വാഷിംഗ്ടണ്‍: 2024 സാമ്പത്തിക വര്‍ഷത്തില്‍, മികച്ച ഏഴ് ഇന്ത്യന്‍ ഐടി കമ്പനികള്‍ മൊത്തത്തില്‍ പുതിയ തൊഴിലിനായി 7,299 എച്ച്-1 ബി വിസ അപേക്ഷകള്‍ മാത്രമാണ് അംഗീകരിച്ചത്. 2015 സാമ്പത്തിക വര്‍ഷത്തില്‍ 14,792 എച്ച് 1 ബി വിസകള്‍ക്ക് അനുമതി ലഭിച്ച സ്ഥാനത്താണ് ഇപ്പോള്‍ വന്‍തോതിലുള്ള കുറവ് രേഖപ്പെടുത്തിയിട്ടുള്ളത്. യുണൈറ്റഡ് സ്റ്റേറ്റ്‌സ് ആസ്ഥാനമായുള്ള പക്ഷപാതരഹിത തിങ്ക് ടാങ്കായ നാഷണല്‍ ഫൗണ്ടേഷന്‍ ഫോര്‍ അമേരിക്കന്‍ പോളിസി (എന്‍. എഫ്. എ. പി) നടത്തിയ ഈ വിശകലനത്തിലാണ് ഇന്ത്യന്‍ ഐടി സ്ഥാപനങ്ങളുടെ വിസ അംഗീകാരങ്ങളില്‍ ഗണ്യമായ ഇടിവ് കണ്ടെത്തിയത്.
7, 299 അംഗീകാരങ്ങള്‍ എഫൈ്വ 24 ലെ മൊത്തം എച്ച്-1 ബി വിസ അംഗീകാരങ്ങളുടെ 5.2 ശതമാനം മാത്രമാണ്, ഇത് യുഎസ് സിവിലിയന്‍ തൊഴിലാളികളുടെ 0.004 ശതമാനത്തിന് തുല്യമാണ്. എച്ച്-1 ബി വിസ അപേക്ഷകളുടെ നിരസിക്കല്‍ നിരക്ക് 2.5 ശതമാനമായി കുറഞ്ഞു, ഇത് 2023 സാമ്പത്തിക വര്‍ഷത്തിലെ 3.5 ശതമാനത്തില്‍ നിന്നുള്ള നേരിയ ഇടിവാണെന്ന് എന്‍എഫ്എപി കണ്ടെത്തലുകള്‍ പറയുന്നു.
വരാനിരിക്കുന്ന ട്രംപ് ഭരണകൂടം തന്റെ ആദ്യ ഭരണകാലത്ത് നടപ്പില്‍ വരുത്തിയ കുടിയേറ്റ നിയന്ത്രിത നയങ്ങള്‍ പുനഃസ്ഥാപിച്ചാല്‍ വിസ നിരസിക്കല്‍ നിരക്ക് ഉയരുമെന്നും റിപ്പോര്‍ട്ട് മുന്നറിയിപ്പ് നല്‍കി.
വ്യക്തിഗത കമ്പനിയുടെ പ്രകടനത്തിന്റെ കാര്യത്തില്‍, പ്രാരംഭ തൊഴിലിനായി 3,871 എച്ച്-1 ബി വിസ അനുമതികളോടെ ആമസോണ്‍ മുന്നിട്ടുനില്‍ക്കുന്നു-2023 ല്‍ അവര്‍ക്ക് 4,052 ല്‍ നിന്നും 2022 ല്‍ 6,396ഉം എച്ച് 1 ബി വിസകള്‍ ലഭിച്ചത് കണക്കിലെടുക്കുമ്പോള്‍ 2024 വലിയ കുറവാണ് കാണുന്നു. ആമസോണിന് പിന്നാലെ കണ്‍സിഗ്നന്റിന് 2,837 അംഗീകാരങ്ങളും ഇന്‍ഫോസിസിന് 2,504 അംഗീകാരങ്ങളും ടാറ്റ കണ്‍സള്‍ട്ടന്‍സി സര്‍വീസസിന് (ടിസിഎസ്) 1,452 അംഗീകാരങ്ങളുമാണ് ലഭിച്ചത്. ഐബിഎം (1,348), മൈക്രോസോഫ്റ്റ് (1,264), എച്ച്‌സിഎല്‍ അമേരിക്ക (1,248), ഗൂഗിള്‍ (1,058), ക്യാപ്‌ജെമിനി (1,041), മെറ്റാ പ്ലാറ്റ്‌ഫോമുകള്‍ (920) എന്നിവയാണ് വിസാനുമതി വെട്ടിക്കുറച്ച മറ്റ് പ്രധാന കമ്പനികള്‍.
രസകരമെന്നു പറയട്ടെ, എലോണ്‍ മസ്‌കിന്റെ നേതൃത്വത്തിലുള്ള ടെസ്ല ഈ വര്‍ഷം ശ്രദ്ധേയമായ മുന്നേറ്റങ്ങള്‍ നടത്തി. ടെസ്ല 2024ല്‍ എച്ച്-1 ബി അംഗീകാരങ്ങളില്‍ ഗണ്യമായ വര്‍ദ്ധനവ് കൈവരിക്കുകയും മുന്‍ വര്‍ഷങ്ങളില്‍ മികച്ച 25 ല്‍ പോലും ഇടംപിടിക്കാന്‍ കഴിയാതിരുന്നതിനുശേഷം തൊഴിലുടമകള്‍ക്കിടയില്‍ 16-ാം സ്ഥാനം നേടുകയും ചെയ്തു. ടെസ്ലയ്ക്ക് 2024ല്‍ 742 അംഗീകാരങ്ങള്‍ ലഭിച്ചു, 2023ല്‍ മൊത്തം 328 ഉം 2022 ല്‍ 337 ഉം ആയിരുന്നു ഇത്. നിര്‍മ്മാണം, ഗവേഷണം, വികസനം, എഞ്ചിനീയറിംഗ് റോളുകള്‍ എന്നിവയിലെ ആവശ്യങ്ങളിലേക്കാണ് ടെസ്ലയുടെ എച്ച്-1 ബി വിസ അഭ്യര്‍ത്ഥനകള്‍ ഉണ്ടായതെന്ന് റിപ്പോര്‍ട്ട് സൂചിപ്പിക്കുന്നു.
മറ്റൊരു റിപ്പോര്‍ട്ട് അനുസരിച്ച്, ഇന്ത്യന്‍ ഐടി സ്ഥാപനങ്ങളായ ടിസിഎസ്, വിപ്രോ, ഇന്‍ഫോസിസ്, എച്ച്‌സിഎല്‍ എന്നിവ എച്ച്-1 ബി വിസയുടെ ഉപയോഗം 56% കുറച്ചിട്ടുണ്ട്.
ഈ വ്യത്യാസം തന്ത്രങ്ങളിലെ മാറ്റത്തെ എടുത്തുകാണിക്കുന്നു; അമേരിക്കയില്‍ വിജയകരമായി പ്രവര്‍ത്തനം സ്ഥാപിച്ച ഇന്ത്യന്‍ സ്ഥാപനങ്ങള്‍ പ്രാദേശിക പ്രതിഭകളെ റിക്രൂട്ട് ചെയ്യുന്നതിലും വിദഗ്ധരായ പ്രൊഫഷണലുകളെ ആകര്‍ഷിക്കുന്നതിനായി ഗ്രീന്‍ കാര്‍ഡ് സ്‌പോണ്‍സര്‍ഷിപ്പുകള്‍ വാഗ്ദാനം ചെയ്യുന്നതിലുമാണ് കൂടുതല്‍ ശ്രദ്ധ കേന്ദ്രീകരിക്കുന്നത്.
ഇന്ത്യന്‍ ഐടി സ്ഥാപനങ്ങള്‍ക്കുള്ള എച്ച്-1 ബി വിസ അനുമതികള്‍ പകുതിയായി കുറഞ്ഞു
