിത സ്ഥാനത്തേക്ക് മാറ്റിയതിന് പിന്നാലെയാണ് പ്രസ്താവന പുറത്തുവന്നത്.
നസ്റല്ലയുടെ മരണത്തില്‍ അഞ്ച് ദിവസത്തെ ദുഃഖാചരണവും പ്രഖ്യാപിച്ചു.
വെള്ളിയാഴ്ച തെക്കന്‍ ബെയ്റൂത്തില്‍ നസ്റല്ലയെ ഇസ്രായേല്‍ കൊലപ്പെടുത്തിയതിന് ശേഷം അടുത്ത ഘട്ടം നിര്‍ണ്ണയിക്കാന്‍ ലെബനനിലെ ഹിസ്ബുല്ലയുമായും മറ്റ് പ്രാദേശിക പ്രോക്സി ഗ്രൂപ്പുകളുമായും ഇറാന്‍ നിരന്തരം ബന്ധപ്പെട്ടിരുന്നതായി സ്രോതസ്സുകള്‍ പറഞ്ഞു.
ഹിസ്ബുല്ലയുടെ ആസ്ഥാനത്തിന് മുകളിലുള്ള ആറ് കെട്ടിടങ്ങള്‍ നിരപ്പാക്കിയ വന്‍ ആക്രമണത്തിലെ മരണസംഖ്യ ഇതുവരെ വ്യക്തമായിട്ടില്ല.
'ലെബനനിലെ പ്രതിരോധമില്ലാത്ത ജനങ്ങളുടെ കൂട്ടക്കൊല, സയണിസ്റ്റ് ഭ്രാന്തന്‍ നായയുടെ ക്രൂരത ഒരിക്കല്‍ കൂടി എല്ലാവരോടും വെളിപ്പെടുത്തിയെന്നും കൊള്ളയടിക്കുന്ന ഭരണകൂടത്തിന്റെ നേതാക്കളുടെ ഹ്രസ്വദൃഷ്ടിയും മണ്ടത്തരവുമായ നയം തെളിയിക്കുകയും ചെയ്തു,' എന്നും അദ്ദേഹം പറഞ്ഞു.
വെള്ളിയാഴ്ച നടന്ന ആക്രമണത്തില്‍ നസ്റല്ലയ്ക്കൊപ്പം തങ്ങളുടെ അര്‍ധസൈനിക റെവല്യൂഷണറി ഗാര്‍ഡിലെ ഒരു പ്രമുഖ ജനറലും കൊല്ലപ്പെട്ടതായി ഇറാന്‍ ശനിയാഴ്ച പ്രഖ്യാപിച്ചു.
'ലബനനിലെ ജനങ്ങള്‍ക്കും ഹിസ്ബുല്ലയ്ക്കും ഒപ്പം നില്‍ക്കാനും ഇസ്രായേലിന്റെ ദുഷ്ട ഭരണകൂടത്തെ നേരിടാന്‍ അവരെ സഹായിക്കാനും' ഖംനേയി ആഹ്വാനം ചെയ്തു.
ഹിസ്ബുല്ല മുന്‍നിരയില്‍ നില്‍ക്കുന്ന പ്രതിരോധ ശക്തികളായിരിക്കും മേഖലയുടെ വിധി നിര്‍ണ്ണയിക്കുകയെന്നും അദ്ദേഹം കൂട്ടിച്ചേര്‍ത്തു.