ടൊറന്റോ: ഫെഡറല്‍ ഗവണ്‍മെന്റ് താത്ക്കാലിക വിദേശ തൊഴിലാളി പദ്ധതി നിര്‍ത്തലാക്കണമെന്ന് കണ്‍സര്‍വേറ്റീവ് നേതാവ് പിയറി പൊയ്ലിവ്രെ ആവശ്യപ്പെട്ടു. താത്ക്കാലിക വിദേശ തൊഴിലാളി പദ്ധതി വേതനം കുറഞ്ഞ തൊഴിലാളികളെ വിപണിയില്‍ നിറുത്തുകയും യുവ കനേഡിയന്‍മാര്‍ക്ക് ജോലി കണ്ടെത്തുന്നത് ബുദ്ധിമുട്ടാക്കുകയും ചെയ്തുവെന്നാണ് അദ്ദേഹം പറയുന്നത്.
എന്തുകൊണ്ടാണ് ലിബറലുകള്‍ രാജ്യത്തെ സ്വന്തം യുവാക്കളെ ജോലിയില്‍ നിന്ന് പുറത്താക്കുകയും ദരിദ്ര രാജ്യങ്ങളില്‍ നിന്നുള്ള കുറഞ്ഞ വേതനമുള്ള താത്ക്കാലിക വിദേശ തൊഴിലാളികളെ പകരം ചൂഷണം ചെയ്യുകയും ചെയ്യുന്നതെന്ന കാര്യത്തില്‍ മറുപടി പറയണമെന്നും പൊയ്ലിവ്രെ ബുധനാഴ്ച മിസിസാഗയില്‍ പറഞ്ഞു.
താത്ക്കാലിക വിദേശ തൊഴിലാളി പദ്ധതി നിര്‍ത്തലാക്കണമെന്ന് അവര്‍ ആഗ്രഹിക്കുന്നുണ്ടെങ്കിലും നിയമപരമായി ബുദ്ധിമുട്ടുള്ള കാര്‍ഷിക തൊഴിലാളികള്‍ക്കായി പ്രത്യേകമായ പരിപാടി സൃഷ്ടിക്കുമെന്ന് കണ്‍സര്‍വേറ്റീവുകള്‍ പറയുന്നു.
കാര്‍ഷിക തൊഴിലാളികള്‍ക്കായി കാനഡയില്‍ ഇതിനകം പ്രത്യേക കുടിയേറ്റ പ്രവാഹമുണ്ട്. അത് മെക്‌സിക്കോയില്‍ നിന്നും മറ്റ് കരീബിയന്‍ രാജ്യങ്ങളില്‍ നിന്നുമുള്ള തൊഴിലാളികളെ കൊണ്ടുവരാന്‍ തൊഴിലുടമകളെ അനുവദിക്കുന്നുണ്ട്.
താത്ക്കാലിക വിദേശ തൊഴിലാളികളെയല്ല മറിച്ച് ലിബറല്‍ ഗവണ്‍മെന്റിനെയും 'ലിബറല്‍ കോര്‍പ്പറേറ്റ് ഉന്നതരെയും' കുറ്റപ്പെടുത്തുന്നുവെന്ന് പൊയ്ലിവ്രെ ഊന്നിപ്പറഞ്ഞു. അവര്‍ സമ്പന്നരാക്കാന്‍ തൊഴിലാളികളെ ചൂഷണം ചെയ്യുകയാണെന്ന് അദ്ദേഹം പറയുന്നു.
കുറച്ചു കാലം മുമ്പ്, യുവ കനേഡിയന്‍മാര്‍ക്ക് എന്‍ട്രി ലെവല്‍ ജോലികളില്‍ സുപ്രധാന കഴിവുകള്‍ നേടാനും സ്‌കൂളിന് പണം നല്‍കാനും ഭാവി കെട്ടിപ്പടുക്കാനും മതിയായ വരുമാനം നേടാനും കഴിഞ്ഞുവെന്ന് കണ്‍സര്‍വേറ്റീവ് എം പി മിഷേല്‍ റെമ്പല്‍ ഗാര്‍ണര്‍ പ്രസ്താവനയില്‍ പറഞ്ഞു. പകരം, തൊഴിലുടമകള്‍ വൈദഗ്ധ്യമുള്ള ഗാര്‍ഹിക തൊഴില്‍ ശക്തിയെ സൃഷ്ടിച്ചെങ്കിലും ലിബറലുകള്‍ ആ കരാര്‍ ലംഘിച്ചുവെന്നും കുറ്റപ്പടുത്തി.
2025ല്‍ ലിബറലുകള്‍ 82,000 താത്ക്കാലിക വിദേശ തൊഴിലാളികളുടെ പരിധി വാഗ്ദാനം ചെയ്തിട്ടുണ്ടെങ്കിലും ഫെഡറല്‍ സര്‍ക്കാര്‍ ഇതിനകം 105,000 പെര്‍മിറ്റുകള്‍ നല്‍കിയിട്ടുണ്ടെന്ന് പൊയ്ലിവ്രെ പറഞ്ഞു. കഴിഞ്ഞ ആറ് മാസത്തിനുള്ളില്‍ നല്‍കിയ അതേ എണ്ണം താത്ക്കാലിക വിദേശ തൊഴിലാളികള്‍ക്ക് പെര്‍മിറ്റുകള്‍ നല്‍കിയാല്‍ വീണ്ടും റെക്കോര്‍ഡ് തകര്‍ക്കുമെന്നും പൊയ്ലിവ്രെ പറഞ്ഞു.
കണ്‍സര്‍വേറ്റീവ് നേതാവിന്റെ കണക്കുകളില്‍ കൃത്യമല്ലാത്തതോ അപൂര്‍ണ്ണമായതോ ആയ വിവരങ്ങളാണ് ഉള്ളതെന്ന് ലിബറല്‍ സര്‍ക്കാര്‍ പ്രസ്താവനയില്‍ അറിയിച്ചു.
ജനുവരി മുതല്‍ ജൂണ്‍ വരെയുള്ള കാലയളവില്‍ 33,722 താത്ക്കാലിക വിദേശ തൊഴിലാളികള്‍ മാത്രമേ രാജ്യത്ത് പ്രവേശിച്ചിട്ടുള്ളൂവെന്ന് ഇമിഗ്രേഷന്‍ മന്ത്രി ലെന ഡയബിന്റെ ഓഫീസ് പറയുന്നു. ഇത് ഈ വര്‍ഷം പ്രതീക്ഷിക്കുന്ന മൊത്തം താത്ക്കാലിക വിദേശ തൊഴിലാളികളുടെ 40 ശതമാനമാണെന്നും അവര്‍ വ്യക്തമാക്കി.
ഈ വര്‍ഷം ഇതുവരെ നല്‍കിയ 105,000 പെര്‍മിറ്റുകളില്‍ ഇതിനകം രാജ്യത്തുള്ള ആളുകളുടെ പെര്‍മിറ്റ് വിപുലീകരണങ്ങളും ഉള്‍പ്പെടുന്നുണ്ട്.
മൊത്തത്തില്‍ 2024 ജനുവരി മുതല്‍ ജൂണ്‍ വരെയുള്ള സമയത്തെ അപേക്ഷിച്ച് 2025 ജനുവരി മുതല്‍ ജൂണ്‍ വരെയുള്ള കാലയളവില്‍ 125,903 പുതിയ താത്ക്കാലിക തൊഴിലാളികള്‍ കുറഞ്ഞുവെന്ന് ഡയബിന്റെ ഓഫീസ് പറഞ്ഞു.
ബുധനാഴ്ച ടൊറന്റോയില്‍ മന്ത്രിസഭാംഗങ്ങളുമായി കൂടിക്കാഴ്ച നടത്തുന്നതിനിടെ ജനസംഖ്യയുടെ അനുപാതമായി കുടിയേറ്റം ഏഴ് ശതമാനത്തില്‍ നിന്ന് അഞ്ച് ശതമാനമായി കുറയുന്ന തരത്തില്‍ തന്റെ സര്‍ക്കാര്‍ നയങ്ങള്‍ നടപ്പിലാക്കുകയാണെന്ന് പ്രധാനമന്ത്രി മാര്‍ക്ക് കാര്‍ണി പറഞ്ഞു.
രാജ്യത്തുടനീളമുള്ള ബിസിനസ്സ് നേതാക്കളുമായി സംസാരിക്കുമ്പോള്‍, അവരുടെ ഒന്നാം നമ്പര്‍ പ്രശ്‌നം താരിഫുകളാണെന്നും അവരുടെ രണ്ടാമത്തെ പ്രശ്‌നം കൂടുതല്‍ വിദേശ തൊഴിലാളികളെ എങ്ങനെ നേടാം എന്നതാണെന്നും കാര്‍ണി പറഞ്ഞു.