ടെല്‍ അവീവ്: ഇറാനില്‍നിന്ന് ഇസ്രയേല്‍ നേരിടുന്നത് യഥാര്‍ഥവും ഗൗരവമേറിയതുമായ അസ്തിത്വ ഭീഷണിയാണെന്ന് പ്രധാനമന്ത്രി ബെഞ്ചമിന്‍ നെതന്യാഹു. ഒക്ടോബര്‍ 27-ന് നടക്കുന്ന പാര്‍ലമെന്റ് തെരഞ്ഞെടുപ്പിന് രണ്ടുദിവസം മാത്രം ശേഷിക്കെ, ഇറാന്റെ ആണവഭീഷണി ഉയര്‍ത്തിക്കാട്ടി നെതന്യാഹു സമൂഹമാധ്യമമായ എക്‌സില്‍ പങ്കുവെച്ച കുറിപ്പും ടെല്‍ അവീവില്‍ ആണവസ്‌ഫോടനം നടക്കുന്നതായി ചിത്രീകരിക്കുന്ന നിര്‍മിതബുദ്ധി (എഐ) ഉപയോഗിച്ച് സൃഷ്ടിച്ച ചിത്രവും രാഷ്ട്രീയ വിവാദത്തിന് വഴിവെച്ചു.
ഇറാനെ നേരിടാന്‍ ശേഷിയില്ലാത്ത നേതാവിനെ തെരഞ്ഞെടുക്കുന്നത് ഇസ്രയേലികളെ 'രണ്ടാമതൊരു ഹോളോകോസ്റ്റിന്റെ' അപകടത്തിലേക്ക് നയിക്കുമെന്ന വലതുപക്ഷ രാഷ്ട്രീയ നിരീക്ഷകന്‍ യുവാല്‍ ബ്ലൂംബെര്‍ഗിന്റെ മുന്നറിയിപ്പും നെതന്യാഹു പങ്കുവെച്ചു.
ഇറാന്‍ ആണവായുധങ്ങള്‍ സ്വന്തമാക്കിയാല്‍ മറ്റെല്ലാ വിഷയങ്ങളും അപ്രസക്തമാകുമെന്ന് കുറിപ്പില്‍ പറയുന്നു. ഖത്തര്‍ഗേറ്റ് വിവാദവും തീവ്ര ഓര്‍ത്തഡോക്‌സ് ജൂതവിഭാഗത്തില്‍പ്പെട്ടവരുടെ സൈനിക സേവനത്തില്‍നിന്നുള്ള ഒഴിവാക്കലും ഉള്‍പ്പെടെയുള്ള ആഭ്യന്തര രാഷ്ട്രീയ വിവാദങ്ങള്‍, ഏറ്റവും നിര്‍ണായകമായ സുരക്ഷാ വിഷയത്തില്‍നിന്ന് ജനശ്രദ്ധ തിരിച്ചുവിടാനുള്ള മറയാണെന്നും അദ്ദേഹം വാദിച്ചു.
ഇറാന്റെ ആണവഭീഷണിക്കു മുന്നില്‍ ആഭ്യന്തര രാഷ്ട്രീയ തര്‍ക്കങ്ങള്‍ക്ക് അമിതപ്രാധാന്യം നല്‍കേണ്ടതില്ലെന്നായിരുന്നു നെതന്യാഹുവിന്റെ നിലപാട്. 'മധ്യ ഇസ്രയേലില്‍ രണ്ട് ആണവബോംബുകള്‍ പതിച്ചാല്‍, ഈ അര്‍ഥശൂന്യമായ വിവാദങ്ങളെക്കുറിച്ച് ആരാണ് ചിന്തിക്കുക?' എന്നും അദ്ദേഹം ചോദിച്ചു.
അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് അധികാരത്തിലിരിക്കുന്ന കാലയളവില്‍ ഇറാനെതിരെ നിര്‍ണായക നടപടി സ്വീകരിക്കാന്‍ ഇസ്രയേലിന് പരിമിതമായ അവസരമേയുള്ളൂവെന്നും നെതന്യാഹു മുന്നറിയിപ്പ് നല്‍കി. ഈ ചരിത്രപരമായ അവസരം നഷ്ടപ്പെടുത്തിയാല്‍ ഭാവിതലമുറകള്‍ തങ്ങളോട് ക്ഷമിക്കില്ലെന്നും അദ്ദേഹം പറഞ്ഞു.
ഇറാനെ നേരിടാന്‍ കഴിവില്ലാത്ത നേതാവിനെ തെരഞ്ഞെടുക്കുന്നതിലൂടെ സ്വന്തം കുടുംബങ്ങളെപ്പോലും 'രണ്ടാമതൊരു ഹോളോകോസ്റ്റിന്റെ' അപകടത്തിലേക്ക് തള്ളിവിടാന്‍ ഇസ്രയേല്‍ വോട്ടര്‍മാര്‍ ഇടയാക്കുമെന്നായിരുന്നു നെതന്യാഹുവിന്റെ മുന്നറിയിപ്പ്.
ഒക്ടോബര്‍ 27-ലെ തെരഞ്ഞെടുപ്പിനെ സ്വാധീനിക്കാനോ മാറ്റിവെക്കാനോ ലക്ഷ്യമിട്ട് ഇറാനുമായുള്ള യുദ്ധം പുന:രാരംഭിക്കാന്‍ നെതന്യാഹു ശ്രമിക്കുകയാണെന്ന് വിമര്‍ശകര്‍ അടുത്തിടെ ആരോപിച്ചിരുന്നു. എന്നാല്‍ ഈ ആരോപണം അദ്ദേഹം നിഷേധിച്ചു.
തെരഞ്ഞെടുപ്പിന് മുമ്പ് ഇറാനെ ആക്രമിക്കേണ്ട സൈനികമായ ആവശ്യകത താന്‍ കാണുന്നില്ലെന്ന് ഇസ്രയേല്‍ പ്രതിരോധസേനാ മേധാവി ലെഫ്റ്റനന്റ് ജനറല്‍ ഇയാല്‍ സാമിര്‍ അടുത്തിടെ നടന്ന സ്വകാര്യ യോഗത്തില്‍ പറഞ്ഞതായി റിപ്പോര്‍ട്ടുകളുണ്ട്.
നെതന്യാഹുവിന്റെ പരാമര്‍ശത്തിനെതിരെ യാഷര്‍ പാര്‍ട്ടി അധ്യക്ഷന്‍ ഗാദി ഐസന്‍കോട്ട് രൂക്ഷ വിമര്‍ശനവുമായി രംഗത്തെത്തി. തെരഞ്ഞെടുപ്പിന് തൊട്ടുമുമ്പ് ജനങ്ങളില്‍ ഭീതി സൃഷ്ടിക്കാനാണ് പ്രധാനമന്ത്രിയുടെ ശ്രമമെന്ന് അദ്ദേഹം ആരോപിച്ചു.
'നെതന്യാഹു, നിങ്ങള്‍ പരിഭ്രാന്തിയിലാണ്. ഓരോ തെരഞ്ഞെടുപ്പ് പ്രചാരണത്തിലും നുണകളും ഭീഷണിപ്പെടുത്തലുമാണ് നിങ്ങളുടെ പതിവ്. ഇത്തവണ ഇസ്രയേല്‍ പൗരന്മാരെ കൂട്ടനാശത്തിന്റെ ഭീഷണിയിലൂടെയാണ് ഭയപ്പെടുത്തുന്നത്. ഇറാനുമായുള്ള യുദ്ധത്തിന്റെ ലക്ഷ്യങ്ങള്‍ കൈവരിക്കുന്നതില്‍ നിങ്ങള്‍ പരാജയപ്പെട്ടതിന് ശേഷമാണിത്,' ഐസന്‍കോട്ട് എക്‌സില്‍ കുറിച്ചു.
'നിങ്ങള്‍ പരാജയപ്പെട്ടു. രണ്ടുദിവസത്തിനകം ബാലറ്റിലൂടെ ഇസ്രയേല്‍ ജനത അത് നിങ്ങളെ ബോധ്യപ്പെടുത്തും,' എന്നും അദ്ദേഹം പറഞ്ഞു.
ഡെമോക്രാറ്റ്‌സ് പാര്‍ട്ടി അധ്യക്ഷന്‍ യായിര്‍ ഗോലാനും നെതന്യാഹുവിന്റെ പോസ്റ്റിനെതിരെ രംഗത്തെത്തി. 'അറിയിപ്പ്: ഇസ്രയേല്‍ പ്രധാനമന്ത്രി ടെല്‍ അവീവിന് മുകളില്‍ ആണവബോംബ് പൊട്ടിത്തെറിക്കുന്ന ചിത്രം പ്രസിദ്ധീകരിച്ചിരിക്കുന്നു' എന്നായിരുന്നു ഗോലാന്റെ പരിഹാസം.
നെതന്യാഹുവിനെ സമൂഹമാധ്യമങ്ങളില്‍നിന്ന് അകറ്റിനിര്‍ത്തണമെന്നും അദ്ദേഹവും ചുറ്റുമുള്ളവരും നിയന്ത്രണം നഷ്ടപ്പെട്ട അവസ്ഥയിലാണെന്നും ഗോലാന്‍ ആരോപിച്ചു. സമ്മര്‍ദം വര്‍ധിച്ചുവരികയാണെന്നും അദ്ദേഹം കൂട്ടിച്ചേര്‍ത്തു.
'ചൊവ്വാഴ്ച ഭീതി വിതയ്ക്കുന്നവരെ അധികാരത്തില്‍നിന്ന് മാറ്റി ഇസ്രയേലില്‍ സുരക്ഷയും വിവേകവും പുനഃസ്ഥാപിക്കും,' എന്നും ഗോലാന്‍ വ്യക്തമാക്കി.
2028-ല്‍ ട്രംപിന്റെ കാലാവധി അവസാനിച്ചശേഷം അധികാരത്തിലെത്തുന്ന അമേരിക്കന്‍ പ്രസിഡന്റ് ഇസ്രയേലിന് ഇതേ തരത്തിലുള്ള പിന്തുണ നല്‍കുമോയെന്ന ചോദ്യവും ബ്ലൂംബെര്‍ഗ് ഉയര്‍ത്തിയിരുന്നു.
ഇറാന്‍ ആണവായുധങ്ങള്‍ സ്വന്തമാക്കിയാല്‍ മറ്റെല്ലാ രാഷ്ട്രീയ തര്‍ക്കങ്ങളും അപ്രസക്തമാകുമെന്നായിരുന്നു അദ്ദേഹത്തിന്റെ വാദം. ഏറ്റവും നിര്‍ണായകമായ സുരക്ഷാ വെല്ലുവിളിയില്‍നിന്ന് ജനശ്രദ്ധ തിരിച്ചുവിടുന്നതാണ് നിലവിലെ വിവാദങ്ങളെന്നും അദ്ദേഹം ആരോപിച്ചു.
നെതന്യാഹുവിന്റെ വീണ്ടും തെരഞ്ഞെടുക്കപ്പെടാനുള്ള ശ്രമത്തിന് ട്രംപ് ഇതിനകം പിന്തുണ പ്രഖ്യാപിച്ചിട്ടുണ്ട്. ഇറാനെ നേരിടുന്നതില്‍ ഇരുനേതാക്കളും തമ്മിലുള്ള പങ്കാളിത്തം നിര്‍ണായകമാണെന്ന നെതന്യാഹുവിന്റെ വാദത്തിന് ട്രംപിന്റെ പിന്തുണ കൂടുതല്‍ കരുത്തുപകരുന്നതായാണ് വിലയിരുത്തല്‍.