സോഫിയ: ബോംബ് ഭീഷണിയെ തുടര്‍ന്ന് ടെല്‍ അവീവില്‍നിന്ന് വിയന്നയിലേക്ക് പുറപ്പെട്ട ഓസ്ട്രിയന്‍ എയര്‍ലൈന്‍സ് വിമാനം ബള്‍ഗേറിയയിലെ സോഫിയയില്‍ അടിയന്തരമായി ഇറക്കി. യാത്രക്കാരും ജീവനക്കാരുമടക്കം 57 പേരാണ് വിമാനത്തിലുണ്ടായിരുന്നത്. എല്ലാവരെയും സുരക്ഷിതമായി പുറത്തിറക്കിയതായും വിമാനത്തില്‍ പരിശോധന ആരംഭിച്ചതായും ബള്‍ഗേറിയന്‍ അധികൃതര്‍ അറിയിച്ചു. സംഭവത്തെക്കുറിച്ച് അന്വേഷണം ആരംഭിച്ചിട്ടുണ്ട്.
ഞായറാഴ്ച റൊമാനിയന്‍ വ്യോമാതിര്‍ത്തിയോട് അടുക്കുന്നതിനിടെയാണ് വിമാനത്തിന് ബോംബ് ഭീഷണി ലഭിച്ചതെന്നാണ് വിവരം. ഇതേത്തുടര്‍ന്ന് ജീവനക്കാര്‍ അടിയന്തരമായി വിമാനം സോഫിയയില്‍ ഇറക്കാന്‍ തീരുമാനിക്കുകയായിരുന്നു. സുരക്ഷാ നടപടികളുടെ ഭാഗമായി ബള്‍ഗേറിയന്‍ വ്യോമസേന മിഗ്-29 യുദ്ധവിമാനം അയച്ച് യാത്രാവിമാനത്തിന് അകമ്പടി നല്‍കി.
എയര്‍ബസ് എ320 വിഭാഗത്തില്‍പ്പെട്ട വിമാനത്തില്‍ 51 യാത്രക്കാരും ആറു ജീവനക്കാരുമാണുണ്ടായിരുന്നത്. വിമാനം നിലത്തിറങ്ങിയ ഉടന്‍ എല്ലാവരെയും ഒഴിപ്പിച്ചു. വിമാനത്തില്‍ സ്‌ഫോടകവസ്തുക്കളോ സംശയാസ്പദമായ വസ്തുക്കളോ ഉണ്ടോയെന്ന് സുരക്ഷാ ഉദ്യോഗസ്ഥര്‍ വിശദമായ പരിശോധന നടത്തിവരികയാണ്. പരിശോധന പൂര്‍ത്തിയായാല്‍ യാത്രക്കാരെ കഴിയുന്നത്ര വേഗത്തില്‍ മറ്റു വിമാനങ്ങളില്‍ ലക്ഷ്യസ്ഥാനത്തെത്തിക്കുമെന്ന് ഓസ്ട്രിയന്‍ എയര്‍ലൈന്‍സ് അറിയിച്ചു.
വിമാനത്തിലില്ലാതിരുന്ന ഒരു ഓസ്ട്രിയന്‍ പൗരനാണ് ഭീഷണി സന്ദേശം നല്‍കിയതെന്ന് ഇസ്രയേലി പത്രമായ ഹാരെറ്റ്‌സ് റിപ്പോര്‍ട്ട് ചെയ്തു. എന്നാല്‍ ഭീഷണിയുടെ ഉറവിടം സംബന്ധിച്ച വിവരങ്ങള്‍ ഔദ്യോഗിക അന്വേഷണത്തിലൂടെ സ്ഥിരീകരിക്കേണ്ടതുണ്ട്.
അടുത്തിടെ വിമാനസുരക്ഷയുമായി ബന്ധപ്പെട്ട് യൂറോപ്പിലും ഇസ്രയേലിലും നിരവധി സംഭവങ്ങള്‍ റിപ്പോര്‍ട്ട് ചെയ്തിരുന്നു. കഴിഞ്ഞ മാസം ദുബായില്‍നിന്ന് ടെല്‍ അവീവിലേക്ക് പോയ ഫ്‌ളൈ ദുബായ് വിമാനത്തില്‍ സഹപൈലറ്റ് വിമാനത്തിന്റെ നിയന്ത്രണം ഏറ്റെടുത്ത് ബോധപൂര്‍വം അപകടമുണ്ടാക്കാന്‍ ശ്രമിച്ചെങ്കിലും ക്യാപ്റ്റനും യാത്രക്കാരും മറ്റു ജീവനക്കാരും ചേര്‍ന്ന് തടഞ്ഞതായി റിപ്പോര്‍ട്ടുകളുണ്ടായിരുന്നു. ഇതേത്തുടര്‍ന്ന് ഇസ്രയേലിലെ വ്യോമയാന സുരക്ഷാ സംവിധാനങ്ങളെക്കുറിച്ച് കൂടുതല്‍ പരിശോധന വേണമെന്ന ആവശ്യം ഉയര്‍ന്നിരുന്നു.
കഴിഞ്ഞയാഴ്ച ബെന്‍ ഗുരിയോണ്‍ വിമാനത്താവളത്തില്‍ ഇറങ്ങിയ ഡെല്‍റ്റ എയര്‍ലൈന്‍സ് വിമാനത്തില്‍ സംശയാസ്പദമായ ഉപകരണമുണ്ടെന്ന അജ്ഞാത സന്ദേശത്തെ തുടര്‍ന്ന് പരിശോധന നടത്തിയിരുന്നു. അതേസമയം, ഗ്രീക്ക് ദ്വീപായ കോര്‍ഫുവില്‍നിന്ന് ജര്‍മനിയിലെ ന്യൂറംബര്‍ഗിലേക്ക് പോയ വാണിജ്യവിമാനത്തില്‍നിന്ന് അബദ്ധത്തില്‍ അപഹരണ മുന്നറിയിപ്പ് ലഭിച്ചതിനെ തുടര്‍ന്ന് ക്രൊയേഷ്യയും ജര്‍മനിയും യുദ്ധവിമാനങ്ങള്‍ അയച്ചതായും റിപ്പോര്‍ട്ടുകളുണ്ട്.
വിമാനങ്ങള്‍ക്ക് നേരെയുള്ള ഭീഷണികളും സുരക്ഷാ മുന്നറിയിപ്പുകളും വര്‍ധിക്കുന്ന സാഹചര്യത്തില്‍ അന്താരാഷ്ട്ര വ്യോമയാന മേഖലയില്‍ ജാഗ്രത ശക്തമാക്കിയിരിക്കുകയാണ്. സോഫിയയില്‍ അടിയന്തരമായി ഇറക്കിയ വിമാനത്തിലെ ബോംബ് ഭീഷണിയുടെ യഥാര്‍ഥ ഉറവിടം കണ്ടെത്താനുള്ള അന്വേഷണം തുടരുകയാണ്.
ബോംബ് ഭീഷണി; ടെല്‍ അവീവ്-വിയന്ന വിമാനം ബള്‍ഗേറിയയില്‍ അടിയന്തരമായി ഇറക്കി, അകമ്പടിയായി മിഗ്-29 പോര്‍വിമാനം
