ഒട്ടാവ:ജി 7 രാജ്യങ്ങളിലെ വിദേശ കാര്യമന്ത്രിമാരുടെ ഉച്ചകോടിക്ക് ആതിഥേയത്വം വഹിക്കാന്‍ തയ്യാറെടുക്കുകയാണ് കാനഡ. യുഎസുമായുള്ള വര്‍ദ്ധിച്ചുവരുന്ന വ്യാപാര യുദ്ധം സൃഷ്ടിക്കുന്ന പ്രതിസന്ധിയെ അഭിസംബോധന ചെയ്യാനുള്ള തയ്യാറെടുപ്പിലാണ് കാനഡ വിദേശകാര്യ മന്ത്രി മെലാനി ജോളിയും. ട്രംപിന്റെ വിദേശ വ്യാപാര നയങ്ങളില്‍ ഒരു രാജ്യവും സുരക്ഷിതരല്ല എന്ന മുന്നറിയിപ്പ് നല്‍കാനാണ് മെലാനിയുടെ ശ്രമം.
'യുഎസിന് അവരുടെ ഏറ്റവും അടുത്ത സുഹൃത്തായ ഞങ്ങളോട് ഇത് ചെയ്യാന്‍ കഴിയുമെങ്കില്‍ മറ്റുള്ളവരോട് ഇതിപ്പുറവും ആകാം എന്ന് മുന്നറിയിപ്പാണ് യുഎസ് നടപടികളുടെ പ്രത്യാഘാതങ്ങളെക്കുറിച്ച് ജോളി നല്‍കുക.
ജി 7 യോഗത്തിന്റെ ഔദ്യോഗിക അജണ്ട യുക്രെയ്ന്‍, മിഡില്‍ ഈസ്റ്റ്, ഹെയ്തി, വെനിസ്വേല എന്നിവിടങ്ങളില്‍ ശ്രദ്ധ കേന്ദ്രീകരിക്കുന്നുണ്ടെങ്കിലും, ജോളി തന്റെ നയതന്ത്ര പങ്കാളികളുമായി യുഎസ് താരിഫുകളുടെയും പരമാധികാര ഭീഷണികളുടെയും വിഷയം ഉന്നയിക്കാനും ഉദ്ദേശിക്കുന്നു. യുഎസ് വ്യാപാര നയങ്ങള്‍ക്കെതിരെ കൂട്ടായ നടപടിയുടെ ആവശ്യകത ഊന്നിപ്പറയുന്നതിനും പിന്തുണ ശേഖരിക്കുന്നതിനുമുള്ള ഒരു ശ്രമമായാണ് ഈ നീക്കത്തെ കാണുന്നത്.
ട്രംപ് കനേഡിയന്‍ സ്റ്റീലിനും അലുമിനിയത്തിനും 25 ശതമാനം തീരുവ ചുമത്തിയതോടെ യുഎസ് താരിഫുകളുടെ ആഘാതത്തില്‍ കാനഡ വലഞ്ഞിരിക്കുകയാണ്. ഇതിന് മറുപടിയായി, ട്രംപിന്റെ താരിഫുകള്‍ സാമ്പത്തിക ബലപ്രയോഗത്തിനുള്ള ഒരു ഒഴികഴിവാണെന്ന് വാദിച്ചുകൊണ്ട് ജോളി രൂക്ഷമായി പ്രതികരിച്ചു. ഏകദേശം 20 ബില്യണ്‍ ഡോളര്‍ വിലമതിക്കുന്ന അമേരിക്കന്‍ ഉല്‍പ്പന്നങ്ങള്‍ക്ക് കാനഡയും കൗണ്ടര്‍താരിഫ് ചുമത്തി.
വിഷയത്തിന്റെ കാതല്‍ കാനഡയുടെ പരമാധികാരമാണ്. 51-ാമത്തെ യുഎസ് സംസ്ഥാനമായി കീഴടങ്ങിയോ ബലപ്രയോഗത്തിലൂടെ പിടിച്ചെടുത്തോ കാനഡയ്ക്ക് നികുതികളില്‍ നിന്ന് മോചനം നേടാം എന്ന ഭീഷണികള്‍ ട്രംപ് ആവര്‍ത്തിച്ചിട്ടുണ്ട്. എന്നാല്‍ യുഎസ് നിര്‍ബന്ധത്തിന് മുന്നില്‍ കാനഡ പിന്നോട്ട് പോകില്ലെന്ന് പ്രസ്താവിച്ചുകൊണ്ട് ജോളി തന്റെ ആശങ്കകള്‍ ഉറക്കെ പറയുകയാണ്. കാനഡയുടെ പരമാധികാരം സംരക്ഷിക്കുന്നതിന് സൈനികാഭ്യാസങ്ങളിലും പ്രതിരോധ ഉപകരണങ്ങളിലും യൂറോപ്പുമായി സഹകരിക്കേണ്ടതിന്റെ ആവശ്യകതയും അവര്‍ ഊന്നിപ്പറഞ്ഞു.
എന്നാല്‍, കാനഡയെ യുഎസിനോട് കൂട്ടിച്ചേര്‍ക്കും എന്ന നിലയിലുള്ള ട്രംപിന്റെ പ്രസ്താവനകളെ യുഎസ് സ്റ്റേറ്റ് സെക്രട്ടറി മാര്‍ക്കോ റൂബിയോ നിസ്സാരവല്‍ക്കരിച്ചു. സാമ്പത്തിക കാഴ്ചപ്പാടില്‍ കാനഡ 51ാമത്തെ സംസ്ഥാനമായി മാറണമെന്നാണ് പ്രസിഡന്റ് വിശ്വസിക്കുന്നതെന്ന് സൂചനയാണിതെന്ന് മാര്‍ക്കോ റൂബിയോ വ്യാഖ്യാവനിച്ചു. 'കാനഡ 51ാമത്തെ സംസ്ഥാനമായി മാറിയാല്‍, അതിര്‍ത്തിയും അതുവഴി ഫെന്റനൈല്‍ കടന്നുപോകുന്നതിനെക്കുറിച്ചും ഞങ്ങള്‍ വിഷമിക്കേണ്ടതില്ലല്ലോ എന്നും അദ്ദേഹം കൂട്ടിച്ചേര്‍ത്തു.
കാനഡയില്‍ നിന്നുള്ള എല്ലാ ഇറക്കുമതികള്‍ക്കും തീരുവ ചുമത്തുമെന്ന ട്രംപിന്റെ ഭീഷണിയും രാജ്യത്തെ 51ാമത്തെ യുഎസ് സംസ്ഥാനമാക്കുന്നതിനുള്ള അദ്ദേഹത്തിന്റെ നിരന്തരമായ ചിന്തയും കാരണം അമേരിക്കയും കാനഡയും തമ്മിലുള്ള ബന്ധം എക്കാലത്തെയും താഴ്ന്ന നിലയിലാണ്.
തങ്ങളുടെ രാജ്യത്തിന്റെ പരമാധികാരം ഭീഷണിയിലാണെന്ന് കരുതുന്ന നിരവധി കാനഡക്കാര്‍ ട്രംപിന്റെ കാഴ്ചപ്പാടിനെ സംശയത്തോടെയാണ് കാണുന്നത്.
എന്നാല്‍ 'ജി7ല്‍ ഞങ്ങള്‍ ആ കാര്യങ്ങളിലെല്ലാം ശ്രദ്ധ കേന്ദ്രീകരിക്കാന്‍ പോകുന്നു എന്നതാണ് ഈ കൂടിക്കാഴ്ചയുടെ ലക്ഷ്യമെന്ന് യുഎസ് സ്റ്റേറ്റ് സെക്രട്ടറി മാര്‍ക്കോ റൂബിയോ വ്യക്തമാക്കി. അല്ലാതെ കാനഡയെ അമേരിക്ക എങ്ങനെ ഏറ്റെടുക്കും എന്നതിനെക്കുറിച്ച് ചര്‍ച്ചചെയ്യുന്ന ഒരു യോഗമല്ല ഇത്,' റൂബിയോ മാധ്യമപ്രവര്‍ത്തകരോട് പറഞ്ഞു.
കാനഡയില്‍ പുതിയ പ്രധാനമന്ത്രി സത്യപ്രതിജ്ഞ ചെയ്യാന്‍ തയ്യാറെടുക്കുമ്പോള്‍, യുഎസുമായുള്ള വ്യാപാര തര്‍ക്കം ഒരു അടിയന്തര ആശങ്കയായി തുടരുകയാണ്. ട്രംപിന്റെ വ്യാപാര ആക്രമണത്തെ 'സാമ്പത്തിക, പരമാധികാര പ്രതിസന്ധി' യായി തിരിച്ചറിയുന്ന നിയുക്ത പ്രധാനമന്ത്രി മാര്‍ക്ക് കാര്‍ണി, കാനഡയെയും ഗ്രീന്‍ലാന്‍ഡിനെയും ഏറ്റെടുത്തുകൊണ്ട് പ്രസിഡന്റ് അര്‍ദ്ധഗോളത്തില്‍ ആധിപത്യം സ്ഥാപിക്കുന്നത് തടയുമെന്ന് പ്രതിജ്ഞയെടുത്തു.
'അമേരിക്കക്കാര്‍ക്ക് നമ്മുടെ വിഭവങ്ങള്‍, നമ്മുടെ വെള്ളം, നമ്മുടെ ഭൂമി, നമ്മുടെ രാജ്യം എന്നിവ വേണം,' 'അതിനെക്കുറിച്ചാണ് ചിന്തിക്കേണ്ടത്. അവര്‍ വിജയിച്ചാല്‍, അവര്‍ നമ്മുടെ ജീവിതരീതി നശിപ്പിക്കും.'-അദ്ദേഹം ഞായറാഴ്ച മുന്നറിയിപ്പ് നല്‍കി.
'ജനാധിപത്യം നല്‍കപ്പെട്ടതല്ല. സ്വാതന്ത്ര്യം നല്‍കപ്പെട്ടതല്ല. കാനഡ പോലും നല്‍കപ്പെട്ടതല്ല'-വിടവാങ്ങല്‍ പ്രസംഗത്തില്‍, സ്ഥാനമൊഴിയുന്ന പ്രധാനമന്ത്രി ജസ്റ്റിന്‍ ട്രൂഡോയും രാജ്യം പോരാടി നേടിയ സ്വാതന്ത്ര്യത്തെക്കുറിച്ചും ജനാധിപത്യത്തെക്കുറിച്ചും പരമാധികാരത്തെക്കുറിച്ചും ഊന്നിപ്പറഞ്ഞു.
