ഇസ്താംബുള്‍: തുര്‍ക്കിയില്‍ നടക്കാനിരിക്കുന്ന യുക്രെയ്ന്‍-റഷ്യ സമാധാന ചര്‍ച്ചകളില്‍ തനിക്ക് വലിയ പ്രതീക്ഷകളൊന്നുമില്ലെന്നും പുരോഗതി കൈവരിക്കണമെങ്കില്‍ ഡോണാള്‍ഡ് ട്രംപും റഷ്യന്‍ പ്രസിഡന്റ് വഌഡിമിര്‍ പുടിനും കൂടിക്കാഴ്ച നടത്തേണ്ടതുണ്ടെന്നും ഉന്നത യുഎസ് നയതന്ത്രജ്ഞന്‍ മാര്‍ക്കോ റൂബിയോ പറയുന്നു.
'ഈ വിഷയത്തില്‍ പ്രസിഡന്റ് ട്രംപും പ്രസിഡന്റ് പുടിനും നേരിട്ട് ആശയവിനിമയം നടത്തുന്നതുവരെ ഇവിടെ ഒരു വഴിത്തിരിവ് ഉണ്ടാകുമെന്ന് ഞാന്‍ കരുതുന്നില്ല,'- ദക്ഷിണ തുര്‍ക്കിയില്‍ നാറ്റോ വിദേശകാര്യ മന്ത്രിമാരുടെ യോഗത്തിന് ശേഷം അദ്ദേഹം പറഞ്ഞു.
ഇസ്താംബൂളില്‍ നടക്കുന്ന ചര്‍ച്ചകള്‍ക്ക് യുക്രെയ്ന്‍ പ്രതിനിധി സംഘത്തെ അയയ്ക്കുമെന്ന് വോളോഡിമര്‍ സെലെന്‍സ്‌കി സ്ഥിരീകരിച്ചു, എന്നാല്‍ മോസ്‌കോ ഒരു 'താഴ്ന്ന തല' പ്രതിനിധി സംഘത്തെയാണ് അയയ്ക്കുന്നതെന്ന് അദ്ദേഹം വിമര്‍ശിച്ചു.
ക്രെംലിന്‍ സംഘത്തിന് 'ആവശ്യമായ എല്ലാ കഴിവുകളും' ഉണ്ടെന്ന് സംഘത്തെ നയിക്കുന്ന പ്രസിഡന്റ് സഹായി വഌഡിമിര്‍ മെഡിന്‍സ്‌കി തറപ്പിച്ചു പറഞ്ഞു.
താനും പുടിനും നേരിട്ട് കണ്ടുമുട്ടുന്നതുവരെ സമാധാന ചര്‍ച്ചകളില്‍ കാര്യമായ പുരോഗതി ഉണ്ടാകാന്‍ സാധ്യതയില്ലെന്ന് മിഡില്‍ ഈസ്റ്റ് സന്ദര്‍ശിക്കുന്ന ട്രംപ്, നേരത്തെ അഭിപ്രായപ്പെട്ടിരുന്നു.
റഷ്യന്‍ പ്രതിനിധി സംഘത്തിന്റെ നിലവാരത്തില്‍ നിരാശയുണ്ടോ എന്ന് എയര്‍ഫോഴ്‌സ് വണ്ണില്‍ ബിബിസി ചോദിച്ചപ്പോളാണ് 'നോക്കൂ, പുടിനും ഞാനും ഒത്തുചേരുന്നതുവരെ ഒന്നും സംഭവിക്കാന്‍ പോകുന്നില്ല' എന്ന് അദ്ദേഹം പറഞ്ഞത്.
'ഞാനില്ലെങ്കില്‍ അദ്ദേഹം പോകില്ലായിരുന്നു, നിങ്ങള്‍ ഇഷ്ടപ്പെട്ടാലും ഇല്ലെങ്കിലും, അദ്ദേഹവും ഞാനും ഒന്നിക്കുന്നതുവരെ ഒന്നും സംഭവിക്കുമെന്ന് ഞാന്‍ വിശ്വസിക്കുന്നില്ല, എന്നാല്‍ വളരെയധികം ആളുകള്‍ മരിക്കുന്നതിനാല്‍ ഞങ്ങള്‍ അത് പരിഹരിക്കേണ്ടതുണ്ട്.' അദ്ദേഹം കൂട്ടിച്ചേര്‍ത്തു.
'ഉചിതമാണെങ്കില്‍' വെള്ളിയാഴ്ച തുര്‍ക്കിയില്‍ നടക്കുന്ന ചര്‍ച്ചകളില്‍ പങ്കെടുക്കുമെന്ന് ട്രംപ് പറഞ്ഞെങ്കിലും പിന്നീട് അദ്ദേഹം വാഷിംഗ്ടണിലേക്ക് മടങ്ങുമെന്ന് പറഞ്ഞു.
2022 ന് ശേഷമുള്ള ആദ്യത്തെ നേരിട്ടുള്ള യുക്രെയ്ന്‍-റഷ്യ ചര്‍ച്ചകള്‍ക്കായി വ്യാഴാഴ്ച ഇസ്താംബൂളില്‍ തുര്‍ക്കി, യുഎസ്, ഉക്രെയ്ന്‍, റഷ്യ എന്നിവിടങ്ങളില്‍ നിന്നുള്ള പ്രതിനിധികള്‍ കൂടിക്കാഴ്ച നടത്താന്‍ പദ്ധതിയിട്ടിരുന്നു.
എന്നാല്‍ വ്യാഴാഴ്ച വൈകുന്നേരം വരെ, സമയക്കുറവുമൂലം അത് നടന്നില്ല. ചില റിപ്പോര്‍ട്ടുകള്‍ സൂചിപ്പിക്കുന്നത് ആ യോഗം വെള്ളിയാഴ്ച നടന്നേക്കാമെന്നാണ്.
30 ദിവസത്തെ നിരുപാധിക വെടിനിര്‍ത്തലിനായി യൂറോപ്യന്‍ നേതാക്കളും യുക്രെയ്‌നും നടത്തിയ ആഹ്വാനത്തിന് മറുപടിയായി വഌഡിമിര്‍ പുടിന്‍ മെയ് 15 ന് ഇസ്താംബൂളില്‍ നേരിട്ട് ചര്‍ച്ചകള്‍ നടത്താമെന്ന് നിര്‍ദ്ദേശിച്ചു.
ചര്‍ച്ച നടത്തണമെങ്കില്‍ പുടിന്‍ നേരിട്ടുവരണമെന്ന് സെലെന്‍സ്‌കി ആവശ്യപ്പെട്ടു. എന്നാല്‍ വ്യാഴാഴ്ച ക്രെംലിന്‍ പറഞ്ഞത് റഷ്യന്‍ പ്രസിഡന്റ് യാത്ര കാരണം തുര്‍ക്കിയിലേക്കുള്ള ഉദ്യോഗസ്ഥരുടെ കൂട്ടത്തിലില്ല എന്നാണ്.
റഷ്യന്‍ പ്രതിനിധി സംഘത്തില്‍ അപ്രസക്തരായ ഉദ്യോഗസ്ഥരെ ഉള്‍പ്പെടുത്തി ട്രംപിനോടും എര്‍ദോഗനോടും മോസ്‌കോ 'അനാദരവ്' കാണിച്ചുവെന്ന് അങ്കാറയില്‍ എര്‍ദോഗനുമായുള്ള ഒരു ഉഭയകക്ഷി കൂടിക്കാഴ്ചയ്ക്ക് ശേഷം, സെലെന്‍സ്‌കി ആരോപിച്ചു. കൂടാതെ പുടിന്‍ തന്നെ വ്യക്തിപരമായി കാണാന്‍ സെലന്‍സ്‌കി വെല്ലുവിളിക്കുകയും ചെയ്തു
'കൂടിക്കാഴ്ചയ്ക്ക് സമയമില്ല, അജണ്ടയില്ല, ഉയര്‍ന്ന തലത്തിലുള്ള പ്രതിനിധി സംഘമില്ല ഇത് എര്‍ദോഗനോടും ട്രംപിനോടുമുള്ള വ്യക്തിപരമായ അനാദരവാണ്,' അദ്ദേഹം പറഞ്ഞു.
അതേസമയം, 2022 ല്‍ റഷ്യ തങ്ങളുടെ അയല്‍ക്കാരനെ പൂര്‍ണ്ണ തോതിലുള്ള അധിനിവേശം ആരംഭിച്ചതിന് തൊട്ടുപിന്നാലെ നടന്ന പരാജയപ്പെട്ട ചര്‍ച്ചകളുടെ 'തുടര്‍ച്ച'യായാണ് റഷ്യ ചര്‍ച്ചകളെ കണ്ടതെന്ന് പുടിന്റെ സഹായിയായ പ്രതിനിധി സംഘത്തലവന്‍ മെഡിന്‍സ്‌കി ഇസ്താംബൂളില്‍ മാധ്യമപ്രവര്‍ത്തകരോട് പറഞ്ഞു.
'യുക്രേനിയന്‍ പക്ഷവുമായി നേരിട്ടുള്ള ചര്‍ച്ചകളുടെ ലക്ഷ്യം, സംഘര്‍ഷത്തിന്റെ അടിസ്ഥാന കാരണങ്ങള്‍ ഇല്ലാതാക്കി ദീര്‍ഘകാല സമാധാനം സ്ഥാപിക്കുക എന്നതാണെന്ന് മെഡിന്‍സ്‌കി പറഞ്ഞു.
വ്യാഴാഴ്ച പുറപ്പെടുവിച്ച സെലെന്‍സ്‌കിയുടെ ഉത്തരവനുസരിച്ച്, യുക്രേനിയന്‍ പ്രതിനിധി സംഘത്തെ പ്രതിരോധ മന്ത്രി റസ്റ്റം ഉമെറോവ് നയിക്കും. ഇന്റലിജന്‍സ് ഡെപ്യൂട്ടി മേധാവികള്‍, സൈനിക ജനറല്‍ സ്റ്റാഫ്, വിദേശകാര്യ മന്ത്രാലയം എന്നിവരും സംഘത്തില്‍ ഉള്‍പ്പെടും.
2022 ല്‍ യുക്രെയ്‌നുമായുള്ള പരാജയപ്പെട്ട മുന്‍ റൗണ്ട് ചര്‍ച്ചകള്‍ക്ക് നേതൃത്വം നല്‍കിയ മെഡിന്‍സ്‌കി റഷ്യന്‍ പ്രതിനിധി സംഘത്തെ നയിക്കുമെന്ന് ക്രെംലിനില്‍ നിന്നുള്ള ഒരു പ്രസ്താവനയില്‍ പറയുന്നു. റഷ്യയുടെ ഡെപ്യൂട്ടി പ്രതിരോധ മന്ത്രി, ഡെപ്യൂട്ടി വിദേശകാര്യ മന്ത്രി, സൈനിക ഇന്റലിജന്‍സ് മേധാവി എന്നിവരും അവിടെ ഉണ്ടാകും.
യുക്രെയ്ന്‍ സമാധാന ചര്‍ച്ചകളില്‍ പുരോഗതി വേണമെങ്കില്‍ ട്രംപ് പുടിന്‍ കൂടിക്കാഴ്ച ആവശ്യമാണെന്ന് മാര്‍ക്കോ റൂബിയോ
